Alawi 16:29 - ÎVUKU RÎA ÛVORO MWARO

²⁹ “Mawatho mama marûmîrîrîte nîmatûûra marûmagîrîrwa nî mue: Mûthenya wa îkûmi mwerirî wa mûgwanja andû a Isiraeli vamwe na ageni arîa matûûranagia nao nwanginya menyerekagie na matikarutage wîra wanarî ûrîkû.

Alawi 16:29 ပူးပေါင်းရင်းမြစ်များ

1Atha 8:2

Nao onthe nîmaaûnganire kîrugorî kwa mûthamaki Solomoni mwerirî wa Ethanimu, nîguo mweri wa mûgwanja.

Ezira 3:1

Mwerirî wa mûgwanja andû a Isiraeli onthe maarî matûûrarî mao. Kwoguo onthe nîmaacokire makîgomana vamwe kûu Jerusalemu.

Ezira 8:21

Vakuvî na mûtaro wa manjî wa Ahava nînerire andû onthe twînyerekie na twînyivie mbere ya Ngai wetû na tûvoe. Nîtwavoire Ngai na tûkîmûria atûtongorie na atûgitîre rûgendorî rwetû tûrî vamwe na ciana na indo cietû cionthe.

Thaburi 35:13

Nwatî rîrîa maarî arwaru, nînekîrire nguo ya macakaya; nînenyerekirie, na naavoyaga nyînamîtie kîongo gîakwa,

Thaburi 69:10

Rîrîa nenyivirie na njîra ya kwînyerekia, nîrîo andû maanjambirie.

Ntha 12:16

Mûthenya wa mbere na wa mûgwanja nîmûgaacemanagia nîûndû wa kûgooca. Gûtirî wîra wagîrîrwe kûrutwa mîthenya îo, nwatî irio nwa irugwe mîthenya îo.

Ntha 20:10

Nwatî mûthenya wa mûgwanja nî thavatû yakwa nie, Ngai-Mûnene, Ngai waku. Mûthenya ûcio we ndûkarute wîra wanarî ûrîkû, we mwene, kana mûvîcîguo, kana mwarîguo. Wana ndungata ya mûndû mûrûme kana ya mûndûmûka itikarute wîra, kana ndîthia yaku, kana mûgeni ûrîa ûrî gwaku mûciî.

Ntha 30:10

Aroni akaarûthaga mambura ma kûtheria metha ya kîgongoona riita rîmwe wa mwaka. Akaamîtheragia na njîra ya gwîkîra mîtî îrîa yumîrîte ya metha ya kîgongoona nthakame ya nyamû îrîa îrutîtwe nîûndû wa îgongoona rîa kûtheria mevia. Îgongoona rîu nîrîtûûra rîrutagwa riita rîmwe wa mwaka nî njiarwa ciaku cionthe. Metha îno ya kîgongoona nî ntheru viû na nî nyamûrîre Ngai-Mûnene.”

Ntha 31:14

Kwoguo nî mwagîrîrwe nî kûmenyagîrîra mûthenya wa thavatû, nîûndû nî mwamûre. Mûndû wa wonthe ûkaarega gûtîîa mûthenya wa thavatû nîakaaûragwa, mûndû wa wonthe ûkaaruta wîra mûthenya wa thavatû nîakaamûranua na andû akwa.

Ntha 31:15

Mûkaarutaga wîra mîthenya îtandatû, nwatî mûthenya wa mûgwanja nî thavatû ya kûvurûka na wamûrîrîtwe Ngai-Mûnene. Mûndû wa wonthe ûkaaruta wîra wana ûrîkû mûthenya wa thavatû nî akaaûragwa.

Isaia 58:13

Ngai-Mûnene arauga atîrî, “Ûngîtiga kûruta wîra mûthenya wa thavatû, ûtige kûrûmîrîra maûndû ma gwîkenia we mwene mûthenya wakwa mwamûre, ûtucage thavatû mûthenya wa gûkena na mûthenya wa Ngai-Mûnene wa kûvewa gîtîîo, ûvecage mûthenya ûcio gîtîîo, na ûtige kûthiîcaga njîra ciaku, na ûtige gûcaragia maûndû ma gwîkenia kana kwaragia ndeto itarî na kîguni,

Isaia 58:3

Andû maraûria atîrî, “Twînyerekagia nîkî, nawe Ngai-Mûnene ndwonaga? Twîimaga irio nîkî, nawe ndûtindanagîra na ûndû ûcio?” Nake Ngai-Mûnene aramacokeria atîrî, “Mûthenya ûrîa mûrenyerekia, mûrûmagîrîra wendi wenyu tu, na mûgakinyîrîria aruti wîra enyu onthe.

Isaia 58:5

Mûthenya ûrîa mûrenyerekia, nîmwîverithagia; mwînamagîrîria ciongo cienyu ta kamûnyaki, na mûkaara nguo cia macakaya mûkaimamîra na mûkamama mûurî. Kûu nîkuo mwîtaga kwînyerekia? Mwîciragia nie Ngai-Mûnene, nwa ngenue nî mûthenya ta ûcio?

Danieli 10:12

Nîwacokire akîmbîra atîrî, “Danieli, ndûgetigîre. Ngai nîeguîte mavoya maku kuuma vîndî îrîa wenyivirie mbere yake nîguo ûtaûkîrwe nî kîoneki. Nie naûka gûgûcokeria mavoya maku.

Danieli 10:3

Ndiarîa irio mbaro, nyama, wana ndiacama ndivei, kana njanûra njuîrî, îvinda rîa ciumia icio ithatû.

Alawi 23:21

Mûthenya ûcio nî gûkaaugîrîrua andû maûngane vamwe nîguo magooce. Mûtikaarute wîra mûrito mûthenya ûcio. Watho ûyû nîûtûûra ûrûmagîrîrwa nî njiarwa cienyu tene na tene kûrîa kuonthe mûtûûraga.

Alawi 23:3

Mûrî na mîthenya îtandatû îrîa mûkaarutaga wîra, nwatî mûthenya wa mûgwanja, mûthenya wa thavatû, nî mûthenya wa kûvurûka. Mûtiagîrîrwe nî kûruta wîra mûthenya ûcio, nwatî mûgomanage vamwe nîûndû wa kûgooca. Thavatû nî yakwa, na mûkaamîmenyagîrîra mûrî wa kûrîa mûkethagîrwa mûrî.

Alawi 23:36

Mûkaarutaga matega ma kûvîvua wa mûthenya îvinda rîa mîthenya mûgwanja. Mûthenya wa kanana mûcoke mûgomane rîngî vamwe nîguo mûgooce na mûndutîre matega ma kûvîvua. Mûthenya ûcio mûtikarutage wîra ûrîa mûrutaga wa mûthenya.”

Alawi 25:9

Nîmûgaacoka mûvuve tûrumbeta vûrûrirî wonthe mûthenya wa îkûmi mwerirî wa mûgwanja. Ûcio nîguo mûthenya wa mambura ma kûtheria mevia.

Alawi 3:17

Watho ûyû nî ûtûûra ûrûmagîrîrwa nî njiarwa cia Isiraeli, atî gûtirî Mûisiraeli ûkaarîa mathunya kana anyue nthakame kûrîa kuonthe magaatûûra.

Ndari 29:7

“Mûthenya wa îkûmi wa mweri wa mûgwanja mûgacemanagia nîguo mûgooce Ngai. Mûthenya ûyû nwanginya mwînyerekagie na mûtikarutage wîra.

Ciîko 27:9

Nîtwatere mîthenya mîîngî rûgendorî nginya tûkîgîa na ûgwati wa kûthiî na mbere na rûgendo rwetû tûrî merirî nîûndû mûthenya wa kwîtheria mevia nîwarîkîtie kûvîtûka. Kwoguo Paûlo nîwamataarire akîmeera atîrî:

1Akor 11:31

Nwatî angîthîrwa nwa twambe gwîtuîria tue ene, Ngai ndangîtûtuîra.

Ahib 4:10

Mûndû wa wonthe ûvotete gûtonya kîvurûkorî kîrîa Ngai eeranîre, nîakaavurûka kuuma wîrarî wake wata ûrîa Ngai aavurûkire kuuma kûrî wîra wake.

1Sam 7:6

Kwoguo nîmaacemanirie kûu Mizipa. O nîmaatavire manjî na makîmetûrûra kîrî ta kîveo kûrî Ngai-Mûnene na makîînyerekia mûthenya ûcio wonthe. Nao nîmaaugire atîrî, “Tue nîtwîvîrîtie Ngai-Mûnene.” (Nake Samueli aacirithagîria andû a Isiraeli kûu Mizipa.)