Ezek 23:24 - ÎVUKU RÎA ÛVORO MWARO

²⁴ Nao nîmagaakûtharîkîra kuuma mwena wa rûgûrû marî na ikaari cia mbaara na cia gûkuua mîrigo na gîkundi Kîam andû eengî. Nîmagaakûrigicîria kuuma na mîena yonthe marî na ngo nene na nini na ngovia cia cuuma cia kûgitîra ciongo. Nîngaametîkîria magûtuîre ciira, na nîmagaagûtuîra kûringana na watho wao.

Ezek 23:24 ပူးပေါင်းရင်းမြစ်များ

2Sam 24:14

Daudi nîwerire Gadi atîrî, “Nînîrathînîka mûno! Nwatî ndikwenda kûverithua nî andû. Nî kava tûverithue nî Ngai-Mûnene ke mwene nîûndû arî ntha nyîngî.”

Jeremia 47:3

rîrîa makegua înegene rîa mavûngû ma mbarathi, înegene rîa ikaari cia mbaara, na mûrurumo wa magûrû ma cio. Methe nîmakaariganîrwa nî ciana ciao, njara ciao ikethîrwa iregerete mûno.

Jeremia 52:11

Nîwacokire agîkûûra Zedekia metho na akîmwova na mvîngû na akîmûvira Babulonia. Nake Zedekia nîwekarire kûu Babuloni arî mwove nginya rîrîa akuire.

Jeremia 52:9

Nao athigari a mbaara a Babulonia nîmaagwatire mûthamaki Zedekia, na makîmûvira kûrî mûthamaki Nebukadinezarû ûrîa warî îtûûrarî rîa Ribula rîrîa rîrî mûringo wa Hamathi, na akîmûtuîra ciira.

Ezek 16:38

Nîngaagûtuîra ciira ta ûrîa aka arîa macûkagia moviki mao matucagîrwa na arîa maûraganîte. Nîngaagûtuîra ciira wa kûragwa nîrî na marakara na nîrî na wîru.

Ezek 21:23

Nwatî andû a Jerusalemu nîmakoona woni ûcio ûrî wa maveeni nîûndû nîmaaîvîtire na kinyi. Kûnarî ûguo, nîûgaatûma maririkane mavîtia mao na ûtûme manyitwe.

Ezek 23:45

Nwatî andû arîa athingu nîmakaamatuîra ciira ûrîa aka arîa itharia na aûragani matucagîrwa, nîûndû nî itharia na nîaûragani.”

Ezek 26:10

Akethîrwa arî na mbarathi nyîngî mûno na nîikaaûmbûra rûkûngû rûgûkunîkîre. Nthingo cia Turo nîikaainaina nîûndû wa mîgambo ya athigari arîa mathiîcaga matwîte mbarathi, na ya ikaari irîa igucagua nî mbarathi, na ya ikaari cia gûkuua mîrigo rîrîa akaavîtûkîra ivingorî cia îtûûra. Agaatonya îtûûrarî ta mûndû ûgûtonyerera kûndû kwomomore.

Ezek 26:7

Ngai-Mûnene Ngai augîte atîrî, “Nîngaareta Nebukadinezarû mûthamaki wa Babuloni, mûthamaki ûrîa mûnene gûkîra athamaki arîa engî wa kuuma mwena wa rûgûrû atharîkîre Turo. Agaaûka arî na mbûtû nene ya athigari eengî, athigari matwîte mbarathi, na arî na mbarathi na ikaari cia mbarathi.