1SAMWELI 10:6 - Bibilia Kui Mdedie fo Kimochi

⁶ Mumuyo fo Mndumii-Ruwa fochikusokia na pfinya, na iyo nochiwooka ihamba shisuku handu hamu nawo nohaluke nowe mndu ungi.

1SAMWELI 10:6 ပူးပေါင်းရင်းမြစ်များ

MAITALA 11:17

Njechisoka napfo njidede na iyo; njechiwuta kienga kya mumuyo njilekuinenga, njiwainenge wanduwo. Nawo wechikudika mhanda foringa wanduwo handu hamu na iyo, kulache ikudika mhandafo iyo kumonyi.

MAITALA 11:25

Mndumii-Ruwa kasoka ai ipuchinyi kadeda nao. Numa kawuta kienga kya mumuyo sa aweinengie Mose, kainengia orio umu o wameku walya makumi mfungade. Mumuyo fulya fokiida na kowo, wameku wakawoka ihamba shisuku, kyaindi walakiwuuyese iwuta wudo.

MAITALA 11:26

Wameku wawi kiidi kya walya makumi mfungade walesambuṟo, nyi Eldadi na Medadi, wo waledeo kulya handu hesia moo mandi wodoyawo walehenda ihemenyi. Mumuyo fukawasokia wai kulya kulya handu hesia moo, wakawoka ihamba shisuku alya handu wawei.

MAITALA 11:29

Kyaindi Mose kamhaluo kambia, “Ngesa nowado nyi wunyenyi kipfa kyako? A kima Mndumii-Ruwa aweinenga wandu wake wose mumuyo foke nawo wakawa waikimbi!”

MATAYO 7:22

Kipfa mfiri fulya nyi kochikaapfo wafoi wenjiwesa wehamba, ‘A Mndumii, Mndumii, chi lulehamba shisuku kui rina lyafo, na rina lyafo lukawefuna nalyo waṟufu wawicho, na rina lyafo lukavetana nalyo maṟunda manene?’

WACHILI 14:6

Oweṟe mumuyo fo Mndumii-Ruwa fukaanga Samsoni ko pfinya, karanduo mwiso fulya cha mndu airanduo kidahina kya mburu. Samsoni alewia wafee wake ikyo kilewutika pfo.

WACHILI 15:14

Kekishika Lehi, Wafilisti wakacha wechidicha na ikapa kitohio. Peṟeseng'u mumuyo fo Mndumii-Ruwa fukasokia Samsoni na shiwoho shilya wawepfungie nasho Samsoni mawoko hake shikawa cha kitanyi kyaitso modonyi, na shilya shiwempfungie shikaoloka wanda.

WACHILI 3:10

Kyasia, mumuyo fo Mndumii-Ruwa fukachea Othinieli, nao kawa mchili o Waisraeli. Othinieli kahenda shidenyi nao Mndumii-Ruwa kadambika Kushan-rishathaimu mangi o Mesopotamia mawokonyi hake.

1SAMWELI 10:10

Sauli na mṟundi oke wekishika Gibea (Fumvuhu) kaambio nyi mamiingi fo waikimbi. Mumuyo fo Ruwa fukamchea kui pfinya, Sauli kawooka ihamba kisuku handu hamu nawo.

1SAMWELI 10:9

Sauli kaembeṟuka nalekane na Samweli Ruwa kailacha mrima fo Sauli. Shilya shose alewio nyi Samweli shikahoya mkonufo.

1SAMWELI 11:6

Oweṟe, Sauli kekiicho madedoho, mumuyo fo Mndumii-Ruwa fukamchea na pfinya, nyashi yake ing'anyi ikado.

1SAMWELI 16:13

Samweli kaira ombe loke luwode mafuda; kaletsia Dawidi mafuda oshangunyi lo wana wa mae. Oweṟe mumuyo fo Mndumii-Ruwa fukasokia Dawidi na pfinya ing'anyi, fukamkaya wokia mkonufo na mkonu ingi. Kiidima Samweli kawuya na mṟinyi fo Rama.

1SAMWELI 19:20

Nlyondi Sauli aleduma wandu wakembada. Kyaindi wekikoya mamwingi fo waikimbi wechihamba shisuku na Samweli kechilisongoya, mumuyo fo Ruwa fukasokia waṟundi walya wa Sauli, nawo wakawooka ihamba shisuku.