Nie nîmûthuurîte nîguo athe ciana ciake na njiarwa ciake imbathîkagîre, na ciîkage maûndû ma ûthingu na ma kîvooto. Ethîrwa nîmagwîka ûguo nîngaavingia maûndû monthe marîa nerîre Iburahimu.”
Nîwarutire metha cia kîgongoona irîa ciarî ng'eni kûu vûrûrirî na kûndû kûrîa gûtûgîru kwagoocagîrwa ngai cia mîvuanano. Nîwaunangire itugî cia mathiga na akiunanga mîvuanano ya Ashera, ngai ya mûndûmûka.
Nîwacûkangirie kûndû kûrîa kwagoocagîrwa ngai cia mîvuanano na akîomomora metha cia magongoona cia kûvîvîria ûbani kuuma matûûrarî monthe ma Juda. Kwoguo kwarî na thayû vûrûri wa Juda vîndî ya ûthamaki wa Asa.
Nîmaathiîre na ndegwa mûgwanja, ndûrûme mûgwanja, tûgondu mûgwanja na nthenge mûgwanja cia matega ma kûtheria mevia ma andû a nyomba ya mûthamaki, andû a Juda na hekarû. Mûthamaki Hezekia nîwathire athînjîri-Ngai, njiarwa cia Aroni makarutîre matega mau metharî ya kîgongoona ya Ngai-Mûnene.
Mûthamaki Hezekia nîwacokire akîathana atî kûrutwe magongoona ma kûvîvua metharî ya kîgongoona. Rîrîa matega mau maambîrîrie kûrutwa, andû nîmaambîrîrie kwinîra Ngai-Mûnene, makîvuvaga tûrumbeta na indo cionthe cia nyîmbo cia Daudi mûthamaki wa Isiraeli.
Nîwacokire agîtuma metha ya kîgongoona ya Ngai-Mûnene na akîrutîra magongoona ma thayû na ma gûcokia ngatho îgûrû rîayo. Nîwacokire akîatha andû onthe a Juda magooce Ngai-Mûnene, Ngai wa Isiraeli.
Nînacokire ngîvecana watho atî nyomba icio ithondekerwe îgongoona rîa kûitheria, na indo cia gûtûmîrwa nyombarî ya Ngai, na matega ma irio cia mûgûnda, na ûbani icokue.
Ethîrwa mûtikwenda gûtungatîra Ngai-Mûnene, thuurani ûmûnthî ûrîa mûgatungatagîra. Thuurani kana nîkwa mûgatungatagîra ngai irîa methe menyu ma tene maatungataga marî Mesopotamia kana ngai cia Amori. Nwatî nie na andû a nyomba yakwa tûgaatungatagîra Ngai-Mûnene.”
Nie nîmbîrîte Eli atî, nîngaaverithia andû a mûciî wake tene na tene nîûndû wa mîtugo mîcûku ya kûnuma îrîa îthîrîtwe îrî na anake ake. Eli ke mwene nîwaicî atî avîcî ake nîmeekaga maûndû macûku, nwatî ndaamakaania.