2Tim 3:11 - ÎVUKU RÎA ÛVORO MWARO

¹¹ Wana nîûrûmîrîrîte kûnyarirwa gwakwa, na mathîna makwa. We nîwîcî ûrîa naanyaririrwe rîrîa naarî Antiokia, Ikonia, Lusitera, na ngîûmîrîria! Nwatî Mwathani nîwandethûrire kuuma mînyamaarorî îo yonthe.

2Tim 3:11 ပူးပေါင်းရင်းမြစ်များ

Kîam 48:16

Mûraika ûrîa wamvonokirie kuuma mîtinorî yonthe arotûrathima! Rîîtwa rîakwa na marîîtwa ma methe makwa Iburahimu na Isaka marotûûrua na njîra ya twana tûtû! Twana tûtû tûrogîa na ciana nyîngî na njiarwa nyîngî!”

2Sam 22:1

Rîrîa Ngai-Mûnene aavonokirie Daudi kuuma kûrî Saûlo na nthû irîa ciîngî ciake cionthe Daudi nîwainîre Ngai-Mûnene rwîmbo rûrû:

2Sam 22:49

Nîke Ngai ûrîa ûmvonokagia kuuma kûrî nthû ciakwa. Ngai-Mûnene, we nîûtûmaga mvoote nthû ciakwa, na ûkangitîra kuuma kûrî andû arîa aganu.

Thaburi 34:19

Andû arîa athingu matî mathîna meengî mûno, nwatî Ngai-Mûnene nîamavonokagia kuuma kûrî mo monthe.

Thaburi 37:40

Ngai-Mûnene nîamatethagia na akamavonokia; nîamavonokagia kuuma kûrî andû arîa aganu, nîûndû nîmathiîcaga kûrî ke amagitîre.

Thaburi 91:14

Ngai augîte atîrî, “Nîngaavonokia mûndû wa wonthe ûmendete; nîngaagitîra mûndû ûrîa ûmbicî.

Isaia 41:10

Tiga gwîtigîra, nîûndû nîrî vamwe nawe, ndûkegue guoya, nîûndû nînie Ngai waku! Nîngaakwongerera vinya na ngûtethie, nîngaagûtirîrîra na njara yakwa ya ûthingu.

Isaia 41:14

Ngai-Mûnene arauga atîrî, “We Jakovu, kagunyû gaka, tiga gwîtigîra, mue andû a Isiraeli, nîngaamûtethia, nie nînie mûvonokia wenyu Ûrîa Mûtheru wa Isiraeli.

Isaia 43:2

Rîrîa mûkûvîtûkîrîra manjîrî ngethagîrwa nîrî vamwe namue; na mûkîvîtûkîrîra nyûnjîrî itikaamûkîria vinya. Rîrîa mûkavîtûkîrîra mwakirî mûtikaavîa, na rûrîrîmbî rûtikaamûvîvia.

Jeremia 1:19

Nîmakaarûa nawe nwatî matigakûvoota, nîûndû ngethagîrwa nîrî vamwe nawe nîguo ngûvonokagie. Ûguo nîguo Ngai-Mûnene arauga.”

Danieli 6:27

Nîke ûvonokagia andû na akamatethûra marî thînarî, aringaga ciama na akonania morirû, îgûrû wana gûkû nthî. Nîavonoketie Danieli kuuma ithuurî cia mînyambû.”

Ciîko 13:14

Nao nîmaavîtûkire Periga na makîthiî magîkinya Antiokia vûrûrirî wa Pisidia. Na mûthenya wa thavatû nîmaathiîre îvoerorî na magîkara nthî kuo.

Ciîko 13:45

Na rîrîa Ayahudi moonire kîrîndî, nîmecûrirwe nî wîru, magîkararia maûndû marîa Paûlo aaragia, na makîmûruma.

Ciîko 14:8

Nakuo Listra nîkwarî na mûndû ûmwe waciarîtwe arî kîonje na ûtaarî anavota kûthiî na magûrû.

Ciîko 20:19

Ayahudi nîmaatûmire nthînîke mûno nîûndû wa mîvango yao mîcûku. Nwatî mue nîmwicî atî nie nînatungatagîra Mwathani nîrî na wînyivia mwîngî na mavinda meengî ngetûrûraga methori.

Ciîko 23:10

Nacio ngarari nîciengîvire mûno nginya mûnene wa mbûtû ya athigari akîambîrîria kwîgua guoya akîona takwa Paûlo agûtembûranganua tûcunjî nî Ayahudi. Kwoguo mûnene ûcio wa mbûtû ya athigari nîwathire athigari ake akîmeera manyûrûrûke mathiî varîa Paûlo aarî, mamûrute vo na vinya na mamûvire kûrîa athigari maambîte magema.

Ciîko 26:17

Nie nîngûkûgitîra kuuma kûrî andû a Isiraeli na andû a ndûrîrî arîa ngûgûtûma ûthiî kûrî o.

Ciîko 26:22

Nwatî Ngai nîandethetie. Kwoguo nûngamîte ava ûmûnthî ngîrutaga ûira wakwa kûrî andû onthe, anini na anene. Maûndû marîa nîrauga nîmagwîkîka, nwamo arathi na Musa maaugire atî nîmagekîka namo nî:

Ciîko 9:16

Na nie mwene nîngûmwonia ûrîa ke akathînua nîûndû wakwa.”

Aroma 15:31

Voyani atî ngitîrwe kûrî andû arîa matetîkîtie arîa marî Judea, na mûvoe nîguo ûtungata wakwa kûu Jerusalemu wîtîkîrîke kûrî andû a Ngai.

2Akor 1:5

Wata ûrîa tûrî na îgai înene mînyamarorî ya Kristû, nwa ta guo kûvîtûkîra kûrî Kristû tûgaaga ûmîrîru mwîngî kuuma kûrî Ngai.

2Akor 1:7

Kwoguo kîîrîgîrîro gîetû kûrî mue gîtingîinaina. Tue nîtwîcî atî wata ûrîa mûgwatanagîra natue mathînarî metû nwataguo mûgwatanagîra natue wana ûmîrîru ûrîa twamûkagîra.

2Akor 12:10

Nie nîmbîganîtwe nî gûtura vinya, kwonerwa, mathîna, kûnyarirwa na kûnyamarua nîûndû wa Kristû. Nîûndû rîrîa ngwîgua ndarî na vinya, nîrîo mbîthagîrwa nîrî na vinya makîria.

2Tim 4:7

Nîndûîte mbaara mbaro, nîndîkîtie îvenya na mbîthîrîtwe menyererete wîtîkio ûrîa nthomithagia.

2Pet 2:9

Kwoguo Mwathani nîwîcî kûvonokia andû arîa marî na ûngai kuuma mageriorî na kwiga arîa aganu makîverithagua nginya rîrîa mûthenya wa îtuîro ûgaakinya.