1Akor 5:11 - ÎVUKU RÎA ÛVORO MWARO

¹¹ Ûndû ûrîa naugaga nî atî mûtiagîrîrwe nî kûgîa ngwatanîro na mûndû wa wonthe ûrîa wîîtaga mûriû kana mwarî wa îthe wetû na ethîrwe nî mûvûûri ûmaraa, kana nî mûkoroku, kana nî mûvoi mîvuanano kana nî mûrumani, kana nî mûrîu wa njovi, wana kana nî mûcunani. Mue wana nginya mûtikaarîcanagîre na mûndû ta ûcio.

1Akor 5:11 ပူးပေါင်းရင်းမြစ်များ

Thaburi 10:3

Andû arîa aganu metîîaga nîûndû wa merirîria ma ngoro ciao, arîa akoroku marumaga na makarega Ngai-Mûnene.

Thaburi 101:5

Nîngaacûkangia mûndû ûrîa ûkaaguta mûndû ûrîa wîngî, ndigeekarania na mûndû mwîtîi na mwaganu.

Ezek 22:12

Andû amwe enyu nîmetagia mavaki nîguo maûrage andû engî. Na engî nîmetagia umithio wa indo irîa makombithîtie andû ao, magacuuna andû indo na magetongia na njîra îrîa îtagîrîrîte na makariganîrwa Nînie.” Ûguo nîguo Ngai-Mûnene augîte.

Mathaayo 18:17

Ethîrwa mûrwanyûkwe tîamathikîrîria, îra kanitha ûvoro ûcio; na angîrega kûthikîrîria kanitha, mûtue ta mûndû ûtetîkîtie kana ta mwîtia mbeca cia gooti.

Mathaayo 23:25

“Na kaî mue arimû a Watho na Afarisai mûrî na thîna-î! Mue mvinga ino! Mûthambagia ikombe na thaani cienyu gûkû îgûrû, nwatî ndaarî gwîcûrîte indo irîa mwonete na njîra ya gûcuunana na ya wîyendi.

Luka 18:11

“Mûfarisai nîwarûngamire vandû arî wenga na akîvoya na ngoro atîrî, ‘Ngai nîragûcokeria ngatho nîûndû nie ndiîkariî ta andû arîa engî methagîrwa marî akoroku, aganu na andû arîa mavûûraga ûmaraa. Nîragûcokeria ngatho nîûndû nie ndiîkariî ta mwîtia ûrîa wa mbeca cia gooti.

Luka 21:34

“Îîmenyerereni! Mûtigetîkîre gûtûmîra mavinda menyu monthe na kûrîa mûno na kûnyua na kûthînîka mûno mûgîîciria mûno ûvoro wîgiî maûndû ma gûkû nthî. Mweka ûguo mûkethîrîrua nî mûthenya ûcio mûtevarîrîtie,

Ciîko 1:15

Mîthenya mînini yavîtûka nîkwagîre na mûcemanio wa etîkia, na onthe maarî ta îgana na mîrongo îîrî. Nake Petero nîwarûngamire akîmeera atîrî,

Ciîko 9:17

Kwoguo Anania nîwathiîre, agîtonya mûciî kwa Judasi, akigîrîra Saûlo njara na akîmwîra atîrî, “Saûlo mûriû wa îthe wetû, nie nînatûmwa nî Mwathani Jesû ûrîa ûrakumîrîre vîndî îrîa we ûraûkîte gûkû. Ke andûma nîguo we ûvote kwona rîngî na wîcûrwe nî Roho Mûtheru.”

Aroma 13:13

Nîtwîthagîrwe tûrî na mîtugo mîaro ta andû arîa mathiîcagîra ûtherirî. Tûtikethagîrwe tûrî marugarî marîa mekagwa waganu wa ûrîu, kana ciîkorî cia ûûra nthoni, ûtharia, mbaara, kana wîru.

Aroma 16:17

Ariû na aarî a îthe wetû, nîramûthaitha atî: mwîmenyagîrîre kûrî andû arîa maretaga nyamûkano na kûvîngithia mûndû. Andû acio nîmareganaga na maûndû marîa mwathomithirue. Îthemageeni andû ta acio.

1Akor 10:14

Kwoguo arata akwa arîa nie mendete tiganani na ûvoro wîgiî kûvoya mîvuanano.

1Akor 11:21

Nîûndû vîndî îrîa mûrarîa, wa mûndû arîcaga irio ciake atakwamba gweterera arîa engî. Andû amwe methagîrwa mavûtiî na arîa engî makethîrwa marî mîrîu.

1Akor 5:13

Nîûndû mandîko matheru maugîte atîrî, “Îngatani andû arîa mekaga naaî maume gatagatîrî kenyu.”

1Akor 6:10

kana maîaga kana arîa akoroku, kana mîrîu ya njovi, kana arumani wana kana acunani gûtirî mûndû wana ûmwe gatagatîrî ka acio ûkaagaîrwa ûthamaki wa Ngai.

1Akor 6:6

Vandû va ûguo, mûkristiano arathiî îgootirî kûthitanga mûkristiano ûrîa wîngî na agetîkîria andû arîa matetîkîtie Kristû mamatuîre ciira!

1Akor 6:9

Mue nîmwicî atî andû arîa aganu matikaagaîrwa ûthamaki wa Ngai. Mûtikeveenie; andû arîa mavûûraga ûmaraa kana mavoyaga mîvuanano kana matharagia, kana arûme arîa mamenyanaga kîîmwîrî na arûme arîa engî,

1Akor 7:12

Nao arîa engî onthe nîramera atîrî, (nie mwene, tî Mwathani): ethîrwa mûthuuri wa wonthe Mûkristiano arî na mûka ûtarî mwîtîkia na nî ekaranagia nake eganîrîte, ndagîrîrwe nî kûmûta.

1Akor 7:15

Nwatî ethîrwa ûrîa ûtetîkîtie nîarenda gûtigana na ûrîa wîtîkîtie, nîeke guo. Na vîndî ta îo, mûthuuri kana mûndûmûka wa wonthe Mûkristiano ethagîrwa arî na wîyathi. Ngai atwîtîte tûtûûre tûrî na thayû.

1Akor 8:11

Kwoguo mûndû ûcio ûrî na wîtîkio mûnini na wakuîrîrwe nî Kristû nîacûkangagua nîûndû wa “Ûmenyi” ûcio wenyu.

Agal 2:12

Naareganire na Petero nîûndû nîwarîcanagîra na andû a Ndûrîrî, wana mbere ya andû arîa maatûmîtwe nî Jakuvu makinye kûu Antiokia. Nwatî rîrîa andû acio maakinyire Petero nîwatigire kûrîcanîra na andû a Ndûrîrî na akîthenguta kûrî o. Nîwetigagîra andû arîa maaugaga atî nwanginya andû a Ndûrîrî marue.

Aefeso 5:18

Tigagani kûrîwa nî ndivei nîûndû ûrîu nîkwa ûkûmwananga, vandû va ûguo îcûragwani nî Roho.

Aefeso 5:5

Menyani na ma atî mûndû ûrîa ûvûraga ûmaraa, ûrîa ûrî na ûûra nthoni kana ûkoroku (nîûndû gûkoroka nî gûtungatîra ngai cia mîvuanano) ndakaagîa na îgai ûthamakirî wa Kristû na wa Ngai.

Akol 3:5

Kwoguo ûragani merirîria marîa mûrî namo ma maûndû ma gûkû nthî. Namo nî: ûmaraa, ûûra nthoni, ûtûrîka, kûgîa na merirîria macûku na gûkoroka (nîûndû gûkoroka nî ta kûvoya ngai cia mîvuanano).

2Ath 3:14

Ethîrwa kûrî mûndû ûkaarega kwathîkîra ûrîa tûmwîrîte maarûarî îno, menyani mûndû ûcio na mûtikathiîcanie nake nîguo aconoke.

2Ath 3:6

Ariû na aarî a îthe wetû, tûramwatha na rîîtwa rîa Mwathani wetû Jesû Kristû atî mûtikathiîcanagie na ariû na aarî a îthe wetû arîa igûta na matarûmagîrîra maûndû marîa twamûthomithirie.

1Tim 3:3

Ndagîrîrwe nî kwîthîrwa arî mûrîu kana mûndû wa înegene, nwatî agîrîrwe nîkwîthîrwa arî mûndû mûkirîrîria na mwendi thayû na ûtarî mûkorokeri mbeca.

1Tim 6:5

na ngarari vîndî cionthe kuuma kûrî andû arîa matarî na meciria maro na matiganagîria ûma. Andû ta aya meciragia gûtuîka mûkristiano nî njîra îmwe ya gûtonga.

2Joh 1:10

Ethîrwa mûndû nwa aûke kûrî mue atakûthomithia kîrîra gîa Kristû, mûtikamûgwate ûgeni kwenyu mûciî wana mûtikamûkethie.

Kûguû 2:14

Nwatî nîrî na maûndû manini ngûmûcukîra: atî kûrî andû amwe gatagatîrî kenyu marûmagîrîra maûndû marîa Balaamu aathomithanagia. Balaamu ûcio nîke wathomithirie Balaki ûrîa agûtûma andû a Isiraeli mevie na njîra ya kûrîa irio irîa ciarutîrîtwe mîvuanano na mevia na ciîko cia ûmaraa.

Kûguû 2:20

Nwatî nîrî na ûndû nîramûcukîra: Mue nîmwîtîkagîria mûndûmûka ûcio wîtagwa Jezebeli atambie kîthomo Kîam maveeni. Ke etucaga nî mûrathi wa Ngai, nwatî na njîra ya kîthomo kîu gîake, nîavîtithagia ndungata ciakwa igeka ciîko cia ûmaraa na ikarîa irio irîa irutîrîtwe mîvuanano.

Kûguû 21:8

Nwatî andû arîa iguoya, arîa matarî evokeku, arîa matarî atheru, mîtoi, arîa matharagia, arogi, arîa magoocaga mîvuanano, na arîa mavenanagia, nîmagaaikua îcuarî rîa mwaki ûrîa wakanaga na ûviriti, na nîkîo gîkuû gîa kaîrî.”

Kûguû 22:15

Nwatî nakûu nja ya îtûûra nîkuo kûrî andû arîa mekaga maûndû macûku na arîa maragûraga, arîa mekaga maûndû ma ûtharia na aûragani. Na nwakuo kûrî avoi mîvuanano na arîa maveenanagia na ciîko na mîario yao.