Ezek 28:25 - ÎVUKU RÎA ÛVORO MWARO

²⁵ Ngai-Mûnene Ngai arauga atîrî, “Nîngaûngania andû a Isiraeli na nîmacokanîrîrie vamwe kuuma mavûrûrirî marîa maanyaganîrîtue. Ngeeka ûguo nîguo andû a ndûrîrî mone ûthingu wakwa. Nao andû a Isiraeli nîmagacoka gûtûûra vûrûrirî ûrîa naveere Jakovu, ndungata yakwa.

Ezek 28:25 ပူးပေါင်းရင်းမြစ်များ

Thaburi 106:47

We Ngai-Mûnene Ngai wetû, tûvonokie, tûcokanîrîrie vamwe kuuma mavûrûrirî, nîguo tûcokagie ngatho na tûkumagie rîîtwa rîaku rîtheru.

Isaia 5:16

Nwatî Ngai-Mûnene mwene vinya wonthe onanagia ûnene wake na njîra ya gûtuîra andû ciira na kîvooto, na akonania ûtheru wake na njîra ya ûthingu wake.

Jeremia 12:14

Ngai-Mûnene arera andû arîa aganu arîa mariganîtie na vûrûri ûrîa Ngai-Mûnene aaveere andû a Isiraeli ûrî îgai rîao atîrî, “Nama nîngûkûûra andû akwa maume vûrûrirî wao, na ngûûre vûrûri wa Juda ume gatagatî kao.

Jeremia 23:8

nwatî makevîtaga makiugaga, ‘Wata ûrîa Ngai-Mûnene atûûraga mwoyo, ûrîa watongoririe andû a Isiraeli kuuma mavûrûrirî marîa marî mwena wa rûgûrû na akîmaruta mavûrûrirî monthe kûrîa aamanyaganîrîtie.’ Nao nîmagacoka matûûre vûrûrirî wao kîûmbe.”

Jeremia 27:11

Nwatî andû a vûrûri wa wonthe ûrîa ûkathîkîra na ûtungatîre mûthamaki wa Babuloni, nîngareka mekare vûrûrirî wao na maûrîmage na matûûre kuo. Ûguo nîguo nie Ngai-Mûnene nauga.”

Jeremia 30:18

Ngai-Mûnene arauga atîrî, “Nîngacokia andû a Jakovu vûrûrirî wao, na mbîguîre mîciî yao ntha. Îtûûra rîa Jerusalemu nîrîgaatumwa rîngî, na mûciî wa mûthamaki nîûvande varîa warî.

Jeremia 32:37

nîngaûngania andû onthe kuuma mavûrûrirî monthe kûrîa namanyaganirie nîûndû wa marakara na mang'ûrîka makwa. Nîngamacokia gûkû na ndûme matûûre kuo marî agitîre.

Ezek 11:17

“Kwoguo meere Ngai-Mûnene augîte nîngaamaûngania nîmarute mavûrûrirî marîa naamanyaganîrie, na nîngaamacokia vûrûrirî wa Isiraeli.

Ezek 20:41

“Naamûruta kûrî ndûrîrî na mavûrûri marîa mûnyaganîrîtie na nîmûrete vamwe, nîngaamwamûkîra mûrî ta îgongoona rîrî na mûnungo mwaro wa kûngenia, nacio ndûrîrî nîikoona ûthingu wakwa.

Ezek 28:22

ûrîre atî Ngai-Mûnene Ngai augîte nîakûrûa narîo onanie riiri wake gatagatî ka rîo. Rîrîa ngoonania ûthingu wakwa na njîra ya kûrîverithia, andû nîmakaamenya atî nie nînie Ngai-Mûnene.

Ezek 34:13

Nîngaairuta kuuma kûrî andû a mavûrûri mageni, na nîicokie vûrûrirî wacio. Nîngaairîthia irîmarî cia vûrûri wa Isiraeli, tûrûnjîrî twakuo na kûndû kûrîa kuonthe andû matwîre vûrûrirî.

Ezek 34:14

Nîngaairîthia kûndû kûrî na nyaki mbaro îgûrû rîa irîma cia Isiraeli. Nîikaamama kûndû kûrî na nyaki mbaro ya kûrîwa, na nîikaagîa na kûndû kwaro gwa kûrîa kûu irîmarî cia Isiraeli.

Ezek 34:27

Mîtî îrîa îrî mîgûndarî nîgaaciara matunda, mîgûnda nîkaagîa na maketha meengî na nîigaatûûra na thayû vûrûrirî wacio. Rîrîa ngaatucanga mînyororo ya andû arîa maaituire ngombo, na nîivonokie kuuma kûrî o, nîikaamenya atî nie nînie Ngai-Mûnene.

Ezek 36:28

Nîmûgaacoka mûtûûre vûrûrirî ûrîa naveere methe menyu. Nîmûgaatuîka andû akwa nanie nîngaatuîka Ngai wenyu.

Ezek 37:21

Nîûgaacoka ûmere Mwathani Ngai-Mûnene augîte atî: Nîngaaruta andû a Isiraeli maume mavûrûrirî kûrîa maathiîre, nîmaûnganie vamwe kuuma mîena yonthe na nîmacokie vûrûrirî wao.

Ezek 37:25

Nîmagaatûûra vûrûrirî ûrîa naveere ndungata yakwa Jakovu. Vûrûri ûcio nî ûrîa methe mao maatûûraga. Nao o ene, ciana ciao na ciana cia ciana ciao nîmagaatûûra kuo tene na tene. Nake Daudi ndungata yakwa nîagaatuîka mûnene wao tene na tene.

Ezek 38:23

Kwoguo, mavûrûri meengî nîmakaamenya atî, nie nînie Ngai-Mûnene na nîngoonania ûnene na ûtheru wakwa kûrî ndûrîrî nyîngî.”

Ezek 39:27

Nîngaaruta andû akwa kuuma mavûrûrirî ma nthû ciao nîguo monie ndûrîrî nyîngî atî, nie nîrî mûtheru.

Hosea 1:11

Andû a Juda na Isiraeli nîmakaagomana vamwe na nîmakathuura mûtongoria wao ûmwe; nao nîmakoongereka kûu vûrûrirî wao. Mûthenya ûcio ûkethîrwa ûrî mûnene kûrî Jezireeli.

Hosea 11:11

Magaûka magîtetemaga ta gîconi maumîte ya Misiri, makarûgaga ta macîa maumîte ya Asîria, nanie nîngamacokia kwao mîciî. Ûguo nîguo Ngai-Mûnene arauga.

Hosea 2:15

Kûu nîkuo ngamûcokeria mîgûnda yake ya mîthavibu, nîngatua Kîamnda Kîam Akori mûromo wa kîîrîgîrîro. Akanûmagîrîra atakûringîrîrua ta ûrîa ekaga arî mwîthî, ta rîrîa aarî vûrûri wa Misiri.

Joeli 3:7

Rîu nîngûruta andû akwa kûrîa mwamendirie. Ngaamwîka wata ûguo mwamekire.