1Sam 2:35 - ÎVUKU RÎA ÛVORO MWARO

³⁵ Na nie nîngethuurîra mûthînjîri-Ngai ûrîa ûkethagîrwa arî mwîvokeku kûrî nie. Ke nîke ûgeekaga maûndû monthe marîa ngaamwîraga kuuma ngororî yakwa wana meciriarî makwa. Nie nîngaatûma agîe na njiarwa, na vingo cionthe nîigaatungatagîra mûthamaki ûrîa nie nthuurîte.

1Sam 2:35 ပူးပေါင်းရင်းမြစ်များ

2Sam 7:11

Kuuma rîrîa nathuurîre andû akwa a Isiraeli atongoria na magîtonya vûrûrirî ûyû, matûîre matharîkagîrwa nî nthû, nwatî ûndû ûyû ndûgeekîka rîngî. Nîrakwîrîra atî, nîngaakûgitagîra kuuma kûrî nthû ciaku cionthe na ngûve njiarwa.

2Sam 7:27

Ngai-Mûnene mwene vinya wonthe, Ngai wa Isiraeli! Ndingîtigîra ngîkûvoya îvoya rîîrî, nîûndû nîûnguûrîrîtie maûndû mama monthe nie ndungata yaku, na nîûmbîrîte atî nîûgaatûma njiarwa ciakwa ituîke athamaki.

1Atha 1:45

na Zadoku mûthînjîri-Ngai marî na Nathani mûrathi, nîmamwîtîrîrie maguta nîguo atuîke mûthamaki marî Gihoni. Nîmacokire mathiî îtûûrarî makiugagîrîria nîûndû wa gûkena, nao andû a îtûûra nîmaranegena. Rîu nîrîo înegene rîrîa wegua.

1Atha 1:8

Nwatî Zadoku mûthînjîri-Ngai, Benaia mûvîcî wa Jehoiada, Nathani mûrathi, Shimei, Rei na arûme arîa maagitagîra Daudi matiarûmîrîra Adonija.

1Atha 11:38

Ethîrwa ûkathîkagîra maûndû monthe marîa ngwathîte, ûgîkaga maûndû marîa maro, na wathîkagîre irîra cia mawatho makwa, ûkîvingagia maathani makwa wata ûrîa ndungata yakwa Daudi eekire, ngethagîrwa vîndî cionthe nîrî vamwe nawe. Nîngaagûtua mûthamaki wa Isiraeli na ndûme njiarwa ciaku itûûre ciathanaga vuva waku, wata ûrîa nekire Daudi.

1Atha 2:35

Mûthamaki nîwatuire Benaia, mûvîcî wa Jehoiada mûnene wa athigari a mbaara vandûrî va Joabu, agîcoka agîtua Zadoku mûthînjîri-Ngai vandûrî va Abiatharu.

1Maû 29:22

Kwoguo mûthenya ûcio andû nîmaarîre na makînyua makenete mûno marî mbere ya Ngai-Mûnene. Nîmaacokire magîtua Solomoni mûvîcî wa Daudi mûthamaki riita rîa kaîrî. Nîmeetîrîrie Solomoni maguta mbere ya Ngai-Mûnene makîmûtua mwathi wao na Zadoku agîtuîka mûthînjîri-Ngai.

Thaburi 18:50

Ngai nîavotithagia mûthamaki wake kûvootana, nî onanagia wendo ûtathiraga kûrî ûrîa athuurîte, kûrî Daudi na njiarwa ciake tene na tene.

Thaburi 2:2

Athamaki a nthî nîmevaragîria, nao atongoria a nthî makathiî ndundu nîguo maregane na Ngai-Mûnene na maregane na mûthamaki ûrîa Ngai-Mûnene athuurîte makiugaga atîrî,

Ntha 1:21

Nîûndû aka acio nîmeetigîrîte Ngai, Ngai nîwamarathimire na akîmava mîciî yao o ene.

Ezek 34:23

Nîngaaithuurîra mûrîthi ûmwe, na nîke Daudi ndungata yakwa na nîagaatuîka mûrîthi wacio. Nîakaairîthia waro na aimenyagîrîre.

Ndari 25:13

Finehasi na njiarwa ciake cionthe nîmatûûra marî athînjîri-Ngai nîûndû nîwatuîkire mwîvokeku akîrega kûgooca ngai ciîngî tiga nie. Ke nîwatûmire andû a Isiraeli moverwa mevia mao.

Ahib 2:17

Ûguo nî kuga atî nwanginya angîatuîkire ta aa mûrwang'ina na aa mwarwang'ina na njîra wa yonthe nîguo atuîke Mûthînjîri-Ngai ûrîa mûnene, mwîvokeku na ûrî ntha wîrarî wa Ngai nîguo atûme andû moverwe mevia mao.

1Sam 10:10

Rîrîa Saûlo marî na ndungata yake maakinyire Gibea, nîwatûngirwe nî gîkundi Kîam arathi. Naguo Roho wa Ngai ûgîûka îgûrû rîake na vinya wa rîmwe na na ûkîmûtongoria. Nake nîwambîrîrie kwina augîrîrîtie marî na arathi acio.

1Sam 10:9

Na rîrîa Saûlo aavûgûkire nîguo matigane na Samueli-rî, Ngai nîwagarûrire Saûlo. Namo maûndû monthe marîa Saûlo eerîtwe nî Samueli makîvinga mûthenya wa ûcio.

1Sam 12:3

Rîu nie nîrî ava. Ethîrwa kûrî na ûndû mûcûku naneka, nthitangani rîu tûrî mbere ya Ngai-Mûnene na mbere ya mûthamaki ûrîa ke eetîrîrie maguta. Nanaîa ng'ombe kana mvunda ya mûndû? Nanacuuna mûndû kîndû na njîra ya maveeni, kana ngakinyîrîria mûndû? Nanetîkîra gwoca îvaki kuuma kûrî mûndû wana ûrîkû? Ethîrwa naneka ûmwe wa maûndû mama, nie nîngûrîva.”

1Sam 16:13

Samueli nîwocire mûcuva ûrîa warî na maguta ma mîtamaiyû îrîa îciaraga matunda na agîtîrîria Daudi maguta aa mûrwang'ina makîonaga. Naguo roho wa Ngai-Mûnene nîwanyûrûrûkîre Daudi wa rîmwe na agîkara nake kuuma mûthenya ûcio. Nake Samueli nîwacokire Rama.

1Sam 2:36

Nake mûndû wa wonthe wa rûciaro rwaku ûrîa ûgaatigara nîakaathiî kûrî mûthînjîri-Ngai ûcio na akavoya mûthînjîri-Ngai ûcio mbeca kana irio na nîakaathaithanaga akiugaga etîkîrue atethagîrîrie athînjîri-Ngai, nîguo oonage kîndû gîa kûrîa.”

1Sam 25:28

Nîrakûthaitha mwathi wakwa ûnjovere nie ndungata yaku. Ngai-Mûnene nîgaagûtua mûthamaki wana njiarwa ciaku, nîûndû nîûmûrûagîrîra mbaararî, na we ndûkoona ûûru matukû monthe ma ûtûûro waku.

1Sam 3:1

Nake mwanake ûcio wetagwa Samueli nîwathiîre na mbere gûtungatîra Ngai-Mûnene akîonagîrîrua nî Eli. Vîndî îo ndûmîrîri ciumîte kûrî Ngai-Mûnene vamwe na cioneki itiethagîrwa irî nyîngî.

1Sam 7:9

Samueli nîwocire kagondu kanini gakîongaga na agîkaruta karî îtega rîa kûvîvua kûrî Ngai-Mûnene karî kagima. Nîwacokire akîvoera Aisiraeli kûrî Ngai-Mûnene, na Ngai-Mûnene agîcokia mavoya make.

1Sam 8:3

Nwatî anake acio a Samueli matiarûmîrîra maûndû marîa îthe eekaga; maacaragia ûtonga tu; kwoguo nîmeetagia mavaki na matiatucaga ciira na kîvooto.

1Sam 9:12

Nao erîtu acio nîmaacokirie, “Ii, arî kuo, arî vau mbere yenyu thiîcangani. Ke aukîte îtûûrarî wa rîu, nîûndû andû nîmaûkîte ûmûnthî kûruta îgongona kûndû kûrîa gûtûgîru.

1Sam 9:13

Mwatonya îtûûrarî wa rîo, nîmûkûmwona mbere ya athiî kûndû kûrîa gûtûgîru kûrîa, nîûndû andû matingîrîa irio atarî mûkinyu, nîûndû nwa nginya arathime îgongona. Nao acio engî metîtwe macoke marîe. Unûkiani wa rîu na nî mûkûmwona.”