2Maû 29:32 - ÎVUKU RÎA ÛVORO MWARO

³² Nyamû cia matega ma kûvîvua ma Ngai-Mûnene irîa ciarutirwe ciarî: ndegwa mîrongo mûgwanja (70), ndûrûme îgana rîmwe (100) na tûgondu magana maîrî (200). Icio cionthe ciarî cia matega ma kûvîvua kûrî Ngai-Mûnene.

2Maû 29:32 ပူးပေါင်းရင်းမြစ်များ

1Atha 3:4

Vîndî îmwe mûthamaki nîwathiîre Gibeoni kûrutîra magongoona kuo, nîûndû kûu nîkuo kwarî na îgweta mûno kwa magongoona. Mbererî, Solomoni nîwarutîrîte matega ma kûvîvua metharî îo ya kîgongoona maita meengî.

1Atha 8:63

Solomoni nîwarutire ndegwa ngiri mîrongo îîrî na igîrî na ng'ondu ngiri îgana rîmwe rîa mîrongo îîrî irî matega ma thayû. Ûguo nîguo mûthamaki vamwe na andû onthe a Isiraeli maamûrire hekarû.

1Maû 29:21

Mûthenya ûcio warûmîrîrîte nîmaarutîre Ngai-Mûnene magongoona. Nîmaarutîre Ngai-Mûnene matega ma kûvîvua ma ndegwa ngiri îmwe (1,000), ndûrûme ngiri îmwe, (1,000) na tûgondu ngiri îmwe (1,000), na matega ma ndivei, na matega mengî nîûndû wa andû onthe a Isiraeli.

2Maû 29:31

Mûthamaki Hezekia nîwacokire akiuga atîrî, “Rîu nîmwetheria mbere ya Ngai-Mûnene, kuvîvîriani hekarû mûrete magongoona na matega ma gûcokia ngatho kûrî Ngai-Mûnene.” Andû onthe nîmaavirire magongoona na matega ma gûcokia ngatho, na engî nîmaaretire matega ma kûvîvua na njîra ya kwîyendera.

2Maû 29:33

Nyamû cia kûrîthua irîa ciamûrirwe irî cia matega ciarî: ndegwa magana matandatû (600) na ng'ondu ngiri ithatû (3,000).

2Maû 29:35

Îgûrû rîa matega meengî ma kûvîvua, kwarî na mathunya ma matega ma thayû na ndivei îrîa yarutanagîrua na matega ma kûvîvua. Kwoguo ûtungata hekarûrî nîwambîrîrie rîngî.

2Maû 30:15

Na mûthenya wa îkûmi na îna wa mweri wa kaîrî, nîmaaûragire ng'ondu ya pasaka. Athînjîri-Ngai na Alawi nîmegwire nthoni mûno na makîîtheria. Nîmaacokire makîrete matega ma kûvîvua kûrî Ngai-Mûnene.

Ezira 6:17

Nîmaarutire ndegwa îgana rîmwe, ng'ondu magana maîrî, na tûtûrûme magana mana nîûndû wa îgongoona rîa kwamûra hekarû. Nîmaacokire makîruta nthenge îkûmi na igîrî nîûndû wa mevia ma andû a Isiraeli, wa mûvîrîga warutaga nthenge îmwe.

Alawi 1:1

Ngai-Mûnene arî îgemarî nîwetire Musa na akîmwîra atîrî,

Alawi 1:3

Ethîrwa akîruta ng'ombe kuuma ndîthiarî yake îrî îtega rîa kûvîvua, akaaruta ndegwa îtarî na wonje wanarî ûrîkû. Akaamîruta arî mûromorî wa îgema rîa Ngai-Mûnene nîguo Ngai-Mûnene amwîtîkîre.