1Akor 2:13 - ÎVUKU RÎA ÛVORO MWARO

¹³ Kwoguo tûtiaragia ûvoro wîgiî maûndû mama tûgîtûmagîra ciugo irîa twathomithirue na njîra ya ûûgî wa ûmûndû, nwatî twaragia tûgîtûmagîra ciugo irîa twathomithirue nî Roho. Kwoguo andû arîa marî na roho nîtûmataaragîria ûvoro wa ma wa kîîroho.

1Akor 2:13 ပူးပေါင်းရင်းမြစ်များ

Luka 12:12

Nîûndû îvinda rîu rîakinya, Roho Mûtheru nîakaamûthomithia ûrîa mwagîrîrwe nî kwîyarîrîria.”

Ciîko 2:4

Nao onthe nîmecûrirwe nî Roho Mûtheru, na makîambîrîria kwaria na nthiomi ciîngî wata ûrîa Roho ûcio aamavotithirie kwaria.

1Akor 1:17

Kristû ndaandûma nîguo mvatithanie. Nwatî aandûmire nîguo ngavunjie Ûvoro Mwaro. Aandûmire ngavunjie ûvoro ûcio ndagûtûmîra ûûgî ûrîa umanîte na ûûmûndû. Nekire ûguo nîguo gûkua gwa Kristû mûtharavarî gûtigaatuîke kwa mana.

1Akor 14:2

Andû arîa maragia na nthiomi matiîthagîrwa makîarîria andû nwatî methagîrwa makîarîria Ngai, nîûndû gûtirî mûndû wîthagîrwa agîtaûkîrwa nî maûndû marîa maragia. Matongoragua nî Roho makîaria ûma ûrîa ûrî nthithorî.

1Akor 2:1

Ariû na aarî a îthe wetû, rîrîa naûkire kûrî mue kûmûvunjîria ndûmîrîri îgiî nthitho ya Ngai ndiatûmîra ciugo ndito kana ûûgî mûnene.

1Akor 2:14

Mûndû wa wonthe ûtarî na Roho ndangîvota kwamûkîra iveo irîa ciumaga kûrî Roho wa Ngai. Andû ta acio meciragia ûcio nî ûrimû nîûndû vata waguo ûngîtuîrua tu na njîra ya Kîîroho.

1Akor 2:4

Ngîthomithia na ngîvunjia ndiatûmîra ciugo irî na ûûgî wa kîûmûndû irîa igucagîrîria andû, nwatî natûmîre ciugo cionanagia vinya ûrîa ûvecanagwa nî Roho wa Ngai.

1Akor 9:11

Ethîrwa nîtûvandîte mbegû ya kîîroho gatagatîrî kenyu, nîkwa arî ûndû mûnene tûngîketha kuuma kûrî indo cienyu cia gûkû nthî?

Aefeso 5:19

Aranagîriani na ciugo cia thaburi, nyîmbo cia gûkumia Ngai na nyîmbo cia kîîroho. Inagîrani Mwathani na mûmûkumagie na ngoro cienyu cionthe.

Akol 3:16

Tigani ûtonga wa ndûmîrîri ya Kristû wîkarage ngororî cienyu. Tûmagîrani ûûgî wonthe wenyu rîrîa mûkûthomithania na mûgûtaarana mue ene. Inagani thaburi, nyîmbo, nyîmbo cia kîîroho mûrî na ngatho ngororî cienyu.

1Pet 1:12

Ngai nîwaguûrîrie arathi aya atî maûndû marîa maarathaga matiarî ma kûmaguna o ene, nwatî maarî ma kûmûguna mue. Maatuirwe ndungata cia kwanîrîra maûndû marîa rîu mûrîkîtie kwîgua kûvîtûkîra kûrî anjaama arîa maamûvunjîrie Ûvoro Mwaro. Meekire ûguo matethereretue nî Roho Mûtheru ûrîa watûmîtwe kuuma îgûrû. Maûndû mama nîmo nginya araika mendaga kûmenya.

2Pet 1:16

Vîndî îrîa tue twamûmenyithirie ûvoro wîgiî gûka kwa Mwathani wetû Jesû Kristû arî na ûvoti mûnene, tî ng'ano cia gwîtungîra twamûganagîra. Nwatî nîtweyonere ûnene wake na metho metû.