Ahib 10:27 - ÎVUKU RÎA ÛVORO MWARO

²⁷ Vandû va ûguo ûndû ûrîa ûtigarîte nî gweterera tûrî na guoya îtuîro na mwaki mûnene ûrîa ûkaathiria arîa makararagia Ngai.

Ahib 10:27 ပူးပေါင်းရင်းမြစ်များ

Thaburi 21:9

Nîûkaamathiria ta ûrîa mwaki ûvîvagia indo ikathira rîrîa akaaumîra. Ngai-Mûnene nîakaamathiria na marakara make, na nîmakaavîvua nî mwaki mathire viû.

Isaia 26:11

Ûûi Ngai-Mûnene, nîûkîrîrîtie njara yaku ûkîenda kûverithia nthû ciaku, nwatî itirona. Cionie ûrîa wendete andû aku na nîigaaconoka; tiga mwaki wa mang'ûrîka maku ûivîvie.

Isaia 33:14

Andû evia arîa marî Zayuni nîmaretigîra, nao andû arîa matagoocaga Ngai marainaina makiugaga atîrî: “Nû gatagatîrî getû ûngîvota gûkuvîvîria mwaki ûyû ûvîvagia ûkathiria? Nû gatagatîrî getû ûngîtirîria mwaki ûyû ûtavoraga tene na tene?”

Jeremia 4:4

Mue andû a Juda na atûûri a Jerusalemu, îtherieni mûrî mbere yakwa nie Ngai-Mûnene, igani ngoro cienyu îrî ntheru mûrî mbere yakwa. Ethîrwa tî mwîka ûguo nîmbakanwa nî marakara, na gûtirî mûndû ûngîmavoria, nîûndû wa maûndû macûku marîa mwîkaga.”

Ezek 36:5

“Kwoguo nie Mwathani Ngai-Mûnene, nîûndû nîrî mûrakaru, nîngûverithia andû onthe a mavûrûri marîa mamûthiûrûrûkîrîtie na Edomu kuonthe. Andû acio nîmaanyitire vûrûri wakwa na nîmoonanirie kînyarari ngororî ciao na makîûgaana ûtuîke wao.

Ezek 38:19

Nîrî na wîru na marakara meengî nîmanîrîra atî mûthenya ûcio nîgûkaagîa na kîthingithia kînene vûrûrirî wa Isiraeli.

Danieli 5:6

Mûthamaki nîwatukirie kîthithi, akîvavûka, akinaina na akîthirwa nî vinya.

Hosea 10:8

Kûndû gwa kûvoera tûrîmarî twa Aveni, mevia ma Isiraeli, nîgûgaacûkangua. Mîgua na nthaugû nîkîikamera metharî ciao cia magongoona. Nao nîmakeera irîma, “Tûkunîkîre” na meere tûrîma atîrî, “Tûgwîreni!”

Joeli 2:30

“Nîngekîra rûûri îgûrû na nthî, nîgûkethîrwa na nthakame, mwaki na matu ma ndogo.

Nahumu 1:2

Ngai-Mûnene nî Ngai wî wîru; nîerîvagîrîria na arî marakara meengî, nîerîvagîrîa kûrî arîa mareganaga nake nîarakaraga nî nthû ciake.

Zefania 1:18

Mûthenya ûcio wa marakara ma Ngai-Mûnene sîlûva ciao kana thaavu ciao itikaavota kûmavonokia. Nîûndû wa mwaki wa wîru wake, nthî yonthe nîîkavîa. Nîakaathiria na îvenya arîa onthe matûûraga nthî.”

Zefania 3:8

Ngai-Mûnene nîwaugire atîrî, “Mbetererete mûthenya ûrîa ngarûngama nîrî mûira. Nînduîte ciira atî nîngûngania mavûrûri na mothamaki. Nthî yonthe nîgaacûkangua nî mwaki wa marakara ma Ngai-Mûnene.

Malaki 4:1

Ngai-Mûnene mwene vinya wonthe arauga atîrî, “Taroria, mûthenya wa îtuîro nîûrakinya, ûgîakanaga ta mwaki mûnene mûno. Andû arîa aganu na etîi nîmakavîvua na mwaki ta nyaki mûthenya ûcio. Makavîvua mathire viû ta ûrîa mûtî ûvîcaga mvûa wana mîri.

Ndari 16:35

Naguo mwaki nîwaumire îgûrû na ûgîûka ûkîvîvia andû magana maîrî ma mîrongo îtano (250) arîa maategagîra Ngai-Mûnene ûbani.

Mathaayo 13:42

Araika acio nîmagaacoka maikie andû acio îcuarî rîa mwaki, kûrîa andû makaarîra na marîe magego.

Mathaayo 13:50

Andû arîa acûku nî magaikua îcuarî rîa mwaki kûrîa makaarîra na marîe magego.”

Mathaayo 25:41

“Mûthamaki nîagaacoka ere arîa makeethîrwa marî mwena wake wa ûmotho atîrî, ‘Nthengutîrani ava, mue arîa arume nî Ngai! Thiîni mwakirî wa tene na tene ûrîa ûthondekeretwe Ngoma na araika ake.

Mathaayo 3:10

Ngai nîmûvarîriu îthanwa rîa gûtema mûtî; mûtî wa wonthe ûtaciaraga maciaro maro, nîûgaatemwa na wikue mwakirî.

Mathaayo 3:12

Ke nîmûvarîriu gîtaararû gîa kûgûrûkia ngano, nîguo aige ngano makûmbîrî, namo macaki amavîvie na mwaki ûrîa ûtavorekaga.”

Mathaayo 8:29

Na wa rîmwe andû acio nîmaaugîrîrie atîrî, “Ûrenda atîa natue we Mûriû wa Ngai? We waûka gûtûverithia îvinda rîrîa rîagîrîru rîtarî rîkinyu?”

Luka 16:24

Kwoguo gîtonga kîu nîgîetire Iburahimu na gîkîmwîra atîrî, ‘Vava Iburahimu! Mbîguîra ntha na ûndûmîre Lazaro athiî atovokie mûthiia wa kaara gake ka njara manjîrî nîguo avoravorie rûrîmî rwakwa nîûndû nînîrathînîka mûno mwakirî ûyû!’

Luka 19:27

Nacio nthû ciakwa irîa iteendaga nduîke mûthamaki wacio, ireteni ava mbere yakwa na mûciûrage ngîonaga!’ ”

Luka 21:26

Andû nîmakaagirîka nîûndû wa guoya vîndî îrîa makeethîrwa metererete kwona ûrîa nthî yonthe îgekara, nîûndû mavinya monthe ma îgûrû nîmakenyenyua.

Luka 23:30

Kavinda kau nîrîo andû makaambîrîria kwîra irîma atîrî, ‘Tûgwîreni!’ na macoke meere tûrîma atîrî, ‘Tûkunîkîreni!’

Johana 5:29

na maume mbîrîrarî ciao. Andû arîa mekîte waro nîmakaariûkua na magîe na mwoyo wa tene na tene, nwatî arîa mekîte naaî nîmakaariûkua na matuîrwe.

Gûco 32:43

“Mue mavûrûri, kumiani andû a Ngai-Mûnene, nîûndû nîarîvagia arîa maûragaga ndungata ciake. Nîerîvagîrîria kûrî nthû ciake, na akatheria mevia ma andû ake.”

Ahib 12:25

Kwoguo îîmenyerereni na mûtikarege kwîgua mûndû ûrîa ûkwaria. Andû arîa maaregire kwîgua ûrîa wavecanaga ndûmîrîri kuuma kûrî Ngai matiavonoka. Wa natue tûtingîvonoka ethîrwa nwa tûrege kwîgua ûrîa waragia kuuma îgûrû!

Ahib 12:29

nîûndû Ngai wetû nî mwaki ûrîa ûvîvagia ûkathiria.

Ahib 2:3

Tûngîrega kûverithua atîa tûngîtiganîria ûvonokio mûnene ta ûyû? Mwathani nîke warî wa mbere kwanîrîra ûvonokio ûyû, natue nîtwamenyithirue atî nî wa ma nî arîa maamwîgwire.

Ahib 9:27

Ûrîa kûrî nî atî mûndû wa wonthe nwanginya akue rita rîmwe, na vuva wa gûkua atuîrwe nî Ngai.

Jakuvu 5:3

Thaavu cienyu na sîlûva cienyu nî ndotu, naguo ûrotu ûyû ûkethîrwa ûrî ûira wa kûregana namue na ûrîe mîîrî yenyu îthire takwa îvîvîtue na mwaki. Mwîigîrîte ûtonga mîthenyarî îno ya mûthiia.

Kûguû 20:15

Na mûndû wa wonthe ûrîa rîîtwa rîake rîtaarî rîandîke îvukuurî rîa mwoyo nîwaikirue îriarî rîa mwaki.

1Sam 2:25

Angîthîrwa mûndû nwa avîtîrie mûndû ûrîa wîngî, Ngai nîke ûngîmeguithania. Nwatî mûndû angîvîtîria Ngai-Mûnene, nî ûrîkû vi ûngîmûthaithanîrîra?” Nao nîmaaregire kûthikîrîria ûrîa meeragwa nî îthe, nîûndû Ngai-Mûnene nîwatuîte atî nîakûmaûraga.