2Ath 2:3 - ÎVUKU RÎA ÛVORO MWARO

³ Mûtikaanaveenue nî mûndû na ûndû wana ûrîkû. Nîûndû Mûthenya wa Mwathani ndûgaakinya mbere ya îvinda rîa andû kûregana na Ngai rîkinye na mûndû mwaganu eyonanie, ûrîa Ngai agaacûkangia îcuarî.

2Ath 2:3 ပူးပေါင်းရင်းမြစ်များ

Danieli 11:36

“Mûthamaki wa Sîria nîageka kwenda gwake. Ke nîakenenevia gûkîra ngai cionthe na arume Ngai Ûrîa Mûnene gûkîra Ngai cionthe. Ageka ûguo nginya rîrîa Ngai akaamûverithia; nîûndû ûrîa Ngai avangîte gwîka nwanginya ûkaavinga.

Danieli 7:25

Ke nîakaaria maûndû macûku megiî Ngai Ûrîa Mûnene na avinyîrîrie andû a Ngai. Nîakaagarûra mawatho mao na irugo ciao, na andû acio nîmakaathwa nîke îvinda rîa mîaka îthatû na nuthu.

Danieli 8:25

Nîakaavootanaga maûndûrî marîa ageekaga nîûndû wa wara wake. Nîakaatharîkîra andû engî wana atamamenyithîtie na aregane na mûthamaki ûrîa mûnene gûkîra onthe; nwatî nîagaacûkangua nî vinya ûtarî wa mûndû.

Johana 17:12

Rîrîa naarî vamwe nao, nînaamamenyererete na vinya wa rîîtwa rîaku rîrîa wamvere. Nînaamagitîre na gûtirî mûndû wana ûmwe gatagatîrî kao waûrire tiga ûrîa warî wa kûûra nîguo mandîko matheru mavingue.

1Akor 6:9

Mue nîmwicî atî andû arîa aganu matikaagaîrwa ûthamaki wa Ngai. Mûtikeveenie; andû arîa mavûûraga ûmaraa kana mavoyaga mîvuanano kana matharagia, kana arûme arîa mamenyanaga kîîmwîrî na arûme arîa engî,

Aefeso 5:6

Mûtigetîkîre mûndû wana ûrîkû amûveenererie na ciugo ntheri, nîûndû mîtugo ta îo nîyo îtûmaga Ngai arakarue nî andû arîa matamwathîkagîra.

1Joh 2:18

Ciana ciakwa, rîîrî nîrîo îvinda rîa mûthiia! Mue nîmwîguîte atî nthû ya Kristû nîgûka; na rîu nîkûgîte na nthû nyîngî cia Kristû. Kwoguo nîtûmenyete atî rîîrî nîrîo îvinda rîa mûthiia.

1Joh 4:3

Nwatî mûndû wa wonthe ûtaumbûraga Jesû ndarî na Roho ûrîa uumaga kûrî Ngai. Roho ûrîa arî naguo nî ûrîa uumaga kûrî nthû ya Kristû. Nîmwegwire atî nthû îo nîgûka, na rîu nî îrîkîtie gûkinya gûkû nthî.

Kûguû 17:11

Nayo nyamû îrîa yarî mwoyo nwatî rîu ndîrî mwoyo, nî mûthamaki wa kanana. Ke nî ûmwe wa arîa mûgwanja, nake nîakaathiî kûaragwa.

Kûguû 17:8

Nyamû îo vîndî îmwe yarî mwoyo, nwatî rîu ndîrî mwoyo. Nyamû îo nî îkunûkia yume îrimarî rîrîa rîtarî mûthiia îthiî îgacûkangue. Nîkûrî andû marî mwoyo na marîîtwa mao mataanandîkwa kuuma rîrîa nthî yambîrîrie kûmbwa. Andû acio onthe nîmakaamaka rîrîa makoona nyamû îo, nîûndû vîndî îmwe yarî mwoyo, na rîu ndîrî mwoyo, nwatî nîgaacoka yûke rîngî.