1Atha 9:8 - ÎVUKU RÎA ÛVORO MWARO

⁸ Wana ethîrwa nyomba îno îrî na ngumo ûguo, nîîkomomorwa, na mûndû wa wonthe ûkaavîtûkîrîra vo nîakaamaka na aciive akîûragia atîrî, ‘Ngai-Mûnene eekire vûrûri ûyû vamwe na hekarû îno ûguo nîkî?’

1Atha 9:8 ပူးပေါင်းရင်းမြစ်များ

2Atha 22:17

Nîmandiganîrîtie na nîmarutîrîte ngai ciîngî magongoona na kwoguo nîmandakarîtie nî maûndû monthe marîa mekîte. Nîûndû wa ûguo, nîndakarîtue nî Jerusalemu na marakara makwa matingîthira.

2Atha 25:9

Nîwavîvirie hekarû, nyomba ya mûthamaki na nyomba cionthe cia Jerusalemu. Nyomba cionthe nene îtûûrarî nîciavîvirue.

2Maû 29:8

Kwoguo Ngai-Mûnene nîwarakarirue mûno nî andû a Juda na a Jerusalemu na nîamekîte ûndû wa kûmakania, ûndû ûrî na guoya na wa kînyarari wata ûrîa mûreyonera na metho menyu mue ene.

2Maû 36:19

Mûthamaki wa Akalidei na athigari ake a mbaara nîmaavîvirie hekarû, makîomomora rûthingo rwa îtûûra rîa Jerusalemu, makîvîvia nyomba cionthe cia mûthamaki na magîcûkangia indo cionthe cia goro irîa ciarî kuo.

2Maû 7:21

“Hekarû îno rîu îrî na ngumo mbaro, nwatî vîndî îo mûndû wa wonthe ûkaavîtûkîrîra varî yo nî akaamaka na aûrie atî, ‘Ngai-Mûnene ekire vûrûri ûyû na hekarû îno ûguo nîkî?’

Isaia 64:11

Nyomba yetû îrîa ntheru na nthaka, kûrîa methe metû maagûkumagîria, nîîvîvîtue na mwaki îkavîa viû. Nakuo kûndû gwetû kuonthe kûrîa kwarî kûthaka gûtigîtwe kwanangîkîte.

Jeremia 16:10

“Rîrîa ûkeera andû acio maûndû mama monthe, nî magakûûria atîrî, ‘Nîndûî gîtûmîte Ngai-Mûnene atûtuîra gûtûverithia na ûndû mûcûku ûguo? Nî ûndû ûrîkû mûcûku twîkîte? Nî mevia marîkû twîvîtie Ngai-Mûnene, Ngai wetû?’

Jeremia 18:16

Nîmatûmîte vûrûri wao ûtuîka kîndû gîa kûmakania, ûtuîke kîndû gîa kûnyararwa tene na tene. Andû onthe arîa mavîtûkagîrîra vakuvî naguo, mamakaga makainainia ciongo ciao.

Jeremia 19:8

Nîngatûma îtûûra rîîrî rîtuîke vandû va kûvavûra andû na kûmamakia nîûndû wa mîthiro îrîa rîkethîrwa nayo. Mûndû wa wonthe ûkavîtûkîrîra vakuvî narîo nîakaamaka.

Jeremia 22:28

Nîkwa Konia anyararîtwe ta nyûngû nguû, îrîa gûtarî mûndû ûrî vata nayo? Nîndûî gîtûmîte ke na ciana ciake mavirwa îthamîriorî, vûrûrirî ûrîa mataicî?

Jeremia 25:9

nîngûtûma mîvîrîga yonthe ya mwena wa rûgûrû, na Nebukadinezarû mûthamaki wa Babuloni, ndungata yakwa matharîkîre vûrûri ûyû na atûûri a guo vamwe na mavûrûri monthe marîa mamarigicîrîtie. Nîngamacûkangia viû na ndûme megue guoya, manyararwe na matûûre na gîconoko.

Jeremia 44:8

Mûrandakaria nîkî mûkîgooca ngai irîa mwîrûthîrîte mue ene, na kûvîvîria ngai cia mîvuanano ûbani Misiri kûrîa mûraûkire gûtûûra? Mûrenda gwîcûkangia mue ene na gûtuîka kîrumi na gîconoko mbere ya mavûrûri monthe ma nthî?

Jeremia 49:17

“Edomu îkeguithagia andû guoya, na mûndû ûrîa ûkavîtûkagîrîra vakuvî naguo akaauga ûûi, nîkûmaka ona ûrîa kwanangîtwe.

Jeremia 5:19

Nao andû enyu mangîkaûria gîtûmi Kîam mbîke maûndû mama monthe, we Jeremia ûkaamera atî, ‘wata ûrîa mwareganire nanie na mûkîgooca ngai ng'eni irîa ciarî vûrûrirî wenyu, nwata guo mûgatungatîra ageni mûrî vûrûrirî ûrîa ûtarî wenyu.’ ”

Jeremia 50:13

Nîûndû wa ûrîa nie Ngai-Mûnene ndakarîte, gûtirî mûndû wanarî ûmwe ûgatûûraga Babuloni; îtûûra rîu nîrîcûkangua viû. Arîa onthe makavîtûkagîra vakuvî narîo nîmakaamaka, makamaka makiugaga, we! we! we! Nî ûrîa rîcûngangîtue.

Jeremia 52:13

Nake nîwavîvirie hekarû, nyomba ya mûthamaki na nyomba cionthe cia andû a vata kûu Jerusalemu.

Maca 2:15

Andû arîa onthe mavîtûkaga na njîra nîmamûvûragîra mvî. Nîmainainagia ciongo na makatheka nîûndû wa kwomomorwa kwa Jerusalemu. Rîrî nîrîo îtûûra rîrîa maaugaga nîrîthaka na rîakenagia nthî yonthe?

Danieli 9:12

Nîwavingirie maûndû marîa waugire nîûgaatwîka vamwe na athani etû. Nîwacûkangirie Jerusalemu gûkîra ûrîa wanacûkangia matûûra marîa mengî monthe ma nthî.

Gûco 28:37

Andû a mavûrûrirî marîa Ngai-Mûnene akaamûvira nîmakaanyitwa nî guoya mona maûndû marîa mekîkîte kûrî mue. Nîmakaamûnyarara na mamûthekerere.

Gûco 29:23

Vûrûri wonthe ûkeethîrwa ûkunîkîtwe nî cumbî na ûviriti, na ûtangîvandwa wanarî kîndû gîkamera, nginya nyaki ndîkaamera. Vûrûri wenyu ûkethîrwa wîkariî ta Sodomu na Gomora, Adima na Zeboimu, matûûra marîa Ngai-Mûnene aacûkangirie rîrîa aarakarîte nîmo mûno.