1 Wakorinto 9:20 - Kivunjo New Testament 1999

²⁰ Ngyiwekyeri cha Myuda ko Wayuda, kundu ngyigalutsie Wayuda ura lo Yesu. Ko walya wakyeri wuchilyinyi wo mawawaso, ngyilewa cha ilyi ngyichilyio nyi mawawaso (maa chandu inyi ngyimonyi ngyilamchilyie nyi mawawaso), kundu ngyigalutsie ura lo Yesu walya wakyeri wuchilyinyi wo mawawaso.

1 Wakorinto 9:20 ပူးပေါင်းရင်းမြစ်များ

Mawuto Ga Wasu 16:3

Paulo kawia Timoteo naoshane na oe, kamṙuo kamṙina kyipfa kya Wayuda wawekyeri ngyuura tsilya; cha kyipfa woose waweichi kye awuye nyi Mkyiṟikyi.

Mawuto Ga Wasu 18:18

Numa ya iho Paulo kaengyeṟa ikaa pfo mfiri ifoi, naaho kasamana na walya waweiṙikyie Yesu, kayenda Shamu eiṙia ipalyipalyinyi. Pirisikyila na Akyila wakayenda hamwi na oe, ammbute njui ipfo Kyenkrea; cha kyipfa nalekoalya nyamu mbele ya Ruwa iwuta kuṙo.

Waroma 11:14

Kofia ngyeiṙima iwaenenga wunyenyi wandu wa samu yako ngyimonyi na ikyiṟa wandu waata.

Waroma 3:19

Kyasia luichi kye mbonyi tsoose uwawaso lugambie ko walya wawachilyie nyi uwawaso, kundu orio mndu nawio natsie, na wuyana woose wuchilyio nyi ianduyo lya Ruwa.

Wagalatia 2:19

Kyipfa inyi ko mbonyi tsa mawawaso ngyipfiie kundu ngyiwaṙe moo kyipfa kya Ruwa.

Wagalatia 4:21

Ngyiwienyi, nyoe mukundi ichilyio nyi mawawaso. Ngyesa mokyeicho kyindo mawawaso gagamba-pfoe?

Wagalatia 4:5

kundu nakyiṟe walya wawewachilyie nyi mawawaso, kundu soe luiṙime iambilyia iwa wana.

Wagalatia 5:18

Kyaindi mukosongoyo nyi Mumuyo, mukyeri wuchilyinyi wo mawawaso-pfo.