1Pet 2:23 - ÎVUKU RÎA ÛVORO MWARO

²³ Rîrîa aarumirwe, ndeerîvîrîria na kûrumana. Rîrîa aathînirue, gûtirî mûndû eevîtîre, nwatî aaigire mwîrîgîrîro wake kûrî Ngai ûrîa ûtucanagîra cira na kîvooto.

1Pet 2:23 ပူးပေါင်းရင်းမြစ်များ

Kîam 18:25

Nama ndûngîka ûguo. Ndûngîcûkangia andû arîa athingu vamwe na arîa matarî athingu. Ûngîka ûguo, andû arîa aro makaaverithagua vamwe na arîa acûku. We ndûngîka ûguo. Mûndû ûrîa ûtucagîra nthî yonthe ciira nwanginya eke guo na kîvooto.”

Thaburi 10:14

Nwatî we nîwonaga arîa marî na mathîna na mînyamaaro, na wîthagîrwa vîndî cionthe wîvarîrîtie kûmatethia. Andû arîa matarî vinya merekagîrîria njararî ciaku; we nîûtethagia athîni vîndî cionthe.

Thaburi 31:5

Nînakûnengera mwoyo wakwa, nîûmvonoketie, we Ngai-Mûnene; we wî Ngai mwîvokeku.

Thaburi 37:5

Nengera Ngai-Mûnene ûtûûro waku, mwîvoke na nîagûgûtethia.

Thaburi 7:11

Ngai atucanagîra na kîvooto, na nî arumaga andû arîa aganu vîndî cionthe.

Thaburi 96:13

îkaaina îrî mbere ya Ngai-Mûnene rîrîa agaaûka. Nîûndû agaaûka gûtuîra andû a nthî ciira. Ke agaatuîra nthî na waragania na andû a nthî na kîvooto.

Isaia 53:7

“Nîwavinyîrîrue na akîthînua, nwatî ndaauga wanarî ûndû. Aakirire ta ng'ondu îvirîtwe kûthînjwa, na aakirire wata ûrîa ng'ondu îkiraga vîndî îrîa guoya wayo ûrenjwa, ndaatumûra kanyua gake.

Luka 23:41

Tue tûtuîrîrîtwe îvera rîringanîte na ciîko irîa twîkîte. Nwatî mûndû ûyû tî mwîku ûndû wana ûmwe mûcûku.”

Luka 23:46

Jesû nîwaugîrîrie na mûgambo mûnene atîrî, “Vava, nînakûnengera mwoyo wakwa.” Na arîkia kuga ûguo agîtuîkana.

Luka 23:9

Kwoguo Pilato nîwaûririe Jesû ciûria nyîngî, nwatî Jesû ndaamûcokeria.

Ciîko 17:31

nîûndû nîatuîte mûthenya ûrîa agaatuîra andû onthe a nthî arî na kîvooto. Ke ageeka ûguo na njîra ya mûndû ûrîa athuurîte, na nîwonetie andû onthe atî ûvoro ûcio nî wa ma na njîra ya kûriûkia mûndû ûcio!”

Ciîko 4:29

Na rîu Mwathani, ta roria wone ûrîa maratûmakia. Tue tûrî ndungata ciaku. Tûvotithie tûvecanage ndûmîrîri yaku tûrî na ûmîrîru.

Ciîko 7:59

Na rîrîa maarivaga Stefano na mathiga, Stefano nîwavoire akiuga atîrî, “Mwathani Jesû amûkîra roho wakwa!”

Ciîko 9:1

Nwatî kavindarî wa kau Saûlo nîwekaraga akîvavûraga arûmîrîri a Mwathani, akiuga atî nîakûmaûraga. Kwoguo nîwathiîre kûrî Mûthînjîri-Ngai ûrîa mûnene,

Aroma 2:5

Nwatî we ûrî na ngoro nyûmû na nîûregete kwîrira. Kwoguo nîûreîngîvîria îvera rîaku rîrîa rîgaakinya mûthenya ûrîa marakara ma Ngai na îtua rîake rîa ma rîkaguûranîrua.

Aefeso 6:9

Wa namue athani, vecagani ngombo cienyu gîtîîo na mûtigage kûmekîra guoya. Menyagani atî mue na ngombo cienyu mûrî a Mwathani ûmwe ûrîa ûrî îgûrû, na atî ke atucagîra andû onthe cira atarî na kîmenyano.

2Ath 1:5

Maûndû mama monthe nîmonanagia atî Ngai atucanagîra ciira na kîvooto. Na nîûndû wa ûguo nîmûgaatuîka agîrîru a gûtonya ûthamakirî wa Ngai ûrîa mûthînagua nîûndû wa guo.

2Tim 1:12

na ûndû ûyû nîguo ûtûmaga nthînue. Nwatî ndingîconoka, nîûndû nîmbicî Ngai ûrîa mbîtîkîtie na nîrî nama atî ke arî na ûvoti wa kûngitîra vamwe na kîrîa amvete nginya mûthenya wa mûthiia.

2Tim 4:8

Kwambîrîria rîu nîmbîrîgîrîrîte nthûmbî ya ûthingu îrîa ngaavewa mûthenya wa mûthiia nî Mwathani ûrîa ûtucaga ciira na kîvooto. Tî nie nienga ngaavewa kîveo kîu nwatî nîgîkaavewa andû onthe arîa metagîrîra gûka gwake marî na wendo.

Ahib 12:3

Ta îcirieni ûvoro wake ûcio waûmîrîrie rûmena rûnene kuuma kûrî andû evia. Kwoguo mûtikaûrwe nî vinya kana mûkua ngoro.

1Pet 3:9

Mwekwa naaî tigagani kwîrîvîrîria na naaî. Mwarumwa tigagani kwîrîvîrîria na irumi. Vandû va ûguo rathimanagani, nîûndû kîrathimo nîkîo Ngai aamwîrîîre rîrîa aamwîtire.

1Pet 4:19

Kwoguo andû arîa mathînagua kûringana na wendi wa Ngai, nîmagîrîrwe nîkwîthîrwa meigîte viû njararî cia Mûmbi wao na njîra ya gwîka maûndû maro. Nîûndû vîndî cionthe ethagîrwa arî mwîvokeku.

Kûguû 19:11

Nînacokire ngîona îgûrû rîvingûkîte na kûrî na mbarathi ya rangi njerû. Ûrîa wathiîte amîkarîrîte etagwa Mwîvokeku na wa Ma. Na ûrîa atucanagîra ciira na akarûa mbaara na njîra ya kîvooto.