Akol 1:10 - ÎVUKU RÎA ÛVORO MWARO

¹⁰ Namue mûkaavotaga gûtûûra ta ûrîa Mwathani endaga na mûgeekaga maûndû marîa makenagia Mwathani vîndî cionthe. Namue mûkaagîcaga na maciaro maro maûndûrî monthe marîa mûgekaga na mûgakîragîrîria kûmenya Ngai.

Akol 1:10 ပူးပေါင်းရင်းမြစ်များ

Nthi 16:7

Ngai-Mûnene angîkenua nî mîthiîre ya mûndû, nîatûmaga wana nthû cia mûndû ûcio ituîke arata.

Isaia 53:11

Vuva wa kwona umithio wa mathîna ma ndungata yake, nîagaacoka akene; ndungata îo yake nthingu îrî na ûmenyo, nîgaatûma andû eengî matuwe athingu; na nîgaakuuwa mevia mao.

Danieli 12:4

Nwatî we, Danieli, vinga îvuku na ûrîkîre rûtumo, nginya kavinda ka mûthiia wa nthî. Andû eengî nî makaavinyûra ava na vaarîa na nî makoongerera ûûgî.

Mika 4:5

Wa vûrûri ûgoocaga na ûkathîkîra ngai ya guo, nwatî tue tûkaagoocaga na tûkathîkîra Ngai-Mûnene, Ngai wetû tene na tene.

Habakuku 2:14

Nîûndû nthî yonthe nîgecûra ûmenyo wa riiri wa Ngai-Mûnene, wata ûrîa manjî mecûraga îriarî.

Johana 15:16

Mue tî mue mwanthuurire, nînie namûthuurire na ngîmûva wîra wa kûthiî kûgîa na maciaro meengî marîa magwîkara kavinda karaca. Kwoguo Vava akaamûvecaga kîndû wa kîonthe kîrîa mûkaamwîtagia na rîîtwa rîakwa.

Johana 15:8

Mwagîa na maciaro meengî, mûkonekanaga mûrî arutwa akwa, na ûndû ûyû ûkaagoocithagia Vava.

Johana 17:3

Naguo mwoyo wa tene na tene nî atî andû onthe makûmenye we Ngai wa ma na mamenye Jesû Kristû ûrîa watûmire.

Aroma 1:13

Ariû na aarî a Îthe wetû, nîngwenda mûmenye atî mavinda meengî nanavanga gûka kûrî mue nwatî ûndû ûkaga ûkandigîrîria. Mendaga gûka nîguo ndûme andû arîa engî matuîke arûmîrîri a Jesû Kristû wa ta ûrîa nekire kûrî andû a ndûrîrî.

Aroma 4:12

Iburahimu nwake îthe wa arîa onthe aruu. Ke tî îthe wao nîûndû atî nî aruu. Nî îthe wao nîûndû matûûrîte metîkîtie Ngai wata ûrîa îthe wetû Iburahimu atûûraga etîkîtie atarî ararua.

Aroma 6:4

Rîrîa twavatithirue nîtwathikirwe vamwe na Kristû ûvororî wîgiî gîkuû gîake, nîguo atî wata ûrîa Kristû ariûkirue nî vinya ûrîa ûrî riiri wa îthe wanatue nwa tûgatûûra mûtûûrîre mûcerû.

2Akor 2:14

Nwatî nîtûcokie ngatho kûrî Ngai! Nîûndû tûrî ûrûmwe na Kristû, Ngai nîatûvotanagîra vîndî cionthe. Na njîra yetû Ngai nîatambagia mûtararûko wa ûmenyo wa Kristû kûndû kuonthe.

2Akor 4:6

Nîûndû Ngai nîke waugire atîrî, “Tiga ûtheri ware ndumarî.” Ngai ûcio nwake watûmire ûtheri wake ware ngororî cietû nîguo tûmenye riiri wa Ngai ûrîa ûrî ûthiûrî wa Kristû.

2Akor 5:9

Makîria ya maûndû monthe twendaga gûkenia Mwathani wana ethîrwa tûrî mûciî gûkû nthî kana kûu îgûrû.

2Akor 9:8

Nake Ngai arî na ûvoti wa kûmûva nyîngî makîria ya irîa mûvatarîte nîguo vîndî cionthe mwîthagîrwe mûrî na indo cionthe irîa mue ene mûvatarîte na ciîngî nyîngî nîûndû wa wîra mwaro.

Aefeso 1:17

Mvoyaga Ngai wa Mwathani wetû Jesû Kristû, ûrîa arî ke Îthe wetû ûrî riiri amûve Roho ûrîa ûgûtûma mûvîge na ûkûmûguûrîria Ngai nîguo mûmûmenye waro.

Aefeso 2:10

Ngai aatûmbire ûguo twîkariî na njîra ya Kristû nîguo twîkage ciîko mbaro irîa aavangîte twîkage.

Aefeso 4:1

Nie njovetwe nîûndû nîndungatagîra Mwathani, kwoguo nîramûthaitha mûtûûre na mîkarîre îringanîte na rîtana rîrîa mwetîrwe.

Aefeso 4:13

Kwoguo tûrî vamwe tuonthe nîtûkaagîa na ûrûmwe wa wîtîkio na wa kûmenya Mûriû wa Ngai. Nîtûgaatuîka andû agima na tûkinyîre wîcûru wa ûgima wa Kristû.

Aefeso 5:10

Geragiani kûmenya maûndû marîa makenagia Mwathani.

Aefeso 5:15

Kwoguo menyagîrîrani mîkarîre yenyu. Tigagani gwîkara ta andû aritu, îkaragani ta andû aûgî.

Aefeso 5:2

Tûûragani na mîkarîre ya wendani wata ûrîa Kristû aatwendire na akîîruta nîûndû wetû ekariî ta îtega na îgongoona rînungaga waro na rîkenagia Ngai.

Afil 1:11

Nayo mîtûûrîre yenyu îkeethagîrwa îcûrîtwe nî maûndû maro marîa maumanaga na ûthingu ûrîa ûvecanagwa nî Jesû Kristû tu nîûndû wa riiri na ngumo ya Ngai.

Afil 1:27

Rîu, ûndû ûrîa ûrî na vata mûno nî atî mûtûûrage ta ûrîa ûvoro mwaro wa Jesû Kristû ûmwîraga mûtûûre, nîguo wana ethîrwa nîngûka kûmwona kana ndege gûka, nîngegua atî nîmûrûngamîte mwîkindîrîtie na mwî na ngoro îmwe, na atî nîmûrarûa mûnyitanîte vamwe nîûndû wa wîtîkio wa ûvoro ûrîa mwaro.

Afil 4:18

Na rîu nîngîte na indo nyîngî na ngakîrîrîria. Nîrî na indo cia kûmbîgana nîûndû Epafarodito nîwandetere iveo kuuma kûrî mue. Iveo icio ciîkariî ta kîndû kîrî na mûnungo mwaro gîkîrutîrwa Ngai, na ta îgongoona rîa gwîtîkîrîka nîke na rîa kûmûkenia.

Akol 2:19

na ndevokete Kristû ûrîa arîke kîongo. Kristû nîke ûvecaga mwîrî wonthe vinya na akaûnyitithania vamwe ta ûrîa mavîndî ma mwîrî wonthe manyitithanagua vamwe nî mîkiva. Kwoguo mwîrî nîûkûraga na njîra îrîa Ngai endaga ûkûre.

Akol 2:6

Nîûndû nîmwamûkîre Jesû Kristû, tûûrani mûrî kîndû kîmwe nake mûrî na ûrûmwe na Jesû Kristû, nîûndû mwîetîkîru atî ke nîke Mwathani wenyu.

Akol 3:20

Namue ciana, athîkagîrani aciari enyu vîndî cionthe, nîûndû ûguo nîguo ûkenagia Ngai.

Akol 4:5

Îthagîrwani mûrî na ûûgî rîrîa mûgwîka maûndû gatagatîrî ka andû arîa matetîkîtie Kristû. Vûthagîrani waro kanya wa konthe karîa mwagîa nako.

1Ath 2:12

Tue, nîtwamûûmagîrîria, nîtwamûthaithaga na nîtwekaraga tûkîmûringagîrîria mûtûûrage na mûtûûrîre ûrîa ûkenagia Ngai ûrîa ûmwîtaga ûthamakirî wake ûrîa ûrî na riiri.

1Ath 4:1

Na mûthiiarî, ariû na aarî a îthe wetû, nîmwathomire kuumana natue ûrîa mwagîrîrwe nî gûtûûra nîguo mûkenie Ngai na nwa guo mûratûûra. Rîu tûramûria na tûkamûthaitha na rîîtwa rîa Mwathani Jesû mûtûûre waro makîria.

2Tim 2:4

Mûthigari arî mbaararî endaga gûkenia mûnene wake, kwoguo ndavutanagia na maûndû mengî tiga wa ûrîa avetwe.

Tito 3:1

Ririkania akristiano kwînyivia mbere ya anene na athani. Magîrîrwe nî kûmathîkagîra na kwîthagîrwa mevarîrîtie gwîka ciîko mbaro.

Tito 3:14

Andû etû nîmagîrîrwe nî kwîruta gûtûmîra mavinda mao na gwîka ciîko mbaro nîguo matethagîrîria mavata ma andû arîa engî. Matiagîrîrwe nî gûtûûra mûtûûrîre ûtarî na maciaro.

Ahib 11:5

Nîûndû wa wîtîkio Enoku ndaanakua. Vandû va ûguo ke nîwavirirwe îgûrû nî Ngai, kwoguo gûtirî mûndû wamwonire. Mandîko Matheru maugaga atî, mbere Enoku avirwa îgûrû Ngai nîwakenetue nîke.

Ahib 13:16

Mûtikariganîrwe nî gwîka waro na gûtethania mûndû na ûrîa wîngî, nîûndû mama nîmo magongoona marîa makenagia Ngai.

Ahib 13:21

Ngai mwene thayû aromûva indo cionthe mbaro irîa mûvatarîte nîguo mwîkage wendi wake. Na njîra ya Jesû Kristû arotwîka ûndû ûrîa ûmûkenagia. Nake Kristû arokumagua tene na tene. Ameni!

2Pet 1:8

Nîmûvatarîte kwîthagîrwa mûrî na maûndû mama na mekarage makîongererekaga. Na ethîrwa maûndû mau makongererekaga kûrî mue magatûmaga mûtuîke andû a vata na marî na maciaro ûvororî wîgiî kûmenya Mwathani wetû Jesû Kristû.

2Pet 3:18

Nwatî thiîni na mbere gûkûra mûrî na wega na ûûgî wa Mwathani na Mûvonokia wetû Jesû Kristû. Ke arokumua rîu nginya tene na tene! Ameni.

1Joh 3:22

Ngai nîatûvecaga kîndû wa kîonthe kîrîa twamwîtia nîûndû nîtûrûmagîrîra maathani make na nîtwîkaga maûndû marîa mamûkenagia.

1Joh 5:20

Tue nîtwîcî atî Mûriû wa Ngai nî mûku na atî nîatûmîte tûtaûkîrwe, nîguo tûmenye Ngai Ûrîa wa ma. Ûtûûro wetû ûrî kûrî Ngai ûrîa wa ma na kûrî Mûriû Jesû Kristû. Ûyû nîke Ngai ûrîa wa ma na nwake mwoyo wa tene na tene.

3Joh 1:6

Nîmararutire ûira kanitharî ûvoro wîgiî wendo waku. Matethagie nîguo mathiî na njîra îrîa îngîkenia Mwathani.