2Maû 12:13 - ÎVUKU RÎA ÛVORO MWARO

¹³ Rehoboamu nîwatuîkire mûthamaki wekindîrîtie Jerusalemu. Aatuîkire mûthamaki arî na ûkûrû wa mîaka mîrongo îna na ûmwe (41). Aathamakire îvinda rîa mîaka îkûmi na mûgwanja (17) arî Jerusalemu, îtûûra rîrîa Ngai-Mûnene aathuurîte gatagatîrî ka mîvîrîga yonthe vûrûrirî wa Isiraeli nîguo agoocagîrwe kuo. Ng'ina wa Rehoboamu eetagwa Naama wa kuuma vûrûrirî wa Aamoni.

2Maû 12:13 ပူးပေါင်းရင်းမြစ်များ

1Atha 11:1

Mûthamaki Solomoni nîwendire aka eengî a kuuma mavûrûrirî mageni. Nîwendire mwarî wa mûthamaki wa Misiri na akîenda aka engî kuuma Hiti, Moabu, Aamoni, Edomu na Sidoni.

1Atha 11:36

nwatî nîngaatigîra mûvîcî ûcio wa Solomoni mûvîrîga ûmwe nîguo vîndî cionthe ngethagîrwa nîrî na mûndû wa njiarwa cia ndungata yakwa Daudi akîathana arî Jerusalemu, îtûûra rînene rîrîa nthuurîte nîguo ngoocagîrwe kuo.

1Atha 14:21

Rehoboamu mûvîcî wa Solomoni aarî na ûkûrû wa mîaka mîrongo îna na ûmwe (41) rîrîa aatuîkire mûthamaki wa Juda, na aathanire îvinda rîa mîaka îkûmi na mûgwanja (17) arî Jerusalemu. Jerusalemu nîrîo îtûûra rînene rîrîa Ngai-Mûnene aathuurîte kuuma vûrûrirî wonthe wa Isiraeli nîguo agoocagîrwe kuo. Ng'ina wa Rehoboamu eetagwa Naama wa kuuma Aamoni.

2Maû 12:1

Rehoboamu arîkia kwîvanda waro na ûthamaki wake ûkîgîa na vinya, ke vamwe na andû onthe a Isiraeli arîa aarî nao nîmaatiganîrie watho wa Ngai-Mûnene.

2Maû 13:7

Vuvarî nîwagomanirie varî ke andû aganu na mataarî kîene na makîringîrîria Rehoboamu mûvîcî wa Solomoni eke ûrîa meendaga rîrîa Rehoboamu aarî mûndû mwîthî na atangîavotire kûmetirîria.

2Maû 6:5

‘Kuuma rîrîa naarutire andû akwa vûrûrirî wa Misiri, ndianathuura îtûûra wanarî rîmwe vûrûrirî wonthe wa Isiraeli kûrîa kûngîtumwa hekarû atî nîguo ngoocagîrwe kuo, kana nthuura mûndû wanarî ûmwe wa gûtongoria andû akwa, Aisiraeli.

2Maû 6:6

Nwatî rîu nînthuurîte îtûûra rîa Jerusalemu rîtuîke vandû varîa ngaagoocagîrwa na nînthuurîte Daudi atuîke mûtongoria wa andû akwa, Aisiraeli.’ ”

Nehemia 13:1

Mûthenya ûcio andû nîmaathomerwe na mûgambo mûnene Watho kuuma îvukuurî rîa Musa. Wathorî ûcio nîmaathomire vandû varîa vaaugîte atî gûtirî vîndî wana îrîkû andû a Aamoni kana Amoabu mageetîkîrua gûtonya kîûnganorî Kîam andû a Ngai.

Nehemia 13:26

Nînaugire atîrî, “Aka ageni nîo maatûmire mûthamaki Solomoni evia. Gatagatî ka ndûrîrî irîa ciîngî gûtirî mûthamaki wekariî take. Nîwendetwe nî Ngai wake na Ngai nîwamûtuire mûthamaki wa Isiraeli kuonthe. Kûnarî ûguo aka acio ageni nîmaatûmire evia.

Ntha 20:24

Ndumîrani metha ya kîgongoona na mûthetu. Na îgûrû rîayo mûrutîre matega ma kûvîvua na ma thayû, ma ng'ondu na ndegwa cienyu. Vandû vonthe varîa ngaamûra mûngoocagîre vo, nîngaaûkaga kûrî mue na nîmûrathime.

Ezek 48:35

Ûraca wa rûthingo rwa îtûûra rîu mîena yonthe îna rûkethîrwa rûrî rwa mita ngiri kenda (9,000). Îtûûra rîu kuuma vîndî îo rîgetagwa, “Ngai-Mûnene arî ava.”

Gûco 12:11

Ngai-Mûnene Ngai wenyu nîakaathuura vandû varîa akaagoocagîrwa. Vau nîvo mûkaamûviragîra kîrîa kîonthe nîmwathîte ta: matega menyu ma kûvîvua, magongoona, icunjî cia îkûmi, matega ma kwîyendera, na indo irîa mwîranîrîte kûrî Ngai-Mûnene.

Gûco 12:5

Ngai-Mûnene Ngai wenyu nîakeethuurîra vandû va kûgoocagîrwa gatagatîrî ka mîvîrîga yenyu yonthe. Vau nîvo mûkaathiîcaga kûmûgoocera.

Gûco 23:3

“Gûtirî mûndû wa kuuma vûrûrirî wa Aamoni kana wa Moabu, kana njiarwa ciao cionthe nginya rûciaro rwa îkûmi ûgeetîkîrua gûtonya kîûnganorî Kîam andû a Ngai-Mûnene.