Walawi 4:3 - Biblia Kikutu

³ “ ‘Kamba yatendile nzambi ayo mulava nhosa yagidiligwe mavuta na kagala gehile kwa wanhu, avo yamgalile Mndewa Imulungu bofu bigalo da ng'ombe dilibule kilema chochose, yadilave nhosa ya kusegesa nzambi zake ziyatendile.

Walawi 4:3 ပူးပေါင်းရင်းမြစ်များ

Kulawa 29:14

Lakini nyama yake na ing'hwembe na mavi gake uvisole ukavisome moto kunze ya ng'hambi yenu. Ino ayo nhosa ya kusegesa nzambi.

Kulawa 29:21

Sola damu kidogo ili muupango wa kulavila nhosa hamoja na gaja gamavuta ga kubakala ummizile Haluni na viwalo vake, vivija uwamizile wanage na viwalo vao, avo Haluni na wanage okuwa wang'ala na viwalo vao kumwangu niye.

Kulawa 29:7

Abaho usole gaja gamavuta ga kubaka, umgidile Haluni mdipala jake avo komulava kumwangu.

Kulawa 30:10

Mwanza umoja kwa mwaka Haluni yautende upango ung'ale kwa kugida mzimhembe zake damu ya nhosa ya kusegesa nzambi. Mbuli ayo itendigwe kila mwaka kipindi chose chonda kize. Upango awo ung'ala kwa Mndewa Imulungu.”

Walawi 1:10

“ ‘Kamba munhu kolava ng'hondolo hebu mbuzi kamba nhosa ya kusoma moto, mnyama ayo yalawe mkibumbila cha fugo yake na yawe mnyama wa kimbigalo yelibule kilema chochose.

Walawi 1:3

“ ‘Kamba munhu kolava bofu da ng'ombe mbigalo kamba nhosa ya kusomigwa moto kulawa mdibumbila da fugo yake, yasagule mnyama yelibule kilema chochose. Yamgale hana ulwivi lwa dihema da mting'hano ili munhu ayo yatogoligwe na Mndewa Imulungu.

Walawi 16:11

“Haluni yamsole ing'ombe wa nhosa ya kusegesa nzambi zake mwenyego ili yatende loholo da nzambi mbuli yake mwenyego na mbuli ya wanhu wa mng'anda mmwake, abaho yamchinje ing'ombe ayo.

Walawi 16:3

Haluni yahalonda kwingila hanhu hong'ala ng'hani tanhu yalave nhosa ya bofu bigalo da ng'ombe kwa nhosa ya kusegesa nzambi na ng'hondolo mbigalo kwa nhosa ya kusoma moto.

Walawi 16:5

“Wanhu wa Izilaeli wamgalile mbuzi wabili wa kimbigalo kwa nhosa ya kusegesa nzambi na wamgalile ng'hondolo wa kimbigalo imoja kwa nhosa ya kusoma moto.

Walawi 16:6

Haluni yamulave ayo ing'ombe wa kimbigalo kwa nhosa ya kusegesa nzambi zake mwenyego, na kutenda loholo da nzambi zake na wanhu wa mng'anda mmwake.

Walawi 4:14

Baho wahajuwa nzambi waitendile, wanhu wose wagale bofu bigalo da ng'ombe kamba nhosa ya kusegesa nzambi. Wadigale bofu dijo mdihema da mting'hano.

Walawi 4:23

Baho yahaijuwa nzambi yake iyatendile, yagale nhosa ya mbuzi wa kimbigalo yelibule kilema chochose.

Walawi 4:28

Baho yahaijuwa nzambi iyatendile, yagale mbuzi mtwanzi yelibule kilema chochose kamba nhosa ya kusegesa nzambi iyatendile.

Walawi 4:5

Abaho ayo imulava nhosa yagidiligwe gamavuta yasole damu kidogo ya dibofu na yaigale mdihema da mting'hano.

Walawi 5:6

na yalihe deni da nzambi yake iyatendile, yamgalile Mndewa Imulungu ng'hondolo wa kitwanzi hebu yagale mbuzi kulawa mdibumbila jake kamba nhosa ya kusegesa nzambi, na mulava nhosa yamtendele loholo.

Walawi 6:18

Wambigalo wose wa ulelo wa Haluni odaha kuja, kwavija nhosa ayo ibaguligwa mbuli ya hewo kulawa mzinhosa zilavagwa kwa Mndewa Imulungu kwa moto. Munhu yoyose yonda yaikwase kolondigwa yang'ale.’ ”

Walawi 8:12

Vivija Musa kamgidila Haluni gamavuta mdipala ili kumulava kwa Mndewa Imulungu.

Walawi 9:2

Musa kamulongela Haluni, “Sola bofu da ng'ombe wa kimbigalo wa nhosa ya kusegesa nzambi, vivija sola mwana ng'hondolo wa kimbigalo kwa nhosa ya kusoma moto, wanyama wose awo sikuwawe na kilema chochose. Abaho walavigwe nhosa kuulongozi wa Mndewa Imulungu.

Walawi 9:3

Walongele wanhu wa Izilaeli wagale mbuzi wa kimbigalo yalavigwe nhosa ya kusegesa nzambi, vivija wagale mwana ng'hondolo na bofu da ng'ombe weli na mwaka umoja na sikuwawe na kilema chochose ili walavigwe nhosa ya kusoma moto,

Kupetigwa 16:22

Lakini Musa na Haluni wagwa kingubanguba walonga, “Go Mndewa Imulungu, gweye uli mwanduso wa ugima wa wanhu wose. Vino munhu imoja yahakutendela gehile kowagevuzikila wanhu wose?”

Kupetigwa 8:8

Abaho wasole bofu dimoja bigalo da ng'ombe na nhosa ya ndiya, awo uusage unogile utibwilizigwe na mavuta. Vivija na gweye usole dibofu diyagwe da ng'ombe mbuli ya nhosa ya kusegesa nzambi.

Walumi 8:3

Kija hakidahike kutendigwa na Malagizo ga Musa mbuli ya kunyolila kwa unhu wa wanhu, Imulungu kasang'hana kwa kumtuma Mwanage mwenyego, yezile mulukuli luigalile na ng'huli zetu siye wene nzambi. Avo kazitagusa nzambi zili mulukuli lulo.

2 Wakolinto 5:21

Imulungu kamtenda ija yelibule nzambi yasole nzambi zetu, ili kubitila heyo Imulungu yatutende tunoge mgameso gake.

Waebulania 5:3

Kwa mbuli ayo, kolondigwa kulava nhosa, hatenda avo mbuli ya wanhu watendile nzambi waiyeka, lakini vivija kwa nzambi zake mwenyego.

Waebulania 9:12

Kilisito kengila mwanza umoja wiiyeka Mdigati Ding'alile Ng'hani hengile na damu ya mbuzi na ng'ombe kulava nhosa, ila kasola damu yake mwenyego na katutenda tulekeswe kipindi chose.