Akol 3:11 - ÎVUKU RÎA ÛVORO MWARO

¹¹ Nîûndû wa ûguo, rîu gûtirî na ngûrani ya andû a ndûrîrî na Ayahudi, ya mûndû mûruu na ûtarî mûruu, ya mûndû mûkingitaru na ya mûvoi mîvuanano, ya mûndû ngombo na ûtarî ngombo. Nwatî Kristû nîke maûndû monthe, kûrî andû onthe.

Akol 3:11 ပူးပေါင်းရင်းမြစ်များ

Thaburi 117:2

Nîûndû nîatwendete na wendo ûtathiraga; na wîvokeku wa Ngai-Mûnene ûtûûraga tene na tene. Kumiani Ngai-Mûnene!

Isaia 49:6

Ke augîte atîrî, “Tî ûndû mûvûthû gûtuîka ndungata yakwa, ûrûngamie rîngî mîvîrîga ya Jakovu, na kûrûnga andû a Isiraeli arîa maatigarire. Nwatî nîngûgûtua ûtheri kûrî andû a Ndûrîrî, nîguo andû onthe a gûkû nthî mavonoke.”

Isaia 52:10

Ngai-Mûnene nîonanîtie vinya wake mûtheru kûrî andû a mavûrûri monthe, nayo mîthiia yonthe ya nthî nîîkona ûvonokio wa Ngai wetû.

Jeremia 16:19

We Ngai-Mûnene nîwe ûngitagîra na ûmvecaga vinya; nîwe ûndethagia vîndî ya mathîna. Mavûrûri kuuma mîena yonthe ya nthî nîmagaûka kûrî we makwîre atîrî, “Gûtirî kîndû methe metû maagaire tiga ngai cia maveeni, na indo îtarî vata kana umithio.

Ezek 47:22

Mûkaûgaa ûtuîke wenyu na mûgaîre andû a ndûrîrî arîa mûtûûranagia nao na magîrîrîte ciana kuo. Andû acio a ndûrîrî mûkaamatua ta andû a Isiraeli na makaagaîrwa mîgûnda nîguo îtuke yao wata andû acio engî a Isiraeli.

Hosea 2:23

Nîngatûma andû akwa vûrûrirî ûcio mevande na mathatûkwe. Nîngeguîra ntha, ‘Ûrîa ûtegucagîrwa ntha,’ nao arîa metirwe ‘Tî akwa,’ nîngamera, ‘Mue mûrî andû akwa.’ Nao nîmakaauga, ‘We nîwe Ngai wetû.’ ”

Amosi 9:12

Nao andû a Isiraeli nîmakegwatîra matigari ma Edomu, na mavûrûri monthe marîa metanîtue rîîtwa rîakwa.” Ûguo nîguo Ngai-Mûnene ûrîa ûgwîka maûndû mau augîte.

Mika 4:2

Na andû a mavûrûri mengî nîmakaauga atîrî, “Ûkani tunûkie kîrîmarî Kîam Ngai-Mûnene, tûthiî hekarûrî ya Ngai wa Isiraeli, nîguo agatûthomithie mîthiîre yake, natue tûrûmagîrîre njîra ciake. Nîûndû watho ûkauma Zayuni, na kiugo Kîam Ngai-Mûnene gîkauma Jerusalemu.”

Zakaria 2:11

Îvinda rîu ndûrîrî nyîngî nîigaacokerera Ngai-Mûnene, na nîigaatuîka andû ake, na atûûranie nao. Namue nîmûkaamenya atî nî Ngai-Mûnene mwene vinya wonthe ûndûmîte kûrî mue.

Malaki 1:11

nîûndû andû a mavûrûri monthe ma nthî nîmakumagia rîîtwa rîakwa. Kûndû kuonthe nîmvîvagîrua ûbani na ngarutîrwa magongoona matheru, nîûndû rîîtwa rîakwa nîrîkumagua nî mavûrûri monthe.

Johana 14:23

Nake Jesû nîwamûcokerie atîrî, “Mûndû wa wonthe ûmendete nîwathîkagîra ciugo ciakwa. Vava nîamwendete, na nie tûrî na Vava nîtûkaga kûrî ke na tûgatûûrania nake.

Johana 15:5

“Nie nî nie Mûthavibu, namue nîmue mvûa. Mûndû wa wonthe wîkaraga ndaarî yakwa, nanie ngekara ndaarî yake, nîagîcaga maciaro meengî; nîûndû mûtarî vamwe na nie gûtirî ûndû mûngîvota gwîka.

Johana 17:23

Nie ngethagîrwa nîrî ndaarî yao, nawe ûkethagîrwa ûrî ndaarî yakwa nîguo matuîke kîndû kîmwe viû. Nao andû a gûkû nthî magaacoka mamenye atî we nîwe wandûmire na atî we nîûmendete wata ûrîa ûmendete.

Ciîko 15:17

Kwoguo andû arîa engî onthe nîmakaanjaria wana andû a ndûrîrî onthe, arîa nie mbîtîte matuîke akwa.

Ciîko 28:2

Nao andû arîa maatûûraga kuo nîmaatûtugire waro mûno. Na nîûndû nîkwambîrîrîtie kuura mbura na kwarî na mvevo nyîngî, nîmaakirie mwaki na magîtûnyita ûgeni tuonthe.

Ciîko 28:4

Rîrîa andû arîa maatûûraga kuo moonire njoka îo îîrigicîrîtie njararî ya Paûlo, nîmeeranire atîrî, “Nwanginya mûndû ûyû ethîrwe nî mûûragani. Wana ethîrwa ndanakuîra îriarî, ûma ndûngîmwîtîkîria atûûra mwoyo.”

Aroma 1:14

Nîûndû mbîthagîrwa ta nîrî na thirî kûrî andû onthe: Aangiriki na acenji, andû aûgî na arîa matarî aûgî.

Aroma 10:12

Nîûndû gûtirî ngûrani gatagatîrî ka Mûyahudi na mûndû wa Ndûrîrî. Ngai nî Mwathani wa andû onthe na nîavecanaga irathimo ciake nyîngî kûrî andû onthe arîa mamûkaagîra.

Aroma 3:22

Ngai atucaga andû onthe athingu na njîra ya gwîtîkia Jesû Kristû. Ngai ekaga ûguo kwî andû onthe arîa metîkîtie nîûndû ndathuurûkanagia.

Aroma 3:29

Kana Ngai nî Ngai wa Ayahudi tu? Kinthî tî Ngai wa andû a Ndûrîrî wa nao? Nîma Ke nî Ngai wa andû a Ndûrîrî wa nao.

1Akor 12:13

Amwe gatagatîrî getû nî Ayahudi, na amwe nî andû a Ndûrîrî, na engî nî ngombo, na amwe nî andû marî na wîyathi. Nwatî tuonthe twavatithirue na njîra ya Roho ûmwe tûgîtuîka mwîrî ûmwe, na tûkînyua Roho wa ûcio ûmwe.

1Akor 14:11

Nwatî ethîrwa ndiramenya rûthiomi rûrîa rûrarua, nîngîthîrwa nîrî mûgeni kûrî arîa mararia, nao arîa mararia mangîthîrwa marî ageni kûrî nie.

1Akor 7:19

Kûrua kana kûrega kûrua, ûcio tî ûndû ûrî na vata. Ûndû ûrîa ûrî na vata nî kwathîkîra mawatho ma Ngai.

Agal 2:20

Kwoguo rîu tî nie ndûûraga mwoyo, nwatî nî Kristû ûtûûraga ndaarî yakwa. Ûtûûro ûrîa ndûûraga rîu, ndûûraga na njîra ya gwîtîkia Mûriû wa Ngai ûrîa wamendire na akîîvecana akue nîûndû wakwa.

Agal 5:6

Nîûndû rîrîa tûrî ûrûmwe na Jesû Kristû, ûndû ûrîa ûrî vata tî kûrua kana kûrega kûrua, nwatî nî wîtîkio ûrîa ûrutaga wîra na njîra ya wendani.

Aefeso 1:23

Kanitha nî mwîrî wa Kristû, na nîîcûrîtwe nî Kristû ûrîa arî ke wîcûru wa maûndû monthe marîa marî kûndû kuonthe.

Aefeso 2:14

Nîûndû Kristû nîke thayû wetû. Ke nîanyitithanîtie Ayahudi na andû a Ndûrîrî magatuîka kîndû kîmwe. Maagaûkanîte takwa vaarî na rûthingo gatagatîrî kao, nwatî Kristû nîwatharirie rûthingo rwa rûmena na njîra ya kûruta mwîrî wake.

Aefeso 2:15

Kristû nîwathiririe watho wa Ayahudi na maathani maguo nîguo athondeke rûrîrî rûcerû na rûrî kîndû kîmwe nake kuumana na ndûrîrî icio igîrî. Kwoguo nîwatûmire andû magîe na thayû.

Aefeso 3:17

Na nîmvoyaga atî Kristû ekarage ngororî cienyu na njîra ya wîtîkio wenyu. Mvoyaga atî maûndû monthe marîa mûgekaga, mûmekage nîûndû mûrî na wendo,

Aefeso 3:6

Nayo nthitho nî atî na njîra ya ûvoro mwaro, andû a Ndûrîrî nî ciîga cia mwîrî ûmwe na nîmanyitaga kîrîa Ngai eeranîre na njîra ya Jesû Kristû.

Aefeso 6:8

Mûndû wa wonthe wana ethîrwa nî ngombo kana tî ngombo, nîamenyage atî Mwathani nîakaava wa mûndû kîveo nîûndû wa wîra mwaro ûrîa wa mûndû ekaga.

Akol 2:10

Kristû ûcio ûtûmîte mûgîe na mwoyo mwîcûru mûrî ûrûmwe nake, nîke mûnene wa maaroho marîa mengî monthe mathamakaga na mathanaga.

1Joh 5:20

Tue nîtwîcî atî Mûriû wa Ngai nî mûku na atî nîatûmîte tûtaûkîrwe, nîguo tûmenye Ngai Ûrîa wa ma. Ûtûûro wetû ûrî kûrî Ngai ûrîa wa ma na kûrî Mûriû Jesû Kristû. Ûyû nîke Ngai ûrîa wa ma na nwake mwoyo wa tene na tene.

2Joh 1:9

Mûndû wa wonthe ûreganîte na kîrîra gîa Kristû na akathiî agakîria njano, ndethagîrwa arî na Ngai. Nwatî ûrîa ûrûmagîrîra kîrîra gîa Kristû ethagîrwa arî na îthe wana Mûriû.