1Sam 26:19 - ÎVUKU RÎA ÛVORO MWARO

¹⁹ Mwathi wakwa, rîu thikîrîria ûrîa ndungata yaku îkuga. Ethîrwa nî Ngai-Mûnene ûtûmîte wende kûmbûraga, nînîmûrutîra îtega nîguo agarûre îtua rîake. Nwatî ethîrwa nî andû matûmîte, Ngai-Mûnene arotûma magwatwe nî kîrumi nîûndû nîmamîngatîte ngauma îgairî rîrîa Ngai-Mûnene aatûveere na makiuga atî, ‘Thiî ûgatungatîre ngai ng'eni.’

1Sam 26:19 ပူးပေါင်းရင်းမြစ်များ

Kîam 44:18

Juda nîwathiîre kûrî Josefu na akîmwîra atîrî, “Mwathi wakwa, nakûthaitha ûmbîtîkîrie mbarie nawe nie ndungata yaku, na ndûkarakare nîûndû wakwa. Nîmbicî we ûrî na ûvoti ta wa mûthamaki wa Misiri ke mwene.

Kîam 8:21

Ngai-Mûnene nîwegwire mûcingû mwaro ûkiuma îgongoonarî rîu, na akiuga atîrî ngororî yake, “Nie ndikaaruma nthî rîngî nîûndû wa ciîko cia mûndû, nîûndû meciria ma mûndû methagîrwa marî macûku kuuma ûninirî wake. Ndigaacoka kûthiria ciûmbe cionthe irîa itûûraga mwoyo ta ûrîa mbîkîte.

2Sam 14:16

Nîreciragia nîûkûnthikîrîria na ûmvonokie kuuma kûrî mûndû ûrîa ûrenda kûûraga mûvîcîwa vamwe nanie nîguo atûrute vûrûrirî ûrîa Ngai aaveere andû ake.

2Sam 16:10

Nwatî mûthamaki nîwerire Abishai na mûrwang'ina Joabu atîrî, “Ûcio tî wîra wenyu. Ethîrwa aranuma nîûndû nî Ngai-Mûnene ûmwîrîte eke guo, nîûrîkû ûrî na kîvooto gîa kûmûria areka ûguo nîkî?”

2Sam 16:11

Daudi nîwerire Abishai na ndungata ciake cionthe atîrî, “Ethîrwa mûvîcîwa ke mwene nîarenda kûmbûraga, kinthî Mûbenjamini ûyû ndangîmbîka maûndû macûku makîria? Ngai-Mûnene nîke ûmwîrîte arumane, kwoguo tiganani nake arumane.

2Sam 20:19

Tûrî andû a îtûûra înene gûkû Isiraeli. Tûrî andû arîa mendete thayû na evokeku mûno gûkû Isiraeli. Ûrenda gûcûkangia îtûûra nîkî? Nîndûî kîratûma wenda gûcûkangia kîrîa Ngai-Mûnene ethuurîrîte?”

2Sam 21:3

Kwoguo Daudi nîwetire andû acio a Gibeoni na akîmaûria atîrî, “Mûrenda nîmwîkîre atîa? Nîrenda kûmûrîvîrîria nîûndû wa maûndû macûku marîa mwekirwe nî Saûlo nîguo mûrathime andû a Ngai-Mûnene.”

2Sam 24:1

Ngai-Mûnene nîwarakarirue nî Aisiraeli rîngî, na nîwerire Daudi athiî kûrî o nîguo marakare na akîmwîra atîrî, “Thiî na ûtare andû a Isiraeli na a Juda.”

1Atha 22:22

Nake Ngai-Mûnene nîwamûririe atîrî, ‘ûkaamûveenereria atîa?’ Naguo roho nîwacokirie atîrî, ‘Nînthiî na ndûme arathi a Ahabu onthe maveenanie.’ Ngai-Mûnene nîwamwîrire atîrî, ‘Thiî na ûmûveenererie. Nîûkûvootana!’ ”

1Maû 21:1

Caitani nîwavangire kûretera andû a Isiraeli thîna na nîwatûmire Daudi atare andû a Isiraeli.

Thaburi 120:5

Kaî nîrî na thîna-î atî ndûûraga ta mûgeni vûrûrirî wa Mesheki, ta mûgeni magemarî ma Kedari.

Thaburi 20:4

Arokûva kîrîa wîriragîria na atûme mîvango yaku yonthe îrîa wendaga îvinge.

Nthi 30:10

Ndûkarie maûndû macûku megiî ndungata kûrî mwathi wayo, nîguo ndungata ndîgakûrume na wîthîrwe ûrî na mavîtia.

Isaia 60:5

Nîûkoona ûguo, na wîcûrwe nî gîkeno, ngoro yaku nîgaacanjamûka nî gûkena, nîûndû ûtonga wa ndûrîrî nîûkaaretwe kûrî we, ûtonga wa îriarî nîûkaaretwe kûrî we.

Alawi 26:31

Nîngaacûkangia matûûra menyu viû, njûkangie viû kûndû kûrîa mûgoocagîra na ndikaamûkîra magongoona menyu.

Ndari 36:7

nîguo îgai rîa andû a Isiraeli rîtikaume kwao, rîthiî mûvîrîgarî wîngî. Mûisiraeli wa wonthe agekaraga kûrîa îgai rîa mûvîrîga wake rîrî.

Ndari 36:9

Kwoguo gûtirî îgai rîkaauma mûvîrîgarî ûmwe rîthiî ûrîa wîngî. Wa mûvîrîga wa wonthe wa Isiraeli ûgeekaraga kûrîa îgai rîaguo rîrî.”

Aroma 14:15

Ethîrwa irio irîa ûrîcaga nîitûmaga mûrwanyûkwe egue naaî, we ndûreka ciîko cia wendani. Ndûgetîkîre kîrîa ûkûrîa gîcûkie wîtîkio wa mûndû ûrîa Kristû aakwire nîûndû wake.

Agal 5:12

Nwa mende andû acio maramwagagia mathiî na mbere nginya mekarambe o ene.

Gûco 13:3

mûtikathikîrîrie mûrathi ûcio kana mûroti ûcio, nîûndû Ngai-Mûnene Ngai wenyu nîke ûramûgeria nîguo amenye kana nîmûmwendete na ngoro yonthe na mwoyo wonthe.

2Tim 4:14

Alekisanda mûturi wa cuuma nîwambîkire maûndû meengî macûku. Mwathani nî akaamûrîva kûringana na ciîko ciake.

1Sam 18:10

Naguo mûthenya ûcio wîngî roho mûcûku aumîte kûrî Ngai nîwatonyire kûrî Saûlo wa rîmwe arî gwake mûciî na agîkara ta mûndû wî na ngoma. Vîndî îo, Daudi nîkwa aavûûraga ngita wata ûrîa aamenyerete gwîka wa mûthenya wa mûthenya, nake Saûlo aanyitîte îtumû na njara yake.

1Sam 24:9

na akîîra Saûlo atîrî, “Nîndûî gîtûmaga ûthikîrîrie andû arîa makwîraga atî, Daudi nîarenda gûkûgera ngero?

1Sam 25:24

nîwaturumithirie ûthiû wake nthî akîmwîra atîrî, “Nîrakûthaitha mwathi wakwa, ûnthikîrîrie! Tiga ûûru ûcio ûnjokerere.

1Sam 27:1

Daudi nîweîrire na ngoro atîrî, “Mûthenya ûmwe Saûlo nîakambûraga. Kwoguo ûndû ûrîa mwaro makîria nîngîka nî kûra nthiî vûrûrirî wa Afilisiti. Vîndî îo Saûlo nîagaatiga kûnjaria kûu vûrûrirî wonthe wa Isiraeli, na ngethîrwa nîrî mûgitîre kuuma kûrî ke.”