1Akor 8:6 - ÎVUKU RÎA ÛVORO MWARO

⁶ Nwatî tue twîtîkîtie atî kûrî Ngai ûmwe tu na nîke îthe wetû. Ke nîke waûmbire indo cionthe, na tûtûûraga nîûndû wake. Tue twîtîkîtie atî kûrî Mwathani ûmwe tu na ke nîke Jesû Kristû, na indo cionthe ciaûmbirwe na njîra yake na wa natue tûtûûraga nîûndû wake.

1Akor 8:6 ပူးပေါင်းရင်းမြစ်များ

Isaia 46:9

Ririkanani maûndû marîa meekirwe tene; nîûndû Nie nînie Ngai na gûtirî wîngî, nie nînie Ngai na gûtirî wîngî tanie.

Jeremia 10:6

We Ngai-Mûnene gûtirî wîngî wîkariî tawe, we wî mûnene na rîîtwa rîaku rîrî vinya mwîngî.

Jeremia 10:7

Nû ûtangîgwîtigîra we mûthamaki wa mavûrûri? We nîwagîrîrwe nî gûtîewa, nîûndû gatagatîrî ka andû arîa aûgî onthe a mavûrûri, na gatagatî ka athamaki ao onthe, gûtirî wîkariî tawe.

Jona 1:9

Nake Jona nîwamacokerie atîrî, “Nie nîrî Mûhibirania, na ngoocaga Ngai-Mûnene, Ngai wa îgûrû ûrîa waûmbire îria na nthî nyûmû.”

Malaki 2:10

Na kinthî tuonthe tûtirî a îthe ûmwe? Na kinthî tuonthe tûtiaûmbirwe nî Ngai wa ûmwe? Nîndûî vi kîgiragia twîthîrwa tûrî evokeku mûndû na ûrîa wîngî, na tûgatûma kîrîkanîro Kîam Ngai na methe metû kîgîa na kîrumi.

Mathaayo 11:27

“Vava nîamvete indo cionthe; gûtirî mûndû wîcî mûriû tiga Vava. Na gûtirî mûndû wîcî Vava tiga Mûriû na arîa Mûriû endaga kûmaguûrîria.

Mathaayo 28:18

Nake Jesû nîwathiîre vakuvî nao na akîmeera atîrî, “Nie nîrî mûve wathani wonthe gûkû nthî wana îgûrû.

Johana 1:10

Kiugo aarî gûkû nthî, nwatî wana ethîrwa Ngai aaûmbire nthî na njîra yake, andû a gûkû nthî matiamwîtîkîra.

Johana 1:3

Indo cionthe ciaûmbirwe nî Ngai na njîra ya Kiugo na gûtirî kîndû wana kîmwe Kîamûmbirwe Kiugo atarî vo.

Johana 10:30

Nie na Vava tûrî kîndû kîmwe.”

Johana 13:13

Mûmbîtaga Mwarimû na mûkambîta Mwathani. Rîrîa mûgwîka ûguo mwîthagîrwa mûkîaria ûvoro wa ma nîûndû nie nînie ke.

Johana 14:20

Na rîrîa mûthenya ûcio ûgaaûka, nîmûkaamenya atî nie nîrî ndaarî ya Vava na atî mue mûrî ndaarî yakwa, wata ûrîa nie nîrî ndaarî yenyu.

Johana 17:3

Naguo mwoyo wa tene na tene nî atî andû onthe makûmenye we Ngai wa ma na mamenye Jesû Kristû ûrîa watûmire.

Johana 20:17

Nake Jesû nîwamwîrire atîrî, “Tiga kwînyitîrîra nanie nîûndû ndirî mwambatu kûrî Vava. Nwatî thiî kûrî aa mûrwaiya na ûmeere atî nie nîkwa njokete kûrî ûrîa arîke Vava na nwake Îthe wao, Ngai wakwa na nwake Ngai wao”.

Ciîko 17:28

wata ûrîa mûndû ûmwe augîte atîrî, ‘Ke nîke ûtûmaga tûtûûre, tûvote kûthiî na twîthîrwe tûrî kîrîa tûrî.’ Andîki amwe enyu nîmaugîte atîrî, ‘Wa natue na tûrî ciana ciake.’

Ciîko 2:36

“Kwoguo mue andû onthe a Isiraeli nwa nginya mûmenye na ma atî Jesû ûyû ûrîa mue mwambire mûtharavarî îgûrû, nîke Ngai atuîte Mwathani na Mesaya!”

Ciîko 5:31

Ngai nîwamwigire mwena wake wa ûrîo arî Mûtongoria na Mûvonokia. Ngai eekire ûguo nîguo ave andû a Isiraeli kamweke ga kwîrira nîguo moverwa mevia mao.

Aroma 11:36

Nîûndû indo cionthe ciaûmbirwe nîke na indo cionthe itûîre nîûndû wa ûvoti wake na nî ciake. Nake arokumua tene na tene! Ameni!

1Akor 1:2

nîtwamwandîkîra maarûa mue kanitha wa Ngai ûrîa ûrî îtûûrarî rîa Korinitho na kûrî arîa onthe metîtwe matuîke andû a Ngai arîa matuîkîte ake marî na ûrûmwe na Jesû Kristû. Mue mwîtîtwe mûtuîke andû a Ngai mûrî vamwe na andû onthe arîa marî kûndû kuonthe na magoocaga Mwathani wetû Jesû Kristû ûrîa arîke Mwathani wao na wetû:

1Akor 12:3

Kwoguo nîrenda mûtaûkîrwe atî gûtirî mûndû waragia atongoretue nî Roho wa Ngai ûngiuga, “Jesû arogwatwa nî kîrumi!” Na gûtirî mûndû ûngiuga, “Jesû nî Mwathani” atatongoretue nî Roho Mûtheru.

1Akor 6:13

Mûndû wîngî avota kuga atîrî, “Irio irî vo nîûndû wa îvu, na îvu rîrî vo nîûndû wa irio.” Ûguo nîguo kûrî, nwatî wa cioîrî Ngai nîakaaithiria. Mwîrî ndûrî vo nîûndû wa kûvûra ûmaraa, nwatî ûrî vo nîûndû wa gûtungatîra Mwathani. Na Mwathani nîke ûtûmaga mwîrî wîthîrwe ûrî vo.

1Akor 8:4

Kwoguo nie ngîcokia kîûria kîgiî irio irîa ciîthagîrwa irutîrîtwe mîvuanano nîmbuga atî: tue nîtwîcî atî mîvuanano îrûngamaga îthenyarî rîa kîndû gîtarî vo, na nîtwîcî atî Ngai nî ûmwe tu.

Aefeso 1:3

Tigani tûkumie Ngai Îthe wa Mwathani wetû Jesû Kristû! Tûrî kîndû kîmwe na Kristû, Ngai nîatûrathimaga na irathimo cionthe cia kîîroho irîa irî îgûrû.

Aefeso 3:14

Ûndû ûcio nîguo ûtûmaga ndurîria Îthe wetû maru,

Gûco 4:35

Mwonirue maûndû mau nîguo mûmenye atî Ngai-Mûnene nî Ngai, na gûtirî wîngî tiga Ke.

Gûco 4:39

Kwoguo menyani kuuma ûmûnthî na mwige ûndû ûyû ngororî cienyu atî, Ngai-Mûnene nî Ngai wa îgûrû na nthî, gûtirî ngai îngî.

Gûco 6:4

“Tathikîrîriani mue andû a Isiraeli! Ngai-Mûnene, Ngai wetû nî Ngai-Mûnene ûmwe tu.

Akol 1:6

Ûvoro mwaro wîkaraga ûkîgîcaga na maciaro na nîûvunjagua nthî yonthe. Ûndû ûyû nîmûtuîkîku wana nginya gatagatîrî kenyu, nîûndû kuuma mûthenya ûrîa mwambîrîrie kwîgua ûvoro mwaro, nîmwambîrîrie gûtaûkîrwa nî ûma wîgiî wega wa Ngai.

1Pet 1:21

Na njîra ya Kristû nîmwîtîkîtie Ngai ûrîa wariûkirie Kristû na akîmûva riiri. Kwoguo rîu mûtûûraga mwîtîkîtie Ngai na mwigîte mwîrîgîrîro wenyu kûrî ke.

Kûguû 1:18

Nie nînie ûrîa ûrî mwoyo! Nie nînaakuîte, nwatî rîu nîrî mwoyo tene na tene. Nie nîrî na ûvoti îgûrû rîa gîkuû na vûrûri wa arîa akuû.