Alawi 4:21 - ÎVUKU RÎA ÛVORO MWARO

²¹ Vuva wa ûguo, mûthînjîri-Ngai Mûnene nî agooca ndegwa îo na amîvire na kûu nja ya kûrîa matûûraga na amîvîvîrie kuo, wata ûrîa aavîvirie ndegwa îrîa yarutîtwe nîûndû wa kûtheria wîvia wake ke mwene. Rîrî nî îtega rîa kûtheria wîvia wa andû onthe.

Alawi 4:21 ပူးပေါင်းရင်းမြစ်များ

Ezira 8:35

Andû onthe arîa maacokete kuuma îthamîriorî nîmaacokire makîrutîra Ngai wa Isiraeli matega ma kûvîvua. Nîmaarutire ndegwa îkûmi na igîrî nîûndû wa vûrûri wonthe wa Isiraeli, ng'ondu mîrongo kenda na ithathatû na tûtûrûme mîrongo mûgwanja na mûgwanja. Nîmaacokire makîruta mbûri îkûmi na igîrî nîûndû wa mevia mao. Nyamû icio cionthe nîciavîvirue irî matega ma Ngai-Mûnene.

Ntha 29:14

Nwatî ûkaavîvîria nyama cia ndegwa, rûo rwayo, na tatha na kûu nja ya kûrîa andû matûûraga. Rîu nî îtega rîa kûtheria mevia ma athînjîri-Ngai.

Ezek 45:22

Mûthenya ûcio mûnene nîakaaruta ndegwa îmwe ya matega ma mevia make na ma andû a vûrûri.

Alawi 16:15

“Vuva wa ûguo, nîakaaûraga mbûri ya îtega rîa kûtheria mevia ma andû, avire nthakame yayo vandû varîa vatheru Mûno na amîminjaminje îgûrû rîa gîkunîko wana vau mbere ya îthandûkû rîa kîrîkanîro, wata ûrîa eekire na nthakame ya ndegwa.

Alawi 16:21

Aroni nîakambararia njara ciake cioîrî îgûrû rîa kîongo Kîam mbûri na agwete maûndû monthe macûku ma andû a Isiraeli, mevia mao monthe, na ûremi wao, na amatonyie mbûrirî îo. Mbûri îo nîgaacoka îrekererue îthiî na kûu werûrî nî mûndû ûrîa ûvetwe wîra ûcio.

Alawi 16:27

Ndegwa na mbûri irîa ciarutirwe irî îtega rîa kûtheria mevia, irîa nthakame yacio yavirirwe vandû varîa vatheru Mûno nîûndû wa kûtheria mevia, nîkaavirwa na kûu nja ya kûrîa andû matûûraga. Nacio njûo cia nyamû icio, nyama, na mara vamwe na tatha nî ikaavîvua.

Alawi 4:13

“Ethîrwa nî andû onthe a Isiraeli mevîtie na njîra ya kuna rîathani rîmwe rîa maathani ma Ngai-Mûnene matakûmenya,

Alawi 4:20

Ageeka na ndegwa îo wata ûrîa eekire na ndegwa ya îtega rîa kûtheria mevia. Nî akaaruta îgongoona nîûndû wa kûtheria wîvia wa andû wata ûguo, na nî makooverwa.

Alawi 6:11

Nî agaacoka arute nguo icio ekîre ciîngî na akuue mûu ûcio na aûvire vandû varîa vatherie na kûu nja ya kûrîa matûûraga.

Alawi 6:23

Îtega rîonthe rîa irio cia mûgûnda rîrîa mûthînjîri-Ngai akaarutaga rîkaavîvagua rîonthe; rîtikaarîwa.”

Alawi 8:17

Nîwocire nyama icio ciîngî cia ndegwa îo, rûûo rwayo vamwe na mara na akîivîvîria nja ya kûu maatûûraga, wata ûrîa Ngai-Mûnene aathanîte.

Ndari 15:24

Ethîrwa andû onthe maaregire kûvingia mawatho mau matakûmenya, makaarutaga ndegwa îmwe îrî îtega rîa kûvîvua nîguo mûtararûko warîo ûkenie Ngai-Mûnene. Makaarutanagîria na îtega rîa irio cia mûgûnda, na îtega rîa indo cia kûnyuwa, na marute nthenge îmwe rîrî îtega rîa kûtheria mevia.

Mathaayo 20:28

Nîûndû wana nginya Mûrû wa Mûndû ndaaûka gûtungatîrwa nwatî aûkire gûtungata na kûvecana mwoyo ûtuîke îrîvi rîa gûkûûra andû eengî maume meviarî.”

2Akor 5:21

Kristû ndaarî na mevia, nwatî nîûndû wetû Ngai nîwatûmire atuîke wa kûgaa mevia metû nîguo atî tûrî kîndû kîmwe nake tûkaavota kûgaa ûthingu wa Ngai.

Ahib 13:11

Mûthînjîri-Ngai ûrîa mûnene wa Kîyahudi nî aviraga nthakame ya nyamû varîa vatheru Mûno nîguo akamîrute îrî îgongoona rîa mevia. Nwatî mîîrî ya nyamû icio îvîvagîrua na kûu nja ya kûrîa matûûraga.