YEREMIA 7:13 - Bibilia Kui Mdedie fo Kimochi

¹³ Nahong'u kidedo kya Mndumii nyi kikeri kile, na wulalu, kipfa mowuta mawuto halya ha mawicho hose, mulawemeicho handu njiwetsindie imdedia mnu mulaweidikia handu njiwei imlaha.

YEREMIA 7:13 ပူးပေါင်းရင်းမြစ်များ

MFANANO 1:24

Kipfa ngalaha, nanyo mukaleha; Ngahoṟwo owoko loko, kulakae msa aluambuya;

YESAYA 50:2

“Kyasia lilya njilecha nkili kulawewode mndu? Ngalaha, kuwode alehaluopfo? Ngesa! Owoko loko lui lufui njilemo ikiṟa? Ngesa njiwode pfinya tsechiṟa? Ambuya kui ideda lyako ngahadutsa ipalyipalyi, meda ya mṟinga ngaihaluo nuka ya msanga; makunga hayo haidaa kipfa kulawode mṟinga, wandu wapfa kipfa kya nyoda.

YESAYA 65:12

Inyi njechiwaṟehia iwoho kui oshu, na nyo wengi mochihongoma kundu mushinjo; kitewe nyi lilya njilelaha mlaidikiye; lilya njilededa mulakiicho; indi mukawuta mawicho oshangunyi loko, mukasambuṟa mbonyi njilalechihiṟo nyitso.

YESAYA 66:4

Inyi njechisambuṟa ngapo tsawo, njechiwaamtsia wuowu; kipfa lilya njilelaha waleidikia-pfo; na kiheri njilededa walenjiicho-pfo; indi walewuta mawicho oshangunyi loko, wakasambuṟa shilya njilawekundi.

YEREMIA 11:7

Kipfa njilewawasa waku wawo lilya njilewawuta orukenyi lo Misri, ngaweengeṟa iwawawasa wanjiindie mrasa mkonufu fo inu.

YEREMIA 11:8

Kyaindi walekunda injiindia- ma injicho-pfo, wakawona kicha kyawo nyi ihenda chandu wakukundia ko orikiki lowo na mrima ikuiwitie iichuo wuwicho. Kyasia ngawahoṟuo kihianyi na wuwawaso njilewawia wawuwade indi wo wakaleha iwuwada.”

YEREMIA 13:10

Wandu-wa wawicho waleha iadanyia madedo hako, wahenda wakahaṟie mrima yawo na iosha maruwa ha wongo, ihaṟundia na ihaindia, wechifanana na kiṟota kyo kinyamaṟikie.

YEREMIA 13:11

Kipfa chando kiṟota kiwadanyi na kitsi kya mndu, nyi wudo ndewanza mba ya Israeli yose, na mba ya Yuda, kundu wamanyike kui rina lyako, wanjiichike na injinenga kiṟumi. Kyaindi wo walakunde injiicho. Nyi inyi Mndumii-Ruwa ngahamba.’”

YEREMIA 25:3

Wokia maka fo ikumi na kaṟaṟu fo wumangi wo Yosia mana o Amoni mangi ya Yuda, mṟasa mfiri fu fo inu, maka ii makumi hawi na iṟaṟu (23) idedo lya Mndumii lechinjichea na inyi ngadeda nanyo, njechikure ngamenyi otuko na ihamba; kyaindi nyo mulenjiadanyiapfo.

YEREMIA 26:5

iadanyia madedo ha waṟundi wako waikimbi njilewaduma konu, njekure owinyi iwaduma; kyaindi nyo mulawaicho.

YEREMIA 29:19

Njechiwuta njido kipfa mulaleadanyia madedo hako njilemuwia orio kiheri kwi madumbu ha waṟundi wako na waikimbi nanyo mukaleha iwaicho. Nyi inyi Mndumii-Ruwa ngahamba.

YEREMIA 32:33

Walenjikumba mhongo handu ha shamu shawo; ma kikawa ngamewalosha kitsitsi walanjiadanyie ma iambia shiloshio shako.

YEREMIA 35:14

Iwawaso lilya Yonadabu mana Rekabu, aleinenga wana wake, ke walanyo mvinyo, waleliosha; nawo wekenyo mvinyo mṟasa mkonu fu fo inu pfo, kipfa waindia wuwawaso wo mku owo. Kyaindi inyi njilededa nanyo ngoseṟa na ngoseṟa; nanyo ma mulenjiadanyiapfo.

YEREMIA 35:15

Ngaweduma waṟundi wako ngoseṟa na ngoseṟa wakeri nyi waikimbi wamuwie orio umu onu nade ohendo loke luwicho, nasae mawuto hake nalekane ipfo kioshionyi keṟundia maruwa hengi. Na mukawuta mudo mochikaa kiidi kya orukalu njileinenga waku wanu nanyo. Indi ma muledeha kudu konu na injiadanyia pfo.

YEREMIA 35:17

Ko ikyo inyi Mndumii-Ruwa o matorito, Ruwa o Israeli, ngahamba kudi. Njechimuendie wandu wose wa Yuda na wenyi wose wa Yerusalemu mawicho hose njilededa kyawo, kipfa inyi njilededa nawo, indi walanjiadanyie, njilewalaha, indi walanjiidikie.”

YEREMIA 44:23

Mawicho ha hamukoya mṟasa inu kipfa mulewuta mwaano yemaya modonyi ko maruwa hengi na idekio Mndumii-Ruwa, mukaleha iindia ṟu lyake na iosha wuwawaso woke, na chile tsake na shilya awawasie shose.”

YEREMIA 44:4

Manya kudo, inyi orio kiheri njilemudikia waṟundi wako waikimbi njechihamba; Mulawute kindo-ki kiwicho njikisuuye!

YEREMIA 5:21

“Adanyienyi idedo li nyo masembo mulaichi kindo, muwode meso kyaindi mulawonyi kindo; muwode madu kyaindi mulaidime iicho.

YEREMIA 6:10

Njidede nau na nyiu echiidima injiicho. Ambuya madu hawo hamapfu, ma wechiidima iadanyia-pfo; ambuya idedo lya Mndumii lyawa kitaluo kowo; walachihiyo kyalo.

YEREMIA 7:25

Na inyi, wokia mkonu wandeanu walesama Misri, shika mkonu fo inu, njiwekeri imudumia waṟundi wako, nyiwo waikimbi, njilalemo.

HOSEA 11:2

Kikawa chandu njileengeṟa iwalaha, na wudo nawo waleengeṟa injidicha; Wakaengeṟa iindia Baali na idutsia uvumba sanamu tsa maruwa hengi.

HOSEA 11:7

Ambuya wandu wako nyi walenjidicha, wakakukumba wusingenyi, manya kuwode mowaashuo pfo.

HOSEA 9:17

Kyamba waleha imwadanyia, Mndumii-Ruwa oko nyi echiwakumba, nawo nyi wechihenda iṟahaṟaha kiidi kya mkambo ya wandu.

ZEKARIA 7:13

Kipfa lilyandi alefihiṟa walakunde iicho nawo wechifihiṟa ma njechiadanyiapfo, nyi wudo Mndumii Menyi Matorito ahamba.

MATAYO 23:37

“Iyo Yerusalemu, iyo Yerusalemu, kui mowaha waikimbi na iwo wai wadume kopfo kowakumbya maho, na sa kafoi da mbekundi isanya shiwana shapfo na chando nguku yekesanya malea hayo ipfo shi ya makungo hayo nanyo ma malakunde.