Walawi 12:7 - Biblia Kikutu

⁷ Mulava nhosa yamulavile nhosa ayo kuulongozi wa Mndewa Imulungu na yamtendele mtwanzi ayo nhosa ya loholo da nzambi. Avo mtwanzi ayo kokuwa kang'ala mbuli ya kulawa ng'hunga. Gano gago malagizo mbuli ya mtwanzi yoyose yolela mwana wa kitwanzi hebu wa kimbigalo.

Walawi 12:7 ပူးပေါင်းရင်းမြစ်များ

Walawi 1:4

Munhu ayo yeke mkono wake mdipala da ng'ombe ayo yolavigwa nhosa, avo nhosa ayo yotogoligwa kamba nhosa ya kulohola nzambi zake.

Walawi 12:6

“ ‘Siku za kutendigwa yang'ale zahesha, iwe kalela mwana wa kimbigalo hebu wa kitwanzi, yamgalile mulava nhosa hana ulwivi lwa dihema da mting'hano mwana ng'hondolo wa mwaka umoja mbuli ya nhosa ya kusoma moto na kinda da njiwa hebu huwa, mbuli ya nhosa ya kusegesa nzambi.

Walawi 12:8

“ ‘Kamba hadaha kugala mwana ng'hondolo, yagale huwa wabili hebu makinda mabili ga njiwa, imoja yawe nhosa ya kusoma moto na iyagwe yawe nhosa ya kusegesa nzambi. Mulava nhosa yamtendele mtwanzi ayo nhosa ya loholo da nzambi, na heyo kokuwa kong'ala.’ ”

Walawi 15:15

Mulava nhosa yawalave nhosa, imoja kwa nhosa ya kusegesa nzambi, iyagwe kwa nhosa ya kusoma moto. Baho mulava nhosa komtendela loholo da nzambi kuulongozi wa Mndewa Imulungu na kumsegesela ukufita kwake mbuli ya kulawa udusi.

Walawi 4:20

yatende kamba viyatendile kwa dija dibofu da ng'ombe wa nhosa ya kusegesa nzambi. Avo mulava nhosa kowatendela loholo mbuli ya nzambi zao, na nzambi zao zogeligwa kumgongo.

Walawi 4:26

Mavuta gose ga imbuzi ayo yagasome muupango wa kulavila nhosa kamba viyagasomile mavuta ga nhosa ya kugala kuilumba. Avo mulava nhosa komtendela loholo kilongozi ayo, na nzambi zake zogeligwa kumgongo.

Walawi 4:31

Mavuta gose yagalave, kamba viyatendile kwa mavuta ga nhosa ya kugala kuilumba, na mulava nhosa yagasome moto muupango wa kulavila nhosa kamba mnung'ho umnogeza Mndewa Imulungu. Avo mulava nhosa kotenda loholo da nzambi za munhu ayo, na nzambi za munhu ayo zogeligwa kumgongo.

Walawi 4:35

Abaho yagalave mavuta gose kamba viyatendile kwa mavuta ga dibofu da ng'hondolo wa nhosa ya kugala kuilumba, na mulava nhosa yagasome moto uchanha ya upango wa nhosa, uchanha wa zinhosa zilavigwe kwa Mndewa Imulungu kwa moto. Avo mulava nhosa kotenda loholo da nzambi za munhu ayo na nzambi zake zogeligwa kumgongo.

Walumi 3:23

Wanhu wose watenda nzambi na wahungukilwa na ukulu wa Imulungu.

Walumi 3:26

Katenda avo kulagusa viyanogile kwa wanhu mna ikipindi cha sambi na komtenda munhu yoyose yomtogola Yesu yanoge mgameso gake.

1 Wakolinto 7:14

Kwavija mkasano hamtogola Yesu kotogoligwa na Imulungu kwa kuilumba na mwehe wake, na mwehe hamtogola Yesu kotogoligwa na Imulungu kwa kuilumba na mkasano wake. Maza haili vivo, wana wao sambi watogoligwe na Imulungu, lakini Imulungu kawatogola.

Wagalatia 3:28

Avo kwa kuilumba na Yesu Kilisito wanhu wose kuduhu kuibagula. Kuduhu Wayahudi na Wagiliki, kuduhu watumwa na wanhu wakomboligwe, kuduhu wambigalo na watwanzi, wose kinhu kimoja.