Danieli 6:27 - ÎVUKU RÎA ÛVORO MWARO

²⁷ Nîke ûvonokagia andû na akamatethûra marî thînarî, aringaga ciama na akonania morirû, îgûrû wana gûkû nthî. Nîavonoketie Danieli kuuma ithuurî cia mînyambû.”

Danieli 6:27 ပူးပေါင်းရင်းမြစ်များ

Ayubu 36:15

Nwatî Ngai nîavonokagia arîa avinyîrîrie, na njîra ya mathîna marîa moonaga. Atûmaga moone thîna nîguo mamwîgue.

Thaburi 145:13

Ûthamaki waku ûtûûraga tene na tene, na wathani waku ûtûûraga kûrî njiarwa cionthe. Ngai-Mûnene nî mwîvokeku maûndûrî monthe marîa aragia, na nî mûtugi maûndûrî monthe marîa ekaga.

Thaburi 18:48

na ûkîmvonokia kuuma kûrî nthû ciakwa. We Ngai-Mûnene, nîwamvotithirie kûvoota nthû ciakwa na ûkîmvonokia kuuma kûrî aganu.

Thaburi 18:50

Ngai nîavotithagia mûthamaki wake kûvootana, nî onanagia wendo ûtathiraga kûrî ûrîa athuurîte, kûrî Daudi na njiarwa ciake tene na tene.

Thaburi 32:7

Nîîthithaga kûrî we, ûkaangitagîra ndikanyitwe nî thîna. Nîngûkwinîra nîûndû wa kûmvonokia.

Thaburi 35:17

We Ngai-Mûnene, nîwîkara ûroretie nginya rî? Mvonokia ndige kûtharîkîrwa nîo, vonokia mwoyo wakwa kuuma kûrî mînyambû îno!

Thaburi 97:10

Ngai-Mûnene nîendete andû arîa mathûrîte maûndû macûku, nîamenyagîrîra ûtûûro wa andû ake, nîamavonokagia kuuma kûrî andû arîa aganu.

Jeremia 10:10

Nwatî Ngai-Mûnene nîke Ngai wa ma, nî Ngai ûrîa ûtûûraga mwoyo na nî mûthamaki wa tene na tene. Angîrakara nthî nîîthingithaga, na ndûrîrî itingîûmîrîria marakara make.

Danieli 2:44

Îvinda rîu rîa athamaki acio, Ngai ûrîa wî îgûrû nîakaarûngamia ûthamaki ûtakaathira. Ûthamaki ûcio ndûkaavotwa, na nîûgaacûkangia mothamaki mau mengî monthe mathire viû, ûcoke ûtûûre wathanaga tene na tene.

Danieli 4:31

Mbere ya mûthamaki arîkia ûrîa aaragia, mûgambo nîwaumire îgûrû ûkiuga atîrî, “Mûthamaki Nebukadinezarû, tathikîrîria ûrîa ngûkwîra! Rîu nînathengutia ûthamaki kûrî we.

Danieli 4:34

Mîaka mûgwanja yathira, nie mûthamaki Nebukadinezarû nînaroririe îgûrû kûrî Ngai na ngîcokerwa nî ûgima wa meciria na ngîambîrîria kûgooca Ngai ûrîa wî îgûrû mûno; nînaamûkumirie na ngîmûva gîtîîo na riiri, ûcio ûtûûraga tene na tene nîûndû: Nîatûûra athanaga tene na tene naguo wathani wake ûgaakinyagîra njiarwa na njiarwa.

Danieli 4:35

Andû onthe a nthî nî a mana methorî make. Nîke wathaga araika arîa marî îgûrû Vamwe na andû arîa matûûraga gûkû nthî. Gûtirî mûndû ûngîregana na wendi wake kana ûngîgîa na kîûria îgûrû rîa ciîko ciake.

Danieli 6:20

Rîrîa aakuvîvîrie îrima, nîwetire Danieli arî na kîeva kîngî mûno na akîmwîra atîrî, “Ûûi Danieli, ndungata ya Ngai ûrîa ûtûûra mwoyo! Ngai ûrîa ûtungatagîra wa mûthenya nîaravotire gûgûtethûra kûrî mînyambû?”

Johana 4:48

Jesû nîwerire karani ûcio atîrî, “Gûtirî mûndû wana ûmwe gatagatîrî kenyu ûgeetîkia atonete ciama na morirû.”

Ciîko 4:30

Kûnjûra njara yaku nîguo ûvonanie. Onania magegania na ûringe ciama na njîra ya rîîtwa rîa Jesû ndungata yaku ntheru.”

Ahib 2:4

Ngai wanake nîwongerere ûira wake îgûrû rîao na njîra ya kûringa ciama na morirû ma mîthemba yonthe, na iveo cia Roho Mûtheru irîa aaveere andû kûringana na wendi wake.

1Sam 17:26

Daudi nîwaûririe andû arîa maarî vakuvî nake atîrî, “Mûndû ûrîa ûkaaûraga Mûfilisiti ûyû na athengutîrie Isiraeli gîconoko gîkî-rî, akaavewa ndûî? Mûfilisiti ûyû ûtarî mûruu nîkwa arî ûrîkû ke atî nîguo anyararithie athigari a Ngai ûrîa ûtûûraga mwoyo?”