Ezek 3:20 - ÎVUKU RÎA ÛVORO MWARO

²⁰ “Mûndû mûthingu angîtiga ûthingu wake na agîcoka gwîka maûndû macûku, nîngekîra maûndû ma kûmûvînga mbere yake na mûndû ûcio nîagaakua. Nîûndû ndwanamûkania, nîagaakua nîûndû wa waganu wake. Ndikaaririkana ciîko ciake cia ûthingu na nîngaakûrîvia nthakame yake.

Ezek 3:20 ပူးပေါင်းရင်းမြစ်များ

2Maû 24:2

Joashi nîwekire maûndû marîa maakenagia Ngai-Mûnene îvinda rîonthe rîrîa Jehoiada, mûthînjîri-Ngai aarî mwoyo.

2Maû 25:15

Kwoguo Ngai-Mûnene nîwarakarirue nî ûndû ûcio, agîtûma mûrathi kûrî Amazia akamûrie atîrî, “Nîndûî kîratûma ûgooca ngai cia mîvuanano cia andû a Edomu na ngai icio itiavonokia andû ao kuuma kûrî mue?”

Thaburi 119:165

Andû arîa mendete watho waku marî thayû mwîngî, gûtirî ûndû ûngîmavînga.

Thaburi 125:5

Nwatî arîa magarûrûkaga makarûmîrîra njîra ciao njûku, Ngai-Mûnene nîakaamaverithia vamwe na arîa mekaga maûndû macûku. Isiraeli kûrogîa thayû!

Thaburi 36:3

Aragia maûndû macûku na ma maveeni; nîatigîte gwîka maûndû na ûûgî na gwîka maûndû maro.

Nthi 25:12

Mûndû mûûgî akaanîtie mûndû ûkûthikîrîria, ekariî ta gîcûvî Kîam thaavu kana mathaga ma thaavu ntheri.

Isaia 64:6

Tue tuonthe tûtuîkîte ta andû marî na mûgiro; na ciîko cietû cionthe mbaro ciîkariî ta nguo îrî na gîko. Tuonthe tûûmaga ta mathangû, namo mevia metû matûgûrûkagia ta rûkûngi.

Isaia 8:14

Nie ngaatuîka kûndû gwa kûrîra, ngatuîka ta îthiga rîa kûmavînga, îthiga rîa kûvînga mothamaki ma Juda na Isiraeli; na nduîke mûtego wa kûnyita andû a Jerusalemu.

Jeremia 34:16

Nwatî nîmwacokire mûkîgarûrûka, na mûkîgwatia rîîtwa rîakwa mûgiro, vîndî îrîa mue muonthe mwacokire gwoca rîngî ngombo cia aka na arûme irîa mwarekereretie mûrî na wendi, na mûkîmatua ngombo cienyu rîngî.

Jeremia 6:21

Kwoguo nie Ngai-Mûnene nîrauga atîrî, “Taroria nîngwigîra andû aya maûndû ma kûmavînga, methe vamwe na anake ao, andû arîa mariganîtie nao na arata nîmakaathira.”

Ezek 14:3

“Mûndû, andû aya nîmetîkîtie mîvuanano, na mîvuanano îo nîîratûma mevie. Nie nwambîtîkîre mambûrie ûtaaro wa wonthe?

Ezek 18:24

“Nwatî mûndû mûthingu angîtiga ûthingu wake na acoke gwîka maûndû matarî ma kîvooto na acoke gwîka maûndû marî mûgiro ta marîa mekagwa nî mûndû ûrîa mwaganu, mûndû ûcio nwa atûûre mwoyo? Gûtirî ûndû wanarî ûmwe wa ciîko irîa cia ûthingu ûrîa ekîte ûkaaririkanwa, nîûndû maûndû macûku marîa matûmîte atuîka mwîvia na mevia marîa ekîte, nîmo magaatûma akue.

Ezek 18:26

Rîrîa mûndû mûthingu agarûrûka na atiga ûthingu wake na agîka maûndû matarî ma kîvooto, nî agaakua nîûndû wa maûndû mau. Agaakua nîûndû wa maûndû mau matarî ma kîvooto ekîte.

Ezek 3:18

Nîngîkera mûndû mwaganu atî nama nîagûkua nawe ûrege kûmûkaania nîguo agarûrûke avonokie mwoyo wake; mûndû mwaganu nîagaakua nîûndû wa waganu wake, nawe nîngaakûrîvia nthakame yake.

Ezek 33:18

Mûndû mûthingu angîtiganîria ûthingu wake na acoke gwîka maûndû macûku, nîagaakua nîûndû wa mavîtia mau.

Ezek 33:6

Nwatî mûrangîri angîona nthû ciûkîte na arege kûvuva karumbeta andû mamenyithue, nthû ciaûka nîikaûraga andû nîûndû wa mevia mao, nwatî gîkuû Kîam andû acio gîkaarîvua mûrangîri.

Ezek 7:19

Nîmagaikia sîlûva njîrarî, na thaavu yao igaatuîka ta kîndû gîtarî kîtheru. Sîlûva na thaavu ciao itikaavota kûmavonokia mûthenya ûrîa Ngai-Mûnene akaametûrûrîra marakara make. Itikaamathiria vata kana imavaithie, nîûndû mbeca icio na thaavu nîcio ciatûmire matonye waganurî.

Danieli 9:18

We Ngai wetû, tega matû maku ûtûthikîrîrie. Ta roria mathîna marîa tûrî namo na mathîna marîa marî îtûûrarî rîrîa rîtanîtue nawe. Tûrakûvoya we Ngai nîûndû ûrî wa ntha nyîngî na tî nîûndû wa ûrîa twagîrîrîte.

Alawi 19:17

“Mûtikamenane na andû arîa engî, nwatî îgucanagani nîguo mûtikevie.

Zefania 1:6

Nîngacûkangia arîa onthe mandiganîrîtie nie Ngai-Mûnene, onthe arîa mandiganîrie na matambûragia ûtaaro.”

Mathaayo 18:15

“Ethîrwa Mûrwanyûkwe nwa akûvîtîrie, thiî ûmwîre mavîtia make mûrî aîrî tu. Ke angîkûthikîrîria, nîmwacokanîrîra.

Luka 2:34

Simioni nîwamarathimire, agîcoka akîîra Mariamu ng'ina wa Jesû atîrî, “Ngai athuurîte mwana ûyû nîguo acûkangie na avonokie andû eengî arîa marî vûrûrirî wa Isiraeli. Mwana ûyû akeethîrwa arî kîmenyithia kîrîa andû eengî makaaria maûndû macûku make,

Luka 8:15

Nacio mbeû irîa ciagwîre mûtheturî ûrîa warî mûnoru, nî andû arîa megucaga ndûmîrîri ya Ngai na makamiga marî na ngoro mbaro na mbathîki, na magakirîrîria nginyagia rîrîa makaagîa maciaro.”

Aroma 11:9

Nake Daudi nîwaugire atîrî: “Irugo ciao irotuîka mîtego ya kûmagwatithia, o nîmagwe na maverithue!

1Akor 1:23

Nwatî tue tûvunjagia ûvoro wîgiî Kristû ûrîa mwambe. Ayahudi monaga ûvoro ûcio ûrî mûvînga, nao andû a Ndûrîrî makawona ûrî ûrimû.

Gûco 13:3

mûtikathikîrîrie mûrathi ûcio kana mûroti ûcio, nîûndû Ngai-Mûnene Ngai wenyu nîke ûramûgeria nîguo amenye kana nîmûmwendete na ngoro yonthe na mwoyo wonthe.

Ahib 10:38

Mûndû wa wonthe mûthingu nîagaatûûra mwoyo nîûndû wa gwîtîkia, nwatî ethîrwa nwa acoke na vuva ndingîkenua nîke.”

Ahib 13:17

Athîkagîrani atongoria enyu na mûrûmagîrîre maûndû marîa mamwathaga mwîke. Nîo mamenyagîrîra mîoyo yenyu na nwanginya makeera Ngai ûrîa maarutaga wîra wao. Ethîrwa mûkaamathîkagîra makaarutaga wîra wao marî na gîkeno. Ethîrwa mûtikaamathîkîra, makaûrutaga matarî na gîkeno na kwoguo mûtingîtetheka.

1Pet 2:8

Mandîko matheru maugîte atî: “Îthiga rîîrî rîtûmaga andû mavîngwe, rûciara rûrîa rûtûmaga magwe.” Mavîngagwa nîûndû matiathîkagîra ciugo cia Ngai. Ûcio nîguo warî wendi wa Ngai kûrî o.

1Joh 2:19

Andû aya nama matiarî a gîkundi gîetû, kwoguo nîmaatûtigire. Maangîethîrwe marî a gîkundi gîetû nîmangîekaranirie natue. Nwatî nîmaatûtigire nîguo kûonekane waro atî matiarî etû.