Amosi 4:13 - ÎVUKU RÎA ÛVORO MWARO

¹³ Ngai nîke waûmbire irîma na akîûmba mvuvo. Nîke ûmenyithagia mûndû meciria make, na nîke ûtûmaga mûthenya ûtuîke ûtukû. Athiîcagîrîra nthî kûrîa gûtûgîru. Rîîtwa rîake nî Ngai-Mûnene, Mwene vinya wonthe.

Amosi 4:13 ပူးပေါင်းရင်းမြစ်များ

Ayubu 9:7

Athaga riûa rîtikaume, rîkarega kuuma, akunîkagîra njata ikarega kwara.

Thaburi 135:7

Nîke ûtûmaga matu mambate kuuma mîthiia yonthe ya nthî, nîke ûtûmaga mveni ivenie rîrîa gûkura, na akaruta rûkûngi kuuma makûmbîrî make.

Thaburi 139:2

Nîûmenyaga rîrîa ngwîkara nthî na rîrîa ngûkîra, nîûmenyaga meciria makwa ûrî kûraca.

Thaburi 147:18

Nîacokaga akathana na îkararûka, nîatûmaga rûvuvo rûvurutane, na manjî mathiî.

Thaburi 65:6

Nîwavandire irîma varîa irî na vinya waku, na ûkîonania ûvoti waku mûnene.

Ntha 10:22

Na Musa nîwaûkîrîrie njara yake îroretie na îgûrû maturî. Nakuo nîkwagîre nduma nene mûno vûrûri wa Misiri îvinda rîa mîthenya îthatû.

Ntha 14:20

gîkîrûngama gatagatî ka athigari a mbaara a Isiraeli na athigari a mbaara a andû a Misiri. Narîo îtu rîu nîrîatûmire kûgîe nduma kûrî andû a Misiri, nwatî nîrîavere andû a Isiraeli ûtheri. Kwoguo athigari a mbaara a Misiri matingîavotire gûkuvîvîria athigari a mbaara a Isiraeli ûtukû ûcio wonthe.

Isaia 40:12

Nû wanathima manjî ma îria na rûvî rwake kana akathima matu na njara ciake? Nû ûngîvota gwîkîra mûthetu wa nthî gîkomberî, kana athime irîma na tûrîma na kîthimi?

Isaia 45:7

Nînie ndûmaga kûgîe ûtheri na ngatûma kûgîe nduma; nînie ndûmaga kûgîe thayû na ngatûma kûgîe thîna. Nînie Ngai-Mûnene ûrîa wîkaga maûndû mau monthe.

Isaia 47:4

Rîîtwa rîa mûkûri wetû nî Ngai-Mûnene mwene vinya wonthe, Ûrîa Mûtheru wa Isiraeli.

Isaia 48:2

Kûnarî ûguo mwîtîîaga mûgîîtanagia na îtûûra rîtheru, na mugaga atî mwîvokaga Ngai wa Isiraeli, ûrîa rîîtwa rîake nî Ngai-Mûnene mwene vinya wonthe.

Isaia 5:30

Mûthenya ûcio makaararamîra Isiraeli, ta ûrîa makûmbî ma manjî marurumaga. Mûndû ûrîa ûkaaroria nthî nyûmû, akoona nduma na mathîna! Ûtheri nîûgakunîkwa nî matu.

Jeremia 10:13

Vîndî îrîa aruta mûgambo manjî marîa marî îgûrû nîmarurumaga, na nîke ûtûmaga matu mambate kuuma mîthiia ya nthî. Atûmaga rûveni rûvenie rîrîa kûraura, na agatûma rûkûngi rûke rumîte kûrîa rwîkaraga.

Jeremia 10:16

Ngai wa Jakovu ndavana ta cio, nîûndû nîke waûmbire indo cionthe, na nîathuurîte Isiraeli matuîke andû ake, Ngai-Mûnene mwene vinya wonthe nîrîo rîîtwa rîake.

Jeremia 13:16

Kumiani Ngai-Mûnene Ngai wenyu mbere ya areta nduma, na mbere ya mûvîngwa nî nduma îrîa îrî irîmarî. Mûkerirîria kwona ûtheri, nwatî agaatûma ûtuîke nduma nene.

Jeremia 46:18

Wata ûrîa nie Mûthamaki ndûûraga mwoyo, nie Ngai-Mûnene mwene vinya wonthe, nthû nîgaûka kûmûtharîkîra, ta Taboru gatagatî ka irîma, na ta kîrîma gîa Karimeli kîrî rûtere rwa îria.

Jeremia 51:16

Rîrîa aruta mûgambo, manjî marîa marî îgûrû nîmarurumaga; nîke ûtûmaga matu maume mîena yonthe ya nthî. Atûmaga kûgîe mveni vîndî ya mbura, na agatûma rûvuvo ruume makûmbîrî make.

Jeremia 51:19

Ngai wa Jakovu ndavana ta cio; nîûndû nîke waûmbire indo cionthe, na akîthuura mûvîrîga wa Isiraeli ûtuîke andû ake kîûmbe. Ngai-Mûnene mwene vinya wonthe nîrîo rîîtwa rîake.

Danieli 2:28

Nwatî îgûrû, kûrî Ngai ûrîa ûguûragia maûndû marîa marî nthithorî, na nîaguûrîrîtie Mûthamaki Nebukadinezarû ûrîa gûkethîrwa gwîkariî vuvarî. Kîroto na cioneki irîa warî nacio rîrîa wamamiî nî îno:

Danieli 2:30

Naguûrîrue nthitho îno tî atî nîûndû wa ûrîa naarî mûûgî gûkîra andû arîa engî onthe, nwatî nîguo we Mûthamaki ûtaûkîrwe nî kîroto gîaku nîguo ûmenye ûrîa wîciragia.

Hosea 12:6

Nwatî nwa nginya ûcokerere Ngai waku, tongoraguani nî wendo na kîvooto, îîvokageni Ngai wenyu vîndî cionthe.

Joeli 2:2

Ûcio nî mûthenya wa nduma na kîeva, mûthenya wa matu na nduma nene. Ngige nyîngî nîciûkîte, ciîkariî ta nduma îtambûrûkîte irîmarî. Gûtianethîrwa kûrî na tayo wanarî vanini, na ndîkoonekana rîngî kûrî njiarwa cionthe igaûka.

Amosi 3:13

Ngai-Mûnene Mwene vinya wonthe arauga atîrî, “Thikîrîriani na mûgakaanie njiarwa cia Jakovu.

Amosi 5:27

Kwoguo nîngaamûvira îthamîriorî vûrûri ûrî kûraca na Damesiki.” Ûguo nîguo Ngai-Mûnene, ûrîa wîtagwa Ngai mwene vinya wonthe arauga.

Amosi 5:8

Ngai-Mûnene nîke waûmbire njata, nîke waûmbire Kîrîmîra na Orioni. Nîke wagarûrire nduma nene îgîtuîka ûtheri, na mûthenya ûgîtuîka ûtukû. Acokanagîrîria manjî ma îria vamwe na akametûrûra nthî. Etagwa Ngai-Mûnene.

Amosi 6:8

Ngai-Mûnene mwene vinya wonthe nîevîtîte akauga, “Nînthûrîte mwîtîîo wa andû a Isiraeli, na ngamena nyomba ciao cia goro, nîngaavecana îtûûra rîao rîrîa rînene na indo cionthe irîa irî kuo kûrî nthû ciao.”

Amosi 8:9

Ngai-Mûnene arauga atîrî, Mûthenya ûcio nîngaatûma riûa rîthûe mûthenya, na ndûme kûgîe nduma.

Amosi 9:6

ûrîa ûtumaga nyomba yake îgûrû matuurî, na akaiga mûtambarûko wa matu îgûrû rîa nthî. Nîke ûnganagia manjî marîa marî îriarî, akametûrûra gûkû nthî nyûmû, rîîtwa rîake nî Ngai-Mûnene.

Mika 1:3

Ngai-Mûnene nîaûka aumîte kûrîa gwake kûtheru; akaanyûrûrûka athiîrîre îgûrû rîa irîma.

Habakuku 3:19

Mwathani Ngai-Mûnene nîke vinya wakwa, nîatûmaga magûrû makwa matuîke ta ma nthwariga, atûmaga nthiîrîre irîma îgûrû.

Zakaria 12:1

Îno nî ndûmîrîri ndito îgiî Isiraeli kuuma kûrî Ngai-Mûnene ûrîa waûmbire îgûrû, na akîûmba nthî na akîva mûndû mwoyo. Ke arauga atîrî,

Mathaayo 9:4

Nwatî Jesû nîwamenyire maûndû marîa meciragia, nake nîwamaûririe atîrî, “Nîndûî gîtûmaga mwîcirie maûndû macûku ngororî cienyu?

Johana 2:25

Ndaavatara mûndû wana ûmwe wa kûmûmenyithia ûvoro wîgiî andû acio, nîûndû ke mwene nîwaicî kîrîa Kîamrî ngororî ciao.

Johana 3:8

Rûkûngi rûvurutanaga rûthiîte wa kûrîa rûkwenda na mûndû nîwîgucaga mûrurumo waruo, nwatî ndamenyaga na kûrîa rumîte kana na kûrîa rûthiîte. Ûguo nwa ta guo gwîkîkaga kûrî mûndû wa wonthe ûciarîtwe nî Roho Mûtheru.”

Gûco 32:13

“Nîwametîkîrie mathiîre kûndû kûrîa gûtûgîru, makîrîcaga irio irîa ciarî mîgûndarî. Nîwamavere ûûkî kuuma mathigarî makîrîa, na maguta ma ndamaiyû kuuma rûciararî.

Gûco 33:29

Kûrathimwa nî mue andû a Isiraeli! Gûtirî andû mavaana tamue, andû a vûrûri ûrîa wavonokirue nî Ngai-Mûnene. Ngai-Mûnene nîke ngo yenyu na rûviû rwenyu, nîke ûmûgitagîra na akamûvootanîra. Nthû cienyu nîigaaûka mbere yenyu ciînyivîtie, namue nî mûkaamakinyangîra nthî.”