1Sam 14:6 - ÎVUKU RÎA ÛVORO MWARO

⁶ Nake Jonathani nîwerire mwanake ûcio wamûkuuagîra indo ciake cia mbaara atîrî, “Ûka, tûthiî mûringo ûrîa wîngî kûrîa Afilisiti arîa matarî aruu marî. Ngai-Mûnene avota gûtûtethia; nîûndû gûtirî kîndû kîngîgiria Ngai-Mûnene atûtethie wana ethîrwa tûtirî eengî.”

1Sam 14:6 ပူးပေါင်းရင်းမြစ်များ

2Sam 1:20

Mûtikavecane ûvoro ûcio kûu Gathu, kana mûûvecana njîrarî cia Ashikeloni. Mûtigatûme erîtu a Afilisiti makena, mûtigatûme erîtu a andû arîa mataruaga makena.

2Sam 16:12

Ngai-Mûnene avota kwona mînyamaaro yakwa, na ambîtîrîrie irathimo nyîngî makîria ya irumi irîa arumanîte ûmûnthî.”

2Atha 19:4

Nwa kwîthîrwe atî, Ngai-Mûnene Ngai waku nîwegwire maûndû monthe ma kûthekerera Ngai ûrîa ûtûûraga mwoyo marîa mûthamaki wa Asîria aatûmîte ndungata yake. Ngai-Mûnene Ngai waku aroîgua irumi icio na averithie acio marumanîte. Kwoguo voerani andû arîa matigarîte.”

2Maû 14:10

Asa nîwathiîre nîguo makarûe na Zera. Nao oîrî nîmaavangire athigari ao mang'ethanîrîte Kîamndarî Kîam Zefatha vakuvî na Maresha.

2Maû 14:11

Asa nîwavoire Ngai-Mûnene, Ngai wake akiuga atîrî, “Ngai-Mûnene gûtirî wîngî wîkariî tawe ûngîvota gûtethia andû arîa matarî vinya makîrûa na arîa marî vinya. Ûûi, Ngai-Mûnene, Ngai wetû, tûtethie nîûndû nîwe twîvokete. Tûkîte kûrûa na athigari aya eengî ûguo rîîtwarî rîaku. Ngai-Mûnene, we wî Ngai wetû. Ndûgetîkîre mûndû akûvoote.”

Thaburi 135:6

Ûrîa wonthe Ngai-Mûnene endaga gwîka nîekaga, îgûrû wana nthî, mariarî wana kûrîa kuonthe kûriku mûno.

Jeremia 9:23

Ngai-Mûnene arauga atîrî, “Mûndû mûûgî ndakegathe na ûûgî wake, na andû njamba matikegathe nîûndû wa vinya wao, na itonga itikegathe na ûtonga wacio.

Jeremia 9:25

Ngai-Mûnene arauga atîrî, “Mîthenya nîgaakinya rîrîa ngaverithia andû onthe arîa maruîte mwîrî tu:

Jeremia 9:26

Misiri, Juda, Edomu, njiarwa cia Amoni, Moabu na andû onthe arîa matûûraga werûrî na menjaga njuîrî ciao igakuvîva mîena. Andû a ndûrîrî ino cionthe na andû onthe a Isiraeli tî aruu ngororî.”

Amosi 5:15

Thûrani maûndû macûku na mwende maûndû maro, na mûrûmagîrîre kîvooto magootirî. Nwa kwîthîrwa Ngai-Mûnene, Mwene vinya wonthe nwa akinyîrie njiarwa cia Josefu irîa itigarîte wega wake.

Zefania 2:3

Cokererani Ngai-Mûnene mue muonthe arîa avoreri, mue arîa mwîkaga ûrîa kwagîrîrîte, cariani ûthingu cariani wînyivia. Kwavoteka ûkethîrwa ûtarî vamwe na andû arîa makaverithua, mûthenya ûrîa Ngai-Mûnene akonania marakara make.

Zakaria 4:6

Nake mûraika ûcio nîwambîrire nginyîrie Zerubabeli ndûmîrîri îno yumîte kûrî Ngai-Mûnene mwene vinya wonthe nîmwîre atîrî, “Ndûkaavootana nîûndû wa vinya kana ûvoti waku, nwatî ûkaavotithua nî Roho wakwa.”

Ndari 10:32

Tûngîthiî nawe, nîtûkagaana nawe kîrîa kîonthe Ngai-Mûnene agaatûrathima nakîo.”

Ndari 31:4

Tûma arûme ngiri îmwe kuuma kûrî wa mûvîrîga wa andû a Isiraeli a kûthiî mbaararî.”

Mathaayo 19:26

Nake Jesû nîwamaroririe na akîmeera atîrî, “Ûndû ta ûyû ndûngîvoteka nî andû, nwatî maûndû monthe nîmavotekaga nî Ngai.”

Aroma 8:31

Nîtuga atîa îgûrû rîa maûndû mama? Ethîrwa Ngai arî mwena wetû, nû ûngîtûtuma ûthû?

Gûco 32:30

Nî atîa mûthigari ûmwe nthû angîvoota athigari ngiri îmwe a Isiraeli? Nî atîa athigari aîrî nthû mangîvoota athigari ngiri îkûmi a Isiraeli? Tiga nwa Îthiga rîao amendetie, Ngai-Mûnene amatiganîrîtie?

Afil 3:3

Tue nîtue twîthagîrwa tûruîte nama. Tûkumagia Ngai na njîra ya Roho wake na nîtûkenaga ûtûûrorî wetû tûrî ûrûmwe na Kristû na tûtiîvokaga maûndû marîa twîkaga mîîrî yetû.

Josh 14:12

Kwoguo ngaîra vûrûri ûyû ûrî irîma ûrîa Ngai-Mûnene aambîrîre mûthenya ûcio twamwindîre ûvoro. Mûthenya ûcio twamwîrire atî andû arîa metagwa Anaki maatûûraga matûûrarî manene na mairigîre. Ngai-Mûnene nî akûndethia na nie nîngûmengata maume kuo wata ûrîa ke aaugire.”

Atir 15:18

Samusoni nîwacokire akînyonda mûno, kwoguo nîwetire Ngai-Mûnene na akîmwîra atîrî, “Nîwe ûmvotithîtie kûvootana na ûvootani mûnene ûguo. Rîu nîkwa ûrenda ngue nî nyonda na nyitwe nî Afilisiti aya mataruaga?”

1Sam 14:5

Rûthingo rûmwe rwarî mwena wa rûgûrû rûroranîtie na Mikimashi, naruo rûu rwîngî rwarî mwena wa îveti rûroranîtie na Geba.

1Sam 14:7

Nake mwanake ûcio nîwacokerie Jonathani na akîmwîra atîrî, “Thiî na mbere gwîka ûndû wa wonthe ûrîa meciria maku marakwîra wîke; nie nîrî vamwe nawe.”

1Sam 17:26

Daudi nîwaûririe andû arîa maarî vakuvî nake atîrî, “Mûndû ûrîa ûkaaûraga Mûfilisiti ûyû na athengutîrie Isiraeli gîconoko gîkî-rî, akaavewa ndûî? Mûfilisiti ûyû ûtarî mûruu nîkwa arî ûrîkû ke atî nîguo anyararithie athigari a Ngai ûrîa ûtûûraga mwoyo?”

1Sam 17:36

Nîmbûragîte mînyambû na ngatûnyi, na ûguo nwaguo ngwîka Mûfilisiti ûyû ûtarî mûruu ûrîa ûnyararithîtie athigari a Ngai ûrîa ûtûûraga mwoyo.

1Sam 17:46

Ûmûnthî Ngai-Mûnene nîakûmva we, ngûvoote na ngûnuke kîongo na njoke mve iconi na nyamû cia kîthaka ciimba cia athigari a Afilisiti irîe, nîguo andû a nthî mamenye atî Isiraeli kwîthagîrwa kûrî na Ngai.

1Sam 17:47

Nao andû aya onthe marî ava nîmakûmenya atî Ngai-Mûnene ndavonokanagia na rûviû rwa njûra na îtumû. Ke nîke ûvootanaga mbaararî na nîke ûgûtûma tûmûvoote mue muonthe.”

1Sam 31:4

Saûlo nîwacokire akîra mwanake ûrîa wamûkuuagîra indo cia mbaara atîrî, “Comora rûviû rwaku na ûmbûrage nîguo Afilisiti aya matetigîrîte Ngai matigaûke kûnthekerera na mambûrage.” Nwatî mwanake ûcio nîwegwire guoya nyîngî mûno na ndangîavotire gwîka ûguo. Kwoguo Saûlo nîwocire rûviû rwake na akîîgwîthia îgûrû rîa ruo.