1Akor 4:5 - ÎVUKU RÎA ÛVORO MWARO

⁵ Kwoguo mue mûtiagîrîrwe nî gûtuîra mûndû wana ûmwe kavinda karîa kagîrîru ga gûka kwa Mwathani gatarî gakinyu. Mwathani nîakaarete ûtherirî maûndû monthe marîa mathithîtwe ndumarî na aguûrie maûndû marîa mathithîtwe ngororî. Kwoguo wa mûndû nîakaamûkîra îgai rîrîa rîmwagîrîrîte kuuma kûrî Ngai.

1Akor 4:5 ပူးပေါင်းရင်းမြစ်များ

Ayubu 12:22

Nîaguûragia maûndû marîa marî ndumarî, na marîa marî ndumarî akamareta ûtherirî.

Nthi 12:8

Mûndû mûûgî nîakumagua nî andû arîa engî, nwatî mûndû kîrimû nîkwa anyararagwa.

Mûvunjia 11:9

We mwanake kenagîra wîthî waku. Ngoro yaku nî îkenagîre wîthî waku. Îkaga ûrîa ngoro yaku îrenda. Nwatî ririkana atî Ngai nîagaagûtuîra nîûndû wa maûndû marîa monthe wîkaga.

Mûvunjia 12:14

Ngai nîagaatuîra wa mûndû kûringana na maûndû monthe marîa ekaga, wana maûndû monthe marîa mekagîrwa ndumarî, marî maro kana marî macûku.

Jeremia 16:17

Nie nîmonaga maûndû monthe marîa mekaga; gûtirî ûndû mangînthitha. Nîmonaga mevia mao monthe.

Jeremia 23:25

Nîmbîguîte maûndû ma maveeni marîa arathi arîa maaragia maveeni marîtie mambîgiî na njîra ya rîîtwa rîakwa makiugaga atî, ‘Nîrîmûrotu! Nîrîmûrotu!’

Hosea 8:13

O nîmendete magongoona, na kûrîa nyama cia magongoona; nwatî nie Ngai-Mûnene ndikenagua nîo wana vanini; Ke aririkanaga mevia mao; na akamaverithia nîûndû wa mevia mao; nîakaamacokia Misiri ûkomborî.

Malaki 3:18

Namue nîmûkoona ngûrani ya mûndû ûrîa mûthingu na mûndû ûrîa mwaganu; na mûmenye ngûrani ya mûndû ûrîa ûtungatagîra Ngai, na ûrîa ûtamûtungatagîra.”

Mathaayo 10:26

“Kwoguo mûtigetigîre andû. Nîûndû gûtirî kîndû gîkunîkîre gîtagaakunûrwa kana kîthithe gîtakaamenyekana.

Mathaayo 24:30

Nakîo kîmenyithia gîa gûka kwa Mûrû wa Mûndû nîgîkeyumîria matuurî. Nao andû onthe a nthî nîmakaarîra moona Mûrû wa Mûndû agîûka arî ndaarî ya matu ma îgûrû, arî na vinya na riiri mwîngî.

Mathaayo 24:46

Rîrîa mwathi wayo agaaûka na ethîre ndungata îo îgîîka ûguo, nîkaarathimwa.

Mathaayo 25:21

Nake mwathi wake nîwamwîrire atîrî, ‘Nîwîkîte waro we wî ndungata mbaro. Nîwîvokekete na tûindo tûnini, na kwoguo nîngûgûtua mûmenyereri wa indo nyîngî. Tonya tûkenanîre vamwe!’

Mathaayo 25:23

Nake mwathi wayo nîwamîrire atîrî, ‘Nîwîkîte waro. We wî ndungata mbaro na îîvokekete. Nîwîvokekete na tûindo tûnini. Nîngûgûtua mûmenyereri wa indo nyîngî. Tonya tûkenanîre vamwe!’

Luka 6:37

“Mûtigatucanîre ciira, na wanamue mûtigaatuîrwa. Mûtigekûûe andû arîa engî na wanamue mûtigeekûûîrwa. Ovanagîrani na wanamue nî mûkooverwa.

Johana 21:22

Jesû nîwamûcokerie atîrî, “Wana ngenda ekare nginya rîrîa ngaaûka-î, îo nî thîna yaku? We ta nûmîrîra!”

Johana 21:23

Kwoguo ndeto nîciatambire gatagatîrî ka arûmîrîri a Jesû atî mûrutwa ûyû ndagaakua. Nwatî Jesû ndaaugîte atî mûrutwa ûyû ndagaakua, aaugîte atîrî, “Wana ngenda ekare nginya rîrîa ngaaûka rî, îo nî thîna yaku?”

Johana 5:44

Mue mûcaragia ngumo kuuma kûrî andû arîa engî, nwatî mûtigeragia kûgîa na ngumo kuuma kûrî ûrîa arîke Ngai.

Aroma 14:4

We wî û nîguo ûtuîke wa gûtuîra ndungata ya mûndû ûrîa wîngî? Mwathi wa ndungata îo nîke ûgaatua kana nî îkîte waro kana nî îkîte naaî. Nayo ndungata îo nîîkavotana nîûndû Mwathani arî na ûvoti wa gûtûma îvootane.

Aroma 2:1

Mûrata wakwa ethîrwa we nîûtucagîra andû arîa engî, ndûrî na kîîgwatio wana ethîrwa we nîwe û. Nîûndû rîrîa ûgûtuîra andû arîa engî ûgacoka ûgeka maûndû marîa maratûma ûmatuîre, nîwe mwene ûretuîra.

Aroma 2:16

Kwoguo, kûringana na ûvoro mwaro ûrîa mvunjagia ûguo nîguo gûkethîrwa gwîkariî mûthenya ûrîa Ngai na njîra ya Jesû Kristû agaatua ciira wa maûndû ma nthitho marîa marî ngororî cia andû.

Aroma 2:29

Mûyahudi wa ma nî ûrîa Mûyahudi ndaarî, nakuo kûrua kwa ma nî kûrua ngoro na njîra ya Roho na tî na njîra ya watho ûrîa mwandîke. Mûndû ta ûcio nîakumagua nî Ngai nwatî tî andû.

Aroma 2:7

Andû amwe nîmakîragîrîria gwîka waro, gûcaria riiri, gîtîîo na gûtûûra mwoyo. Nao nîmakaavewa mwoyo wa tene na tene.

1Akor 1:7

Kwoguo mue nîmwamûkîrîte iveo cia mîthemba yonthe irîa Roho wa Ngai avecanaga wa mwetererete mûthenya wa kûguûrua kwa Mwathani wetû Jesû Kristû.

1Akor 11:16

Nwatî ethîrwa mûndû wana ûrîkû nîarenda gûkararia ûndû ûcio, nie ûrîa nguga nî atî, tue wana kana makanitha ma Ngai tûtiîthagîrwa tûrî na mûtugo wîngî vîndî ya kûvoya.

1Akor 11:26

Na ûguo nî kuga atî vîndî cionthe rîrîa mûrarîa mûgate ûcio na mûranyua ndivei kuuma gîkomberî kîu, mwîthagîrwa mûkîanîrîra gûkua kwa Mwathani nginya rîrîa agaacoka.

1Akor 15:23

Wa mûndû nîakaariûkua kavinda gake gakinya. Kristû nîke warî wa mbere kûriûkua. Na rîrîa Kristû agaaûka, arîa mamwîtîkîtie nîmakaariûkua.

1Akor 3:13

Na wîra wa mûndû wa mûndû nîûkoonekana vîndî îrîa ûkaaguûrua mûthenya wa Kristû. Wîra wa mûndû nîûkaamenyekana nîûndû nîûkaagerua na mwaki nîguo kûmenyekane waro ûrîa wîra ûcio wîkariî.

1Akor 3:14

Ethîrwa kîrîa gîatumirwe îgûrû rîa mûcingi ûcio gîtikaavîa, mûtumi wakîo nîakaamûkîra kîveo.

1Akor 3:8

Vatirî ngûrani gatagatî ka mûndû ûrîa ûvandaga na ûrîa wîtagîrîria manjî, na Ngai akaarîva mûndû mûcara kûringana na wîra ûrîa ke mwene arutîte.

2Akor 10:18

Nîûndû andû arîa metucaga aro tîo Ngai amûkagîra, nwatî amûkagîra arîa ke atûcaga aro.

2Akor 10:9

Ndirenda monekane takwa nîrenda kûmûmakia na maarûa ciakwa.

2Akor 4:2

Nîtûreganîte na maûndû ma nthoni marîa mekagîrwa nthithorî. Nîtûreganîte na maûndû ma wara, kana kûgarûrania ciugo cia Ngai ituîke cia maveeni. Nwatî twaragia ûvoro wa ma tûrî mbere ya Ngai tûkîîrîgagîrîra atî andû onthe arîa marî na thamiri mbaro nîmagûtwîtîkîra.

2Akor 5:10

Nîûndû tuonthe nwanginya tûkaarûgama mbere ya Kristû tûtuîrwe nîke. Wa mûndû nîakaagwata kîrîa kîmwagîrîrîte, kîrî Kîamro kana kîrî gîcûku kûringana na wîra ûrîa mûndû arutîte arî na mwîrî.

1Ath 5:2

Nîûndû nîmwîcî waro atî Mwathani agaaûka gûtarî mûndû ûkûmwîrîgîrîra wata ûrîa mwîi aûkaga ûtukû.

Ahib 4:13

Gûtirî ûndû wana ûmwe ûngîthithwa Ngai. Maûndû monthe methagîrwa marî ûtherirî na matarî mathithe mbere ya metho make. Na nwanginya tûmûtaaragîrie maûndû monthe marîa twîkaga.

Jakuvu 4:11

Ariû na aarî a îthe wetû, tigagani gûcambania. Mûndû ûrîa ûcambagia mûkristiano ûrîa wîngî kana akamûtuîra, nî acambagia watho na agaûtuîra. Mûndû ûtucagîra watho, ndawathîkagîra nwatî nîatuîkaga mûtucanîri.

Jakuvu 5:7

Kwoguo ariû na aarî a îthe wetû, kiragîrîriani nginya rîrîa Mwathani agaacoka. Taroriani ûrîa mûrîmi akiragîrîria etererete mûgûnda wake ûgîe na maciaro ma vata. Ke nîakiragîrîria maurîrwe nî mbura ya mbere na ya mûthiia.

Jakuvu 5:9

Ariû na aarî a îthe wetû, tigagani gwîkara mûgîtetanagia nîguo mûtigatuîrwe. Taroriani mûtucanîri arûngamîte mûrangorî.

1Pet 1:7

Mworoto wa magerio mama monthe nî kwonania atî wîtîkio wenyu nî wa ma. Wana nginya thaavu îgeragua na mwaki nîguo yonekane kana nî mbaro. Kwoguo wîtîkio wenyu ûrîa wî vata gûkîra thaavu, nwanginya ûgerue nîguo wonekane kana nî wa ma. Namue nîmûgaacoka kûgîa na ûkumio, riiri na gîtîîo vîndî îrîa Jesû Kristû akaaguûrua.

1Pet 5:4

Na rîrîa Mûrîthi ûrîa Mûnene agaaûka, nîmûkaavewa nthûmbî îrî na riiri îrîa îtacûkaga.

2Pet 3:12

wa mûgîetagîrîra na mûkîîriragîria mûno Mûthenya wa Ngai ûkinye. Vîndî îrîa Mûthenya ûcio ûgaaûka, îgûrû nîrîkaavîvua na mwaki rîthire, nacio ciûmbe cionthe irîa irî îgûrû ivîe nî mwaki irarûke.

2Pet 3:4

makiugaga atîrî, “Na kinthî ndaamwîrire nîagaaûka? Arî kû rîu? Nîûndû kuuma wa rîrîa methe metû ma tene maakwire, kwîthîrîtwe gwîkariî wa ta ûrîa gwekariî kuuma wa Kîammbîrîria gîa kûmbwa kwa nthî!”

Juda 1:14

Enoku ûrîa warî wa rûciaro rwa mûgwanja kuuma kûrî Adamu nîwarathire ûvoro ûmegiî akiuga atîrî: “Mwathani nîagaaûka arî na ngiri nyîngî cia araika ake atheru,

Kûguû 1:7

Taroria, ke nî aûkîte arî matuurî! Andû onthe nîmakaamwona, wana arîa maamûmundire. Andû onthe a nthî nîmakaarîra maugîrîrîtie nîûndû wake. Ûguo nîguo gûgaatuîka. Ameni!

Kûguû 20:12

Na nînoonire andû arîa maakuîte, anene na anini, marûngamîte mbere ya gîtî Kîam ûthamaki. Namo mavuku nîmaavingûrirwe. Na îvuku rîngî narîo nîrîavingûrirwe na nî îvuku rîa mwoyo. Andû arîa maakuîte nîmaatuîrîrwe kûringana na ûrîa mekîîte, wata ûrîa kwandîkîtwe mavukurî mau.