Ezek 14:21 - ÎVUKU RÎA ÛVORO MWARO

²¹ Ngai-Mûnene arauga atîrî, “Nîngûverithia Jerusalemu na maûndû mana: Mbaara, yûra, nyamû mbaganu cia kîthakarî na mîrimû mîcûku nîguo andû mathire, na nyamû ithire.

Ezek 14:21 ပူးပေါင်းရင်းမြစ်များ

2Sam 24:13

Gadi nîwathiîre kûrî ke, akîmwîra ûrîa Ngai-Mûnene aaugîte na akîmûria atîrî, “Ûrenda ûndû ûrîkû? Kûgîe yûra îvinda rîa mîaka îthatû vûrûrirî waku, ûûre nî nthû ciaku ikûvinyûrîtie mîeri îthatû kana kûgîe na mûthiro mîthenya îthatû vûrûrirî wonthe. Rîu îîcirie na ûmbîre ûrîa ngûthiî kwîra Ngai-Mûnene.”

Isaia 51:19

Nîûnyitîtwe nî maûndû maîrî; namo nî atî: vûrûri waku nîmûcûkangu na nî mwanangîku, yûra na ûragani. Nû ûgaakûvoreria?

Jeremia 27:8

“Nwatî vûrûri wa wonthe kana ûthamaki ûngîkarega gûtungatîra Nebukadinezarû mûthamaki wa Babuloni na kûmwathîkîra, nîngaverithia vûrûri ûcio na mbaara, yûra na mîrimû na nîûthirie viû na njîra ya mûthamaki Nebukadinezarû.

Jeremia 32:24

“Taroria, Akalidei nîmenjîte mûtaro ûrigicîrîtie îtûûra rîonthe nîguo marîtharîkîre na marîîgwatîre. Nayo mbaara, yûra na mîrimû nîigûtûma îtûûra rîîrî rînyitwe nî Akalidei arîa mararîtharîkîra. Nama maûndû marîa waririe nîmaravinga rîu ûkîonaga.

Ezek 12:16

Nwatî nîngaatûma andû anini mavonoke kuuma mbaararî, kuuma kûrî yûra, na kuuma kûrî mîrimû. Nao nîmakeraga andû a mavûrûri kûrîa makeethîrwa marî, maûndû macûku marîa maneka na nîmakaamenya atî nie nînie Ngai-Mûnene.”

Ezek 14:13

“Mûndû, vûrûri wa wonthe ûngîvia nîûndû wa kûrega gûtuîka evokeku kûrî nie, nîngaaûverithia. Nîngaacûkangia makûmbî mao ma irio na ndûme kûgîe na yûra. Nîngaatûma andû a vûrûri ûcio makue, wana nyamû ciakuo.

Ezek 14:15

“Nîngîtûma nyamû cia kîthaka ivîtûkîrîre vûrûri ûcio na ciûrage andû viû na ûtigwe ûtarî mûndû, na gûtuîke gûtirî mûndû ûngîvîtûkîrîra kuo nîûndû wa nyamû.

Ezek 14:17

“Nwa ndûme kûgîe mbaara vûrûrirî, na kûgîe indo njûku cia mbaara ithirie andû wana nyamû cia kîthaka.

Ezek 14:19

“Narîo nîngîtûma mûrimû mûcûku kûu vûrûrirî nîrî na marakara, nîngatûma andû na nyamû ikue,

Ezek 14:20

wana ethîrwa Noa, Danieli na Ayubu marî kuo, matingîvonokia erîtu kana anake ao. Nwatî nîûndû wa ûthingu wao, o nwa mavonoke.”

Ezek 33:27

“Marîrie na ûmere nie Ngai-Mûnene nîrauga atî: Wata ûrîa ndûûraga mwoyo, andû acio onthe matûûraga matûûrarî mau momomoku nîmakaaûragwa. Arîa marî mîgûndarî makaarîwa nî nyamû cia kîthaka; na arîa marî kûndû kûrîa kûgitîre na ngurungarî makaaûragwa nî mîrimû mîcûku.

Ezek 5:12

Gîcunjî kîmwe Kîam ithatû Kîam andû enyu, nîmagaakua nî mûrimû mûcûku na yûra marî kûu mûrî; gîcunjî kîmwe Kîam ithatû kîngî nîgîgaakuîra mbaararî kûu îtûûrarî; gîcunjî kîu kîngî Kîam ithatû nîngaakînyagania nthî yonthe na njoke nîkîrûmîrîrie na rûviû.

Ezek 5:13

“Ûguo nîguo marakara makwa makaathira na mvorerie mang'ûrîka makwa kûrî o nîguo mbîganîre. Vuva wa ûguo nîmakaamenya atî nie Ngai-Mûnene nîmaverithîtie nîûndû wa kûrega gûtuîka evokeku kûrî nie.

Ezek 5:17

Kwoguo nîngaatûma kûgîe na yûra gatagatî kenyu na nîmûrekerie nyamû cia kîthaka irîe ciana cienyu. Nîmûkeethîrîrua nî mîrimû mîcûku, mbûragano na mbaara cia kûmûthiria. Nie Ngai-Mûnene nînie nauga ûguo.”