Ezek 33:16 - ÎVUKU RÎA ÛVORO MWARO

¹⁶ Mevia marîa eekîte mbere matigacoka kûririkanwa, ke nîekîte maûndû ma kîvooto na magîrîru, nama mûndû ûcio nîagaatûûra mwoyo.

Ezek 33:16 ပူးပေါင်းရင်းမြစ်များ

Thaburi 103:9

Ndagaatûgûkagia vîndî cionthe, kana atûûra arakarîte tene na tene.

Isaia 1:18

Ngai-Mûnene arauga atîrî, “Ûkani rîu twarie. Wana ethîrwa mevia menyu mûtunîvîte ta ndûngûrû, makatherua macerûve ta îra. Wana ethîrwa matunîvîte ta nthakame, magacerûvua mekare ta guoya wa ng'ondu.

Isaia 43:25

Nie nînie nakwoveere mevia maku nîûndû wa kwenda gwakwa, na ndikaaririkana mevia maku.

Isaia 44:22

Nîmvatîte mavîtia maku ta îtu, na mevia maku ta nundu; njokererani nîûndû nîmûkûûrîte.”

Ezek 18:22

Gûtirî ûndû wana ûmwe mûcûku ûrîa eekire ûkaaririkanwa. Nîûndû wa maûndû ma ûthingu marîa ekîte nîmagaatûma atûûre mwoyo.

Ezek 20:11

Nînaamavere irîra ciakwa na ngîmamenyithia mawatho makwa nîguo mûndû amarûmîrîra atûûre mwoyo.

Ezek 33:17

“Kûnarî ûguo andû enyu maugaga atî maûndû marîa Mwathani ekaga tî maro. Kinthî tî o mekaga maûndû matarî maro.

Aroma 5:16

Kûrî ngûrani gatagatîrî ga kîveo Kîam Ngai na mevia ma mûndû ûmwe. Na njîra ya wîvia wa mûndû ûmwe Ngai nîwatuire atî andû onthe nî acûku, nwatî vuva wa mevia ma andû eengî Ngai nîwavecanire kîveo na agîtua andû athingu.

Aroma 5:21

Kwoguo wata ûrîa mevia maathamakire na njîra ya gîkuû, nwaguo wega wa Ngai ûthamakaga na njîra ya ûthingu na ûgatûma tûgîe na mwoyo wa tene na tene na njîra ya Jesû Kristû Mwathani wetû.