Yoshua 7:24 - Biblia Kikutu

²⁴ Avo Yoshua na Waizilaeli wose, wamsola Akani mwanage Zela na zisente na ikiwalo na ikibimhi cha zahabu na wanage wa ikimbigalo na wa ikitwanzi na ng'ombe zake na vihongwe na ng'hondolo na ikibanda chake na vinhu vose viyakalile navo, wavigala kubonde da Akoli.

Yoshua 7:24 ပူးပေါင်းရင်းမြစ်များ

Mwanduso 18:25

Sigesa kamba kotenda vivo, kuwakoma wanhu wanogile hamoja na wanhu wene nzambi! Havidahika bule, kwavija msemi wa isi yose kolondigwa yataguse goya.”

Kulawa 20:5

Sikuuvifugamile hebu kuvitambikila, kwavija niye Mndewa Imulungu wako nina migongo. Nowakoboza wana mbuli ya nzambi za tata zao, hata ulelo wa kadatu na wa ikane wa waja onihila.

Nongezi 15:27

Yosulukila faida ya ubokaji kowadununza wanhu wa mng'anda mwake, lakini yodigevuzikila hongo kokuwa mgima.

Yoshua 15:7

Imbaka ayo igendelela mbaka ako Debili kubonde da Akoli, na kugendelela umwambu wa kasikazini wa kuchola Giligali buga dikalile diilola na umtelemuko wa Adumimu ukalile mwambu wa kusini wa kubonde. Abaho ayo imbaka igendelela ako kuna inzasa ya Eni Shemeshi na kuhelela ako Eni Logeli.

Yoshua 22:20

Vino Akani mwanage Zela hatamaniligwe kwa ivinhu vilavigwe ili vibanangigwe, na ing'hasiliki iwezila umting'hano wose wa Izilaeli? Akani hafile heyo yaiyeka kwa nzambi yake.’”

Yoshua 6:18

Lakini sikumusole kinhu chochose kilavigwe ili kibanangigwe, mwahasola kinhu chochose kilavigwe ili kibanangigwe moitenda ing'hambi ya iwanhu wa Izilaeli iwe kinhu cha kubanangigwa na mogala gehile.

Yoshua 6:21

Abaho wakinanga kila kinhu kili mdibuga dijo, na wawakoma kwa sime, wambigalo na watwanzi na wana na wavele na ng'ombe na ng'hondolo na vihongwe.

Yoshua 7:1

Lakini iwanhu wa Izilaeli hawatamaniligwe bule kwa ivinhu vilavigwe ili vibanangigwe kwavija Akani kasola ivinhu viyagwe vilavigwe ili vibanangigwe. Akani kakala mwanage Kalimi, Kalimi mwanage Zabidi, Zabidi mwanage Zela, kulawa kabila da Yuda. Avo Mndewa Imulungu kawagevuzikila iwanhu wa Izilaeli.

Yoshua 7:23

Avo wavisola vinhu avo kulawa mkibanda wavigala kwa Yoshua na iwanhu wose wa Izilaeli. Wavika hasi kuulongozi wa Mndewa Imulungu.

Yoshua 7:26

Abaho walundiza mibwe mingi uchanha yake na ing'hali kuko mbaka lelo. Abaho Mndewa Imulungu kaleka kugevuzika. Avo, mbaka lelo twaga da hanhu aho dokemigwa bonde da Akoli.