လ︀ုက︀ႃ 12:5 - Khamti Shan

⁵ က︀ူဝ်ႇဢ︀ꩫ︀်ႈꩬ︀ူဝႃႈက︀ူဝ်ႈꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ တ︀ူဝ်ႈꩬ︀ူမ︀ႆ︀ႛဢ︀ဝ်ႈတ︀ႆ︀ၢႈယ︀ဝ်ႇက︀ီး ပ︀ွႆ︀တ︀ူက︀်င︀ႃးလ︀ႆ︀ၢးပ︀ီꩫ︀်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩬ︀ိုင︀် က︀ူဝ်ႈက︀ꩫ︀်ႈတ︀ႃႉ။

လ︀ုက︀ႃ 12:5 ပူးပေါင်းရင်းမြစ်များ

မ︀တ︀်တ︀ႄး 10:28

က︀ူꩫ︀်းဢ︀ꩫ︀်ႈတ︀ူဝ်ႈမ︀ႆ︀ႛꩫ︀ႆ︀ၢႈꩬ︀ိုင︀် ဢ︀ဝ်ႈတ︀ႆ︀ၢႈꩬ︀ီ ၵ︀ွꩫ︀်မ︀ႆ︀ႛဢ︀ဝ်ႈတ︀ႆ︀ၢႈမ︀ဝ်ꩫ︀ႆ︀ႛမ︀ႆ︀ႛ ပ︀ီက︀ူဝ်ႈ။ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈတ︀ူဝ်ႈမ︀ႆ︀ႛတ︀မ︀ိူင︀်း ၵ︀ွꩫ︀်မ︀ႆ︀ႛတ︀မ︀ိူင︀်း ပ︀ွႆ︀တ︀ူက︀်င︀ႃးလ︀ႆ︀ၢးပ︀ီꩫ︀်ႈမ︀ႆ︀ႛꩬ︀ိုင︀် က︀ူဝ်ႈယ︀မ︀်ႈက︀ꩫ︀်ႈတ︀ႃႉ။

မ︀တ︀်တ︀ႄး 25:41

ယ︀ဝ်ႇက︀ီး ၸ︀ုင︀်က︀ူꩫ︀်းဢ︀ꩫ︀်ႈပ︀ႃႛꩬ︀ႆ︀ၢႇꩫ︀ႆ︀ႇၵ︀ဝ်မ︀ႆ︀ႛယ︀ႃႇ “ꩬ︀ူဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛက︀ိꩫ︀်ဝႆ︀ႇꩫ︀ႆ︀ႇၵ︀ဝ်ယ︀ႃႇ ဢ︀ွက︀်က︀ႃတ︀ႃႉ။ မ︀ူဝ်ႛၸ︀ႆ︀းဢ︀ꩫ︀်ႈမ︀ိူဝ်ႈလ︀ႂ်ႈက︀ေႃႇ မ︀ဝ်မ︀ွတ︀်ꩡ︀ၢင︀်ႈ ဢ︀ꩫ︀်ႈꩡ︀ႃႇၵ︀ုꩫ︀်ꩬ︀ူင︀်င︀ႆ︀းꩡ︀ႃႇတ︀ပ︀ေးမ︀ꩫ︀်းၵ︀ဝ်ꩭႅမ︀်းဝႆ︀ႇမ︀ႆ︀ႛ က︀ႃတ︀ူက︀်တ︀ႃႉ။

မ︀တ︀်တ︀ႄး 25:46

င︀ႆ︀းꩫ︀ႆ︀ႇꩬ︀ီ က︀ူꩫ︀်းꩭင︀်ႛဢ︀မ︀ႂ်းၵ︀ဝ်ယ︀ႃႇ င︀ႃးလ︀ႆ︀ၢးမ︀ႆ︀ႛ တ︀ီꩫ︀ႆ︀ႛၵ︀ၢမ︀်တ︀ၢမ︀်မ︀ဝ်ꩬ︀ုတ︀်ꩡ︀ၢင︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ က︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇၵ︀ဝ်ယ︀ႃႇ တ︀ီꩫ︀ႆ︀ႛ ဢ︀ꩬ︀ၢက︀်ႉထႃဝရ︀ꩫ︀မ︀်” ꩫ︀ဝꩫ︀်ႇ။

မ︀တ︀်တ︀ႄး 5:22

ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူဝ်ႇဢ︀ꩫ︀်ႈပ︀ီႈꩫ︀ွင︀်ႇၸ︀ူႛꩡ︀ဝ်ႛမ︀ႆ︀ႛ တ︀ေႃးꩬ︀ႃးꩫ︀ႆ︀ႇမ︀ႆ︀ႛꩫ︀ႆ︀ၢႈက︀ေႃႇ တ︀ီပ︀ႅတ︀်ႉတ︀ြႃးꩫ︀မ︀်။ က︀ူဝ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ ပ︀ၢဝ်ꩰတ︀ူꩰꩫ︀ꩬ︀ီဝႃႈꩫ︀ႆ︀ႇမ︀ႆ︀ႛယ︀ႃႇ ၵ︀ႆ︀ႇမ︀ဝ်က︀ႃးယ︀ုင︀်းတ︀ြႃးမ︀ႆ︀ႛ တ︀ီပ︀ႅတ︀်ႉတ︀ြႃးꩫ︀မ︀်။ က︀ူဝ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ တ︀ၢꩫ︀်ႛꩬ︀ယ︀ုက︀်ႉမ︀ႆ︀ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ွႆ︀တ︀ူက︀်င︀ႃးလ︀ႆ︀ၢးꩫ︀မ︀်။

မ︀ႃက︀ု 13:23

က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩬ︀ူၵ︀ႅတ︀်ꩬ︀ီဢ︀ူတ︀ႃႉ။ ꩡ︀ူဝ်ႈက︀ႃႈလ︀ၢႆ︀းဢ︀ꩫ︀်ႈꩫ︀ႆ︀ႇၵ︀ဝ် ꩵ︀ႈပ︀ႆ︀ပ︀ီꩫ︀်ႈꩫ︀ႆ︀ႇ ꩬ︀ူမ︀ႆ︀ႛက︀ဝ်ႈၵ︀ႆ︀ႈပ︀ျႃးမ︀ႃးယ︀ဝ်ႇ။

တ︀ႅတ︀်ꩬ︀ႃလ︀ေႃꩫ︀ိက︀် ႑ 4:6

ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ၸ︀ꩫ︀်းဢ︀မ︀ႂ်း ꩵ︀ႈထုက︀်ၸ︀ိတ︀်ပ︀ိူင︀်ႈလ︀ူင︀်။ ပ︀ူဝ်းၸ︀ိတ︀်က︀ီး က︀ူဝ်ႇဢ︀ꩫ︀်ႈၸ︀ိတ︀်ဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ွပ︀်ပ︀ွက︀်ႉဢ︀ူꩫ︀ꩬ︀ီ မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛ တ︀ူႈꩬ︀တ︀ိꩭႂ်ႛက︀တ︀်ႉꩰမ︀ႃးယ︀ဝ်ႇ။

ꩭေပ︀ရ︀ူး 10:31

တ︀ူက︀်ꩫ︀ႂ်းမ︀ိုဝ်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်ꩫ︀ꩫ︀ႆ︀ႇ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။

ပ︀ေတ︀ရ︀ု ႒ 2:4

က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ုꩫ︀်ꩬ︀ၢင︀်ဢ︀ꩫ︀်ႈꩭီတ︀်ဢ︀ပ︀ႅတ︀်ႉမ︀ႃးꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈက︀ေႃႇ ꩵ︀ႈပ︀ွႆ︀လ︀ွတ︀်ႉꩭႂ်ႛ။ ၵ︀ဝ်မ︀ႆ︀ႛ ပ︀ွႆ︀တ︀ူက︀်မ︀ိူင︀်းၵ︀ုꩫ︀်တ︀ႆ︀ၢႈၵ︀ွတ︀်ꩬ︀ီ က︀ႃႈဝꩫ︀်းဢ︀ꩫ︀်ႈၵ︀ဝ်မ︀ႆ︀ႛပ︀ႅတ︀်ႉတ︀ြႃးမ︀ဝ်ထိုင︀်ယ︀ႃႇ ဢ︀ꩫ︀်ႈꩫ︀မ︀်ႈꩬ︀ိင︀်လ︀ူင︀်မ︀ႆ︀ႛ ဢ︀ဝ်ႈꩬ︀ႆ︀ၢလ︀ီက︀်ၸ︀ုက︀်ဝႆ︀ႇဢ︀ူ။

ၿျႃၻိက︀်ႉ 14:7

ၵ︀ုꩫ︀်ꩬ︀ၢင︀်ဢ︀မ︀ႂ်းယ︀ႃႇ “ယ︀ၢမ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းက︀ူႈက︀ူဝ်ႇမ︀ႆ︀ႛ ပ︀ႅတ︀်ႉတ︀ြႃးꩫ︀ႆ︀ႇထိုင︀်မ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ က︀ူဝ်ႈယ︀မ︀်ႈꩬ︀ီ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။ ꩡ︀ဝ်ႛဢ︀ꩫ︀်ႈက︀ၢင︀်ႈꩭၢဝ်၊ လ︀င︀်ꩫ︀ိꩫ︀်ႈ၊ ꩫ︀မ︀်ႇꩬ︀မ︀်မ︀ုက︀်ႉတ︀ြႃင︀ႆ︀း ꩫ︀မ︀်ႇꩭွေႛꩫ︀ႆ︀ႇၵ︀ဝ်မ︀ႆ︀ႛ ၸ︀ၢꩫ︀်ꩬ︀ၢင︀်းꩫ︀ႆ︀ႇမ︀ႆ︀ႛ ပ︀ႆ︀ၢႛဝႆ︀ႈက︀ꩫ︀်ႈတ︀ႃႉ” ꩫ︀ꩬ︀ီတ︀ႅဝ်ဢ︀ူ။

ၿျႃၻိက︀်ႉ 15:4

ၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ မ︀ဝ်က︀ူဝ်ႈယ︀မ︀်ႈ၊ ꩡ︀ိုဝ်ႈၵ︀ိင︀်းꩡ︀ူဝ်ꩡ︀ဝ်ႛမ︀ႆ︀ႛ မ︀ဝ်ယ︀ူဝ်းယ︀ွင︀်ႛꩬ︀ီ ၸ︀ႂ်က︀ေႃႇဢ︀ူꩵ︀ႈပ︀ီꩫ︀်ႈတ︀ီၵ︀ႃႛ။ ၵ︀ိင︀်းတ︀ူဝ်ꩡ︀ဝ်ႛꩬ︀ူလ︀ိဝ်ႈꩫ︀ႆ︀ၢႈꩫ︀မ︀် မ︀ူတ︀်ꩡ︀ၢင︀်တ︀ီၵ︀ႃႛꩫ︀ႆ︀ႇ။ ဢ︀ꩫ︀်ႈၵ︀ိင︀်းတ︀ူဝ်ꩡ︀ဝ်ႛ ပ︀ႅတ︀်ႉတ︀ြႃးꩬ︀ိုဝ်ႈꩰꩫ︀ႆ︀ႇၵ︀ဝ်ယ︀ႃႇ ꩡ︀ုꩫ︀်ႈꩬ︀ၢက︀်ꩰꩫ︀ႆ︀ႇꩬ︀ီ က︀ူꩫ︀်းက︀ူႈၸ︀ꩫ︀်းꩫ︀ႆ︀ႇၵ︀ဝ် ၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ တ︀ီမ︀ႃးပ︀ႆ︀ၢႛဝႆ︀ႈက︀ꩫ︀်ႈတ︀ီၵ︀ႃႛꩫ︀မ︀်” ꩫ︀ꩬ︀ီဝႃႈက︀ꩫ︀်ႈဢ︀ူ။

ၿျႃၻိက︀်ႉ 20:14

ယ︀ဝ်ႇက︀ီး ၵ︀ုꩫ︀်တ︀ႆ︀ၢႈꩫ︀ၵ︀ႃ ၵ︀ူင︀်းတ︀ၢႆ︀ႈမ︀ႆ︀ႛ ꩫ︀ွင︀်ၸ︀ႆ︀းမ︀ႆ︀ႛပ︀ိုဝ်တ︀ူက︀်ၵ︀ွတ︀်ဢ︀ူ။ ꩫ︀ွင︀်ၸ︀ႆ︀းဢ︀မ︀ႂ်းယ︀ႃႇ တ︀ၢင︀်းတ︀ႆ︀ၢႈတ︀ုတ︀ိယ︀ꩫ︀မ︀်။