က︀ေႃရ︀ိꩫ︀်တ︀ု ႒ 5:18 - Khamti Shan18 ꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭီတ︀်၊ ဢ︀ꩫ︀်ႈꩭဝ်းမ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ဝ်ႈထုက︀်က︀ꩫ︀်ႈပ︀ွက︀်ႉꩫ︀မ︀်။ င︀ႆ︀းꩬ︀ီ ဢ︀မ︀ူးဢ︀ꩫ︀်ႈက︀ူꩫ︀်းတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈထုက︀်က︀ꩫ︀်ႈပ︀ွက︀်ႉꩫ︀ႆ︀ႇက︀ေႃႇ ꩭဝ်းမ︀ႆ︀ႛပ︀ူင︀်ႈဢ︀ၢပ︀်ႉꩭႂ်ႛမ︀ႃးယ︀ဝ်ႇ။ အခန်းကိုကြည့်ပါ။ |
ꩭလ︀ိုဝ်ꩫ︀က︀ေႃႇ ꩭဝ်းယ︀ႃႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈပ︀ီꩫ︀်ႈ ꩡ︀ဝ်ႛထႃဝရ︀ၸ︀ြႃးꩬ︀ူလ︀ိဝ်ႈꩫ︀ႆ︀ၢႈꩫ︀မ︀်ယ︀င︀်းꩫ︀ႆ︀ႇꩫ︀ꩫ︀ႆ︀ႇတ︀ွင︀်းဢ︀ူ။ မ︀ꩫ︀်းꩡ︀ဝ်ႛꩫ︀မ︀် က︀ႃႈꩡ︀ိုဝ်ႈယ︀င︀်းမ︀ႆ︀ႛ ၸ︀ၢꩫ︀်ꩬ︀ၢင︀်းမ︀ႃးꩫ︀ႆ︀ႇ။ ꩡ︀ႃႇမ︀ꩫ︀်းꩡ︀ဝ်ႛꩫ︀မ︀် ꩭဝ်းဢ︀ꩬ︀ၢက︀်ႉꩫ︀ိပ︀်ꩬ︀ီဢ︀ူꩫ︀ႆ︀ႇ။ ယ︀ဝ်ႇက︀ီး ꩭဝ်းမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ꩫ︀ႆ︀ႇ ꩡ︀ဝ်ႛပ︀ႃးလ︀ိဝ်ႈꩫ︀ႆ︀ၢႈꩫ︀မ︀်ယ︀င︀်းꩫ︀ႆ︀ႇ။ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛꩫ︀မ︀် ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀င︀်းလ︀ုင︀်တ︀င︀်းမ︀ိူင︀်း ဢ︀ဝ်ႈပ︀ီꩫ︀်ႈမ︀ႃးꩬ︀ီ ꩭဝ်းမ︀ႆ︀ႛက︀ေႃႇ ဢ︀ꩬ︀ၢက︀်ႉꩭႂ်ႛꩫ︀ႆ︀ႇ။
ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ လ︀ႆ︀ၢးပ︀ိူဝ်ႈလ︀ုက︀်ႉမ︀ꩫ︀်းꩡ︀ဝ်ႛ ဢ︀ဝ်ႈꩡ︀ႃတ︀ိႉက︀ူꩫ︀်းင︀ႆ︀း ၵ︀ၢမ︀်တ︀ႆ︀ၢႈꩭႂ်ႛမ︀ႃးꩫ︀ႆ︀ႇꩬ︀ီ ꩬ︀ူမ︀ႆ︀ႛတ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈထုက︀်က︀ꩫ︀်ႈပ︀ွက︀်ႉယ︀ဝ်ႇ။ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ ꩭႂ်ႛပ︀ူဝ်းꩬ︀ူ ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ မ︀ူတ︀်ꩡ︀ၢင︀်င︀ႆ︀း ꩡ︀ႂ်ႈၵ︀ၢဝ်ꩬ︀ီ ꩬ︀ူမ︀ႆ︀ႛ ဢ︀ꩫ︀်ႈဝႃႈတ︀ၢင︀်ဢ︀ပ︀ႅတ︀်ႉမ︀ဝ်ယ︀င︀်းပ︀ိူင︀်ႈလ︀ူင︀်ꩫ︀ႆ︀ႇꩫ︀မ︀်။
က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်း ဢ︀ꩫ︀်ႈဢ︀ီꩫ︀ူႈꩡ︀ၢင︀်ႈင︀ႆ︀းꩬ︀ီ ꩭႂ်ႛပ︀ူဝ်းꩡ︀ႃႇဢ︀ပ︀ႅတ︀်ႉက︀ူꩫ︀်းꩫ︀ႆ︀ႇၵ︀ဝ် ၵ︀ၢမ︀်တ︀ႆ︀ၢႈꩭႂ်ႛပ︀ီꩫ︀်ႈꩫ︀ႆ︀ႇ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ တ︀င︀်းပ︀ီႈꩫ︀ွင︀်ႇမ︀ꩫ︀်းꩡ︀ဝ်ႛၵ︀ဝ် ဝႃႈမ︀ိူꩫ︀်က︀ꩫ︀်ႈꩫ︀မ︀်။
ꩬ︀ူးက︀ျေးꩡ︀ူးဢ︀ꩫ︀်ႈꩫ︀ီႈ ဢ︀ꩫ︀်ႈတ︀ီမ︀်ႈက︀ုမ︀်က︀ႃႈꩫ︀င︀်ယ︀င︀်းꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈလ︀ုက︀်ႉက︀ၢင︀်ႈꩭၢဝ်မ︀ႆ︀ႛမ︀ႃးꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈက︀ၢင︀်ႈဝꩫ︀်း၊ ꩫ︀ိူꩫ︀်ႈ၊ ꩫ︀ၢဝ်ႈꩫ︀ႆ︀ႇၵ︀ဝ်မ︀ႆ︀ႛ ၸ︀ၢꩫ︀်ꩬ︀ၢင︀်းꩫ︀ႆ︀ႇꩫ︀မ︀် ပ︀ူင︀်ႈꩭႂ်ႛမ︀ႃးꩫ︀ႆ︀ႇ။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀င︀်က︀ၢင︀်ႈဝꩫ︀်း၊ ꩫ︀ိူꩫ︀်ႈ၊ ꩫ︀ၢဝ်ႈꩫ︀ႆ︀ႇၵ︀ဝ်ꩫ︀က︀ꩫ︀်ႈ မ︀ိူဝ်ႈလ︀ႂ်ႈက︀ေႃႇ ꩵ︀ႈလ︀ွက︀်ႉꩵ︀ႈလ︀ၢႆ︀ႈ။ က︀ꩬ︀င︀်မ︀ႆ︀ႛက︀ေႃႇ ꩭႂ်ႛပ︀ူဝ်းꩫ︀မ︀်ႈꩬ︀ိင︀်ꩫ︀ႆ︀ႇ ꩵ︀ႈꩭူမ︀်ႛꩵ︀ႈလ︀ၢပ︀်ႉ။
ꩫ︀ႆ︀ႇယ︀ႃႇ မ︀ႅတ︀်ႉတ︀ႃဢ︀ꩫ︀်ႈꩡ︀ႅတ︀်ႉꩫ︀မ︀်။ မ︀ႅတ︀်ႉတ︀ႃꩫ︀ႆ︀ႇယ︀ႃႇ ဢ︀ꩫ︀်ႈꩭဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭၢက︀်ႉꩵ︀ႈꩡ︀ႂ်ႈ။ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭဝ်းမ︀ႆ︀ႛꩭၢက︀်ႉꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ ꩭႂ်ႛပ︀ူဝ်းဢ︀ပ︀ႅတ︀်ႉꩭဝ်းမ︀ႆ︀ႛ တ︀ၢင︀်ႈတ︀ူဝ်ႈꩭဝ်းꩬ︀ီၵ︀ၢမ︀်ꩭႂ်ႛꩫ︀ႆ︀ႇ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ ꩭီတ︀်တ︀ူဝ်ႈၵ︀ႅက︀်ꩬ︀ီ ပ︀ွႆ︀ꩡ︀ႂ်ႇမ︀ႃးယ︀ဝ်ႇ။