1Akor 4:12 - ÎVUKU RÎA ÛVORO MWARO

¹² Tue ene nîtwînogagia tûkîruta wîra na njara cietû. Vîndî îrîa tûkûrumwa nî andû nîtûmarathimaga na vîndî îrîa tûkûnyarirwa nî andû nîtûmagîrîria.

1Akor 4:12 ပူးပေါင်းရင်းမြစ်များ

Mathaayo 5:11

“Kûrathimwa nî mue vîndî îrîa andû mamûruma, mamûnyarira, na mamwigîrîra ing'enyo cia mîthemba na mîthemba nîûndû mûrî arûmîrîri akwa.

Mathaayo 5:44

Nwatî rîu nie nîramwîra atîrî: endagani nthû cienyu na mûvoyagîre arîa mamûnyariraga,

Luka 23:34

Nake Jesû nîwaugire atîrî, “Ngai Vava, movere nîûndû matiîcî ûrîa mareka.” Nao nîmaaûthîre nguo cia Jesû nîguo mamenye ûrîa makûigaana.

Luka 6:28

Arîa mamwimagîra irî, metagîrieni kîrathimo kuuma kûrî Ngai, na mûvoyagîre arîa mamwîkaga naaî.

Johana 15:20

Taririkanani ûrîa namwîrire atî: ‘Gûtirî ngombo nene gûkîra mûmîathi.’ Angîthîrwa andû nîmaanyaririre, wa namue nîmakaamûnyarira. Ethîrwa nîmaathîkîre ciugo ciakwa, wana nginya cienyu nîmagaaciathîkîra.

Ciîko 18:3

na agîkarania akîrutithanagia wîra nao nîûndû ke aarî mûtumi wa magema wa tao.

Ciîko 20:34

Mue ene nîmwîcî atî nie nîndutîte wîra na njara ino ciakwa nîguo mone indo cionthe irîa nie na arîa tûrekaranagia nao tûravataraga.

Ciîko 7:60

Nake nîwaturirie maru na akîanîrîra na mûgambo mûnene akiuga atîrî, “Mwathani, ndûkamaverithie nîûndû wa wîvia ûyû wao!” Na rîrîa Stefano aarîkirie kuga ûguo, nîwakwire.

Aroma 12:14

Rathimagani andû arîa mamwîkaga naaî, marathimageni na mûtikamarume.

Aroma 12:20

Vandû va ûguo, mandîko matheru maugîte mwagîrîrwe nî gwîka atîrî, “Ethîrwa mûndû ûrîa mûrî na ûthû nake nî mûvûtu mûve gîa kûrîa. Ethîrwa nî mûnyondu mûve kîndû gîa kûnyua, nîûndû weka ûguo nîtakwa wamwigîrîra makara marî na mwaki kîongorî gîake.”

Aroma 8:35

Nî ndûî kîngîtûtigithania na wendani wa Kristû? Nî mathîna, kana kîeva, kana mînyamaaro, kana yûra, kana ûthîni, kana ûgwati wana kana kûûragwa?

1Akor 9:6

Nie na Baranaba, nwatue tu twagîrîrwe nî kûruta wîra nîguo twîyonere gîa gwîtûûria?

2Akor 11:8

Vîndî îrîa naarutaga wîra gatagatîrî kenyu, navecagwa ûtethio nî andû a makanitha marîa mengî. Ûguo nî ta kuga nie naamacuunaga indo ciao nîguo nîmûtungate.

Aefeso 4:28

Mûndû wa wonthe wîaga nîatigane na wîi na ambîrîrie kûruta wîra nîguo ethûkûmagîre na njîra îno mbagîrîru kîrîa avatarîte ûtûûrorî na avotage gûtethia athîni.

1Ath 2:9

Ariû na aarî a îthe wetû, nîmûraririkana ûrîa twarutaga wîra na tûkîthînîka. Twarutaga wîra ûtukû na mûthenya nîguo tûtigatuîke mûrigo kûrî mûndû wana ûmwe wa cienyu vîndî îrîa twamûvunjagîria ûvoro mwaro wa Ngai.

2Ath 3:8

Tûtietîkagîra kûrîa irio cia mûndû tûtakûrîva. Nîtwarutaga wîra na vinya mûno ûtukû na mûthenya nîguo tûtigatuîke mûrigo kûrî mûndû wanarî ûmwe gatagatîrî kenyu.

1Tim 4:10

Ûvoro ûyû nîguo ûtûmaga tûthînîke na tûrute wîra na vinya, nîûndû tûrî na kîîrîgîrîro kûrî Ngai mûtûûra mwoyo ûrîa arî ke Mûvonokia wa andû onthe na makîria arîa metîkîtie.

1Pet 2:23

Rîrîa aarumirwe, ndeerîvîrîria na kûrumana. Rîrîa aathînirue, gûtirî mûndû eevîtîre, nwatî aaigire mwîrîgîrîro wake kûrî Ngai ûrîa ûtucanagîra cira na kîvooto.

1Pet 3:14

Nwatî wana mûngîthînîka nîûndû wa gwîka ûrîa kwagîrîrîte, mûrî arathime. Mûtigetigîre mûndû kana mûtangîke.

1Pet 3:9

Mwekwa naaî tigagani kwîrîvîrîria na naaî. Mwarumwa tigagani kwîrîvîrîria na irumi. Vandû va ûguo rathimanagani, nîûndû kîrathimo nîkîo Ngai aamwîrîîre rîrîa aamwîtire.

1Pet 4:19

Kwoguo andû arîa mathînagua kûringana na wendi wa Ngai, nîmagîrîrwe nîkwîthîrwa meigîte viû njararî cia Mûmbi wao na njîra ya gwîka maûndû maro. Nîûndû vîndî cionthe ethagîrwa arî mwîvokeku.

Juda 1:9

Wana nginya Mikaeli mûraika ûrîa mûnene ndeeka ûguo. Rîrîa Mikaeli aakararanagia na Ngoma ûvoro wîgiî ûrîa wagîrîrwe nî kûnengerwa mwîrî wa Musa, Mikaeli ndaaûmîrîria gûcokeria Ngoma na ciugo cia kûmûruma, nwatî aamwîrire atîrî, “Mwathani arogûkaania!”