2Tim 1:7 - ÎVUKU RÎA ÛVORO MWARO

⁷ Nîûndû Roho ûrîa Ngai atûvete ndûtûmaga tûgîe na guoya, vandû va ûguo Roho wake atûmaga tûgîe na ûvoti, wendo na ûvoti wa kwînyitia maûndûrî.

2Tim 1:7 ပူးပေါင်းရင်းမြစ်များ

Thaburi 119:80

Tûma ngoro yakwa yathîkagîre mawatho maku, nîguo ndigaconorithue.

Nthi 2:7

Ngai-Mûnene nîagaagîra andû arîa athingu mûthithû wa ûûgî; nîagitagîra arîa marî mîthiîre mîkinyanîru.

Nthi 8:14

Nîrî ûtaaro na nîrî ûûgî mwîngî, nîrî ûtaûku na vinya.

Isaia 11:2

Nîagecûrwa nî Roho wa Ngai-Mûnene, roho wa ûûgî na ûtaûku; roho wa ûtaarani na vinya, roho wa ûmenyo na gwîtigîra Ngai-Mûnene.

Mika 3:8

Nwatî nie, Ngai-Mûnene nîamvete vinya, na Roho wake nîamvotithîtie kûmenya ûma, na nîamvete kîvooto na ûvoti wa kwîra andû a Isiraeli na a Juda mevia mao.

Zakaria 4:6

Nake mûraika ûcio nîwambîrire nginyîrie Zerubabeli ndûmîrîri îno yumîte kûrî Ngai-Mûnene mwene vinya wonthe nîmwîre atîrî, “Ndûkaavootana nîûndû wa vinya kana ûvoti waku, nwatî ûkaavotithua nî Roho wakwa.”

Luka 10:19

Rîu nie nînamûva ûvoti wa kûthiî mûgîkinyangaga ciîmvuva wana tûng'aurû, na ûvoti wa kûvoota maavinya monthe ma ngoma na gûtirî kîndû gîkaamwîka naaî.

Luka 15:17

Na mûthiiarî, mwanake ûcio nîwakirire na agîîciria atîrî, ‘Andû onthe arîa marutaga wîra kwa vava marîcaga, makavaa na magatigaria, nwatî nie nîrakuîra gûkû nî yûra.

Luka 24:49

Nie nînie ngaamûtûmîra kîrîa Ngai Vava aamwîrîîre. Nwatî nwa nginya mwîkare gûkû îtûûrarî rîa Jerusalemu mwetererete nginya rîrîa mûkaagîa na vinya wa Ngai kuuma îgûrû.”

Luka 8:35

Nao andû nîmaaumire mîciî kwao na makîthiî kwîyonera maûndû marîa meekîkîte. Na rîrîa andû acio maakinyire kûrî Jesû nî meegwire guoya nîûndû nîmeethîrîrie mûndû ûcio warutîtwe ngoma ekarîte nthî magûrûrî ma Jesû, ekîrîte nguo na arî na kîongo Kîamro.

Johana 14:27

“Thayû nîguo nie nîramûtigîra; nî thayû wakwa nîramûva. Nie ndiramûva thayû wîkariî ta ûrîa ûvecanagwa nî nthî. Tigani gûtangîka ngororî cienyu kana mûgîe na guoya.

Ciîko 1:8

Nwatî rîrîa Roho Mûtheru agaaûka kûrî mue, nî mûkaagîa na vinya na mûtuîke aira akwa Jerusalemu, Judea kuonthe na Samaria wana mîthiia yonthe ya nthî.”

Ciîko 10:38

Mue nîmwîcî ûvoro wîgiî Jesû Mûnazarethi. Ngai Nîwamûvere Roho Mûtheru na akîmûva vinya. Jesû nîwathiîcaga kûndû kuonthe agîkaga waro na akîvonagia arîa onthe maanyitîtwe nî Ngoma. Jesû eekaga ûguo nîûndû Ngai aarî vamwe nake.

Ciîko 20:24

Nwatî ndionaga mwoyo wakwa ûrî na vata wana vanini. Ûndû ûrîa ûrî na vata nî kûrîkia wîra na gûkinyîra mûthiia wa ûtungati ûrîa Mwathani Jesû aamveere ndute, naguo nî kûvecana Ûvoro Mwaro wîgiî wega wa Ngai.

Ciîko 21:13

Nwatî nîwatûcokerie atîrî, “Mue mûreka atîa? Mûrarîra methori na mûkambûraga ngoro nîkî? Nie nînîvarîrîtie kwovwa njeera wana gûkua nîrî kûu Jerusalemu nîûndû wa rîîtwa rîa Mwathani Jesû.”

Ciîko 26:11

Na kwa mavinda meengî nînatûmire maverithue marî mavoerorî na nînaageririe gûtûma marega wîtîkio wao. Na nîûndû wao nînaarakarire mûno nginya ngîthiî kûmarûmîrîria matûûrarî mageni nîguo nîmanyarire.

Ciîko 26:25

Nwatî Paûlo nîwamwîrire atîrî, “Mûgathe Fesito, ndirî na ngoma. Nie nîraria ûma ûrîa guo.

Ciîko 6:8

Stefano ecûrîtwe nî vinya na wega wa Ngai, nîwaringire ciama nene na agîka maûndû meengî ma magegania gatagatîrî ka andû.

Ciîko 9:22

Nwatî Saûlo nîwavunjirie na vinya mûno. Nake nîwonanagia nama atî Jesû nîke Mesaya, ûndû nginya Ayahudi arîa maatûûraga Damesiki matangîavotire gûkararania na Saûlo.

Aroma 5:5

Twagîa na kîîrîgîrîro tûtikucaga ngoro nîûndû Ngai nîatwîkîrîte wendo ngororî cietû na njîra ya Roho Mûtheru. Roho ûcio nî kîveo gîetû kuuma kûrî Ngai.

Aroma 8:15

Roho ûrîa Ngai amûveete tî wa gûtûma mûtuîke ngombo na tî wa gûtûma mwîtigîre. Vandû va ûguo Roho ûcio amûtucaga ciana cia Ngai. Roho nîke ûtûvecaga vinya wa gûkaîra Ngai tûkiugaga, “Aba! Vava.”

1Akor 2:4

Ngîthomithia na ngîvunjia ndiatûmîra ciugo irî na ûûgî wa kîûmûndû irîa igucagîrîria andû, nwatî natûmîre ciugo cionanagia vinya ûrîa ûvecanagwa nî Roho wa Ngai.

Agal 5:22

Nwatî Roho ûciaraga wendani, gîkeno, thayû, gûkirîrîria, gwîkana waro, gûtugana, kwîvokeka,

Akol 1:8

Nîatwîrîte ûvoro wîgiî wendani ûrîa Roho amûveete.

Ahib 2:15

Na njîra îo nîwovorire arîa onthe maatûûraga marî ngombo ûtûûrorî wao wonthe nîûndû wa kwîgua guoya wa gîkuû.

1Pet 1:22

Rîu nîûndû nîmûtheretie mîoyo yenyu na njîra ya kwathîkîra ûma, nîmûvotete kwenda na ma aarî na ariû a îthe wetû. Kwoguo mûndû nî endage mûndû ûrîa wîngî na ngoro yake yonthe.

1Joh 4:18

Varîa varî na wendani vatirî guoya. Wendani ûrîa mûkinyanîru nîûrutûrûraga guoya wonthe. Kwoguo mûndû ûrîa wîtigagîra ndethagîrwa arî na wendo mûkinyanîru, nîûndû guoya wîthagîrwa ûvuana na îvera.