က︀ေႃရ︀ိꩫ︀်တ︀ု ႑ 6:11 - Khamti Shan11 မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛ ꩬ︀ူက︀မ︀်ႈၸ︀ွင︀်း ပ︀ီꩫ︀်ႈင︀ႆ︀းမ︀ႃးꩫ︀မ︀်။ ꩫ︀ႆ︀ႇꩫ︀က︀ေႃႇင︀ႆ︀ႚယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩭဝ်း ဢ︀ပ︀ႅတ︀်ႉꩬ︀ူမ︀ႆ︀ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ၵ︀ႃ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ုက︀်ႉꩬ︀ီꩭႂ်ႛင︀ႆ︀း ꩬ︀ူမ︀ႆ︀ႛ ဢ︀ဝ်ႈမ︀ူတ︀်ꩡ︀ၢင︀်ꩬ︀ီ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ယ︀ဝ်ႇ။ အခန်းကိုကြည့်ပါ။ |
က︀ေႃရ︀ိꩫ︀်တ︀ု ႑ 6:11
52 ပူးပေါင်းရင်းမြစ်များ
က︀ဝ်ႈဝႃႈက︀ွတ︀်။ ꩫ︀ႂ်းꩬ︀ွင︀်ၵ︀ႃမ︀ႆ︀ႛ က︀ူဝ်ႇဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩬ︀ီ မ︀ိူဝ်းꩭိူꩫ︀်းက︀ႃꩫ︀ႆ︀ႇယ︀ႃႇ ၸ︀ူႛက︀ီပ︀်ၵ︀ွꩫ︀်ꩫ︀မ︀်။ ၸ︀ႃရ︀ိꩬ︀ႄꩵ︀ႈꩡ︀ႂ်ႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူဝ်ႇဢ︀ꩫ︀်ႈၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ယ︀ူဝ်းယ︀ွင︀်ႛꩫ︀ႆ︀ႇယ︀ႃႇ တ︀ီꩫ︀ႆ︀ႛတ︀ူက︀်တ︀မ︀်ꩫ︀မ︀်။ က︀ူဝ်ႇဢ︀ꩫ︀်ႈက︀ွမ︀်းꩫ︀ွမ︀်းမ︀ႆ︀ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛတ︀ီယ︀ူဝ်းယ︀ွင︀်ႛꩫ︀မ︀်” ꩫ︀ဝꩫ︀်ႇ။
ၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀ွင︀်ဢ︀မ︀ႂ်းမ︀ႆ︀ႛ မ︀ဝ်ယ︀ၢꩫ︀်မ︀ဝ်ယ︀ၢꩫ︀် မ︀ႃးလ︀ူင︀်းꩬ︀ီ ꩫ︀မ︀်ႇဢ︀ဝ်ႈပ︀ွပ︀်ႉပ︀ႅပ︀်ႉဢ︀ူ။ က︀ူꩫ︀်းဢ︀ꩫ︀်ႈꩭိမ︀်းꩫ︀ွင︀်မ︀ႆ︀ႛပ︀ႂ်ႇꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈꩫ︀မ︀်ႇပ︀ွပ︀်ႉပ︀ႅပ︀်ႉꩫ︀ႆ︀ႇမ︀ႆ︀ႛ ထႃႛꩬ︀ီဢ︀ူဢ︀ူ။ မ︀ိူဝ်ႈꩫ︀မ︀်ႇပ︀ွပ︀်ႉပ︀ႅပ︀်ႉꩫ︀ႆ︀ႇ ၸ︀ူႛဢ︀ꩫ︀်ႈက︀ꩫ︀်ႛꩫ︀ႂ်းꩫ︀ွင︀်မ︀ႆ︀ႛ လ︀ူင︀်းဢ︀ွꩫ︀်ႈꩫ︀ႆ︀ႇ ယ︀ေႃးက︀ႃက︀ႃႈꩫ︀င︀်ယ︀င︀်းꩫ︀ႆ︀ႇꩭႆ︀ၢက︀ႃင︀ႆ︀းꩫ︀မ︀်။
မ︀ႂ်းယ︀ႃႇ ꩭွေႛတ︀ႃႈက︀ူꩫ︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ဝႃႈက︀ႃပ︀ုတ︀်ꩭႂ်ႛဢ︀ူ။ ၵ︀ဝ်မ︀ႆ︀ႛ လ︀ုက︀်ႉဢ︀ꩫ︀်ႈꩫ︀ပ︀်ꩬ︀ိင︀်မ︀ႆ︀ႛ ဢ︀ဝ်ႈထိုင︀်ဢ︀ꩫ︀်ႈလ︀ႅင︀်းꩬ︀ီ လ︀ုက︀်ႉက︀ꩫ︀်ႛတ︀ႂ်ႛဢ︀ႃꩫ︀ႃၵ︀ုꩫ︀်ꩬ︀ူင︀်မ︀ႆ︀ႛ ဝႃႈဢ︀ဝ်ႈထိုင︀် က︀ꩫ︀်ႛတ︀ႂ်ႛဢ︀ႃꩫ︀ႃၸ︀ြႃးပ︀ီꩫ︀်ႈꩡ︀ဝ်ႛဢ︀ူ။ ꩭႂ်ႛပ︀ူဝ်းၵ︀ဝ် က︀ဝ်ႈမ︀ႆ︀ႛယ︀ုမ︀်ယ︀မ︀်ႈꩬ︀ီ ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛဢ︀ပ︀ႅတ︀်ႉပ︀ွႆ︀ꩭႂ်ႛင︀ႆ︀း က︀ုမ︀်ႛက︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ꩫ︀ႆ︀ႛၵ︀ဝ်ႛꩫ︀ႆ︀ႇ မ︀ႂ်းဝႃႈꩭီတ︀်ဢ︀ူ” ꩫ︀ꩬ︀ီဝႃႈဢ︀ူ။
င︀ႆ︀းꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛ လ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ လ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ꩭွင︀်ႇဢ︀ူ။ ဢ︀ꩫ︀်ႈမ︀ꩫ︀်းꩡ︀ဝ်ႛꩭွင︀်ႇဝႆ︀ႇꩫ︀ႆ︀ႇၵ︀ဝ်မ︀ႆ︀ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ဢ︀ူ။ ဢ︀ꩫ︀်ႈမ︀ꩫ︀်းꩡ︀ဝ်ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇၵ︀ဝ်မ︀ႆ︀ႛ မ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛ ပ︀ူင︀်ႈꩭႂ်ႛမ︀ႃးဢ︀ူ။
ပ︀ီႈꩫ︀ွင︀်ႇꩡ︀ိူဝ်းၸ︀ြႃးပ︀ီꩫ︀်ႈꩡ︀ဝ်ႛ ဝီင︀်းက︀ေႃရ︀ိꩫ︀်တ︀ုၵ︀ဝ်ꩴ︀း ꩬ︀ူꩡ︀ဝ်ႛယ︀ႃႇ ဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ မ︀ူတ︀်ꩡ︀ၢင︀်ယ︀ဝ်ႇ။ ၸ︀ြႃးပ︀ီꩫ︀်ႈꩡ︀ဝ်ႛ ၸ︀ူႛပ︀ီꩫ︀်ႈꩡ︀ဝ်ႛꩭဝ်းꩫ︀ၵ︀ႃꩡ︀ဝ်ႛၵ︀ဝ်ယ︀ႃႇ ꩬ︀ူင︀ႆ︀း က︀ူꩫ︀်းဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ပ︀ၢႆ︀ႛဝႆ︀ႈꩫ︀ႆ︀ႇၵ︀ဝ်က︀ူႈက︀ူဝ်ႇမ︀ႆ︀ႛ ꩭွင︀်ႇဝႆ︀ႇꩫ︀ႆ︀ႇ ꩭၢင︀်းမ︀ူတ︀်ꩡ︀ၢင︀်ꩫ︀မ︀်။
ꩫ︀ႆ︀ႇꩫ︀က︀ေႃႇ က︀ူꩫ︀်းမ︀ႆ︀ႛ ꩬ︀ိုဝ်ႈတ︀ူဝ်ဢ︀ူꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉꩫ︀ႆ︀ႇ က︀ူꩫ︀်းက︀မ︀်ႈက︀ျမ︀်းꩬ︀ိꩫ︀်ꩬ︀ီꩵ︀ႈꩡ︀ႂ်ႈ၊ လ︀ၢႆ︀းပ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီꩫ︀ၢႆ︀ႈꩫ︀မ︀်ꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ င︀ႆ︀းꩬ︀ီ ꩭႂ်ႛပ︀ူဝ်းက︀ျူးꩭဝ်းꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇ ꩭဝ်းက︀မ︀်ႈက︀ျမ︀်းꩬ︀ိꩫ︀်ဢ︀ဝ်ႈမ︀ဝ်ꩡ︀ႂ်ႈꩬ︀ီ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈမ︀ႃးယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ဝ်ႈတ︀ၢင︀်းက︀ျမ︀်းꩬ︀ိꩫ︀်ယ︀ႃႇ ၸ︀ႂ်မ︀ႆ︀ႛက︀ေႃႇ ꩬ︀ိုဝ်ႈတ︀ူဝ်ဢ︀ူꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛꩵ︀ႈမ︀တ︀်ႉ။
က︀ျမ︀်းလ︀ိက︀်ႉမ︀ႆ︀ႛ “က︀ူဝ်ႇဢ︀ꩫ︀်ႈဢ︀ဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ မ︀ꩫ︀်းမ︀ႆ︀ႛꩬ︀ိုဝ်ႈတ︀ူဝ်ဢ︀ူꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉꩫ︀ႆ︀ၢႈꩬ︀ိုင︀် ဢ︀ꩬ︀ၢက︀်ႉတ︀ီꩫ︀ႆ︀ႛꩫ︀ိပ︀်ꩫ︀မ︀်” ꩫ︀ꩬ︀ီ ဝႃႈဝႆ︀ႇဢ︀ူ။ င︀ႆ︀းꩫ︀ႆ︀ႇꩬ︀ီ က︀ူဝ်ႇဢ︀ꩫ︀်ႈတ︀ၢင︀်းက︀မ︀်ႈက︀ျမ︀်းꩬ︀ိꩫ︀်မ︀ႆ︀ႛ ပ︀ိုင︀်ႈဢ︀ိင︀်ႈꩫ︀ႆ︀ႇၵ︀ဝ်မ︀ႆ︀ႛယ︀ႃႇ ၸ︀ႂ်မ︀ႆ︀ႛက︀ေႃႇꩬ︀ိုဝ်ႈတ︀ူဝ်ဢ︀ူꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛꩵ︀ႈမ︀တ︀်ႉꩫ︀ꩫ︀ႆ︀ႇ ꩡ︀ုꩫ︀်ႈꩬ︀ႃႚꩬ︀ႃႚꩫ︀မ︀်။
ꩡ︀ႃႇလ︀ိူင︀်ႈ လ︀ႆ︀ၢးပ︀ိူဝ်ႈ ဢ︀ꩫ︀်ႈက︀ျူးမ︀ဝ်ꩡ︀ႂ်ႈ ꩫ︀ႆ︀ႇၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ ၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀မ︀်ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛ ၿျႃၻိက︀်ႉဝႆ︀ႇဢ︀ူ။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ႃပ︀ြႃꩭၢမ︀်မ︀ႆ︀ႛ “လ︀ႆ︀ၢးပ︀ိူဝ်ႈမ︀ႂ်းꩬ︀ီ က︀ူꩫ︀်းတ︀င︀်းမ︀ိူင︀်းမ︀ႆ︀ႛ က︀ဝ်ႈတ︀ီပ︀ူင︀်ႈဢ︀က︀ိဝ်းꩫ︀မ︀်” ꩫ︀ꩬ︀ီ ၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇ ဝႃႈမ︀ႃးဢ︀ူ။
ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူမ︀ႆ︀ႛꩡ︀ဝ်ႛယ︀ေꩬ︀ုꩭၢက︀်ႉꩫ︀ႆ︀ႇꩬ︀ီ တ︀ူႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛလ︀ူင︀်ꩫ︀မ︀်။ ꩬ︀ူယ︀ႃႇ က︀ုမ︀်ႛဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ လ︀ိူက︀်ႉက︀ီပ︀်ၵ︀ေꩬ︀ေဝႆ︀ႇဢ︀ွꩫ︀်ႈတ︀ၢင︀်းꩫ︀ႆ︀ႇꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူမ︀ႆ︀ႛဢ︀ဝ်ႈၵ︀ွꩫ︀်တ︀ꩫ︀်းၵ︀ူဝ်းမ︀ꩫ︀်းꩡ︀ဝ်ႛၵ︀ေꩬ︀ေဝႆ︀ႇꩬ︀ီလ︀ိူင︀်ႈ ꩬ︀ူၵ︀ၢဝ်ႈၵ︀ၢမ︀်းꩡ︀ဝ်ႛယ︀ေꩬ︀ုမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈင︀ႆ︀း ဢ︀ꩫ︀်ႈမ︀ꩫ︀်းꩡ︀ဝ်ႛၵ︀ေꩬ︀ေမ︀ႆ︀ႛꩫ︀ႆ︀ႛꩭၢပ︀်ႉဢ︀ဝ်ႈꩬ︀ီလ︀ိူင︀်ႈ ꩬ︀ူမ︀ႆ︀ႛ ဢ︀ဝ်ႈပ︀ီꩫ︀်ႈက︀ူꩫ︀်းꩬ︀ိုဝ်ႈတ︀ူဝ်ယ︀ဝ်ႇ။
ပ︀ႆ︀ႉꩭဝ်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်း ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီ ꩬ︀ိုဝ်ႈꩰတ︀ူဝ်ꩰꩡ︀ူးက︀ႂ်ႛက︀ꩫ︀်ႈꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭူဝ်ꩡ︀ႂ်ႈꩭဝ်းမ︀ႆ︀ႛ ꩡ︀ႂ်ႈဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ် ꩭႂ်ႛပ︀ူဝ်းက︀ၢင︀်းꩫ︀ႆ︀ႇ ဢ︀ဝ်ႈꩫ︀ိူတ︀်ႉꩡ︀ဝ်ႛၵ︀ရ︀ီတ︀်ၸ︀ွက︀်င︀ႆ︀း တ︀ူဝ်ႈꩭဝ်းမ︀ႆ︀ႛက︀ေႃႇ ဢ︀ဝ်ႈꩫ︀မ︀်ႇဢ︀ꩫ︀်ႈမ︀ူတ︀်ꩡ︀ၢင︀်ꩫ︀ႆ︀ႇ ꩬ︀ုက︀်ႉꩭႂ်ႛယ︀ဝ်ႇꩰ။
င︀ႆ︀းက︀ီး က︀ူဝ်ႇဢ︀ꩫ︀်ႈ လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ꩫ︀ၢပ︀်ႉမ︀ဝ်ၵ︀ၢꩫ︀်း၊ ꩫ︀ိူတ︀်ႉလ︀ိက︀်ႉၵ︀တ︀်ႉဢ︀ꩫ︀်ႈၸ︀ူႛꩡ︀ဝ်ႛမ︀ႆ︀ႛ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛမ︀ႆ︀ႛက︀ေႃႇ မ︀ဝ်မ︀တ︀်ႉဢ︀ꩫ︀်ႈမ︀ူတ︀်ꩡ︀ၢင︀်၊ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈၸ︀ူႛꩡ︀ဝ်ႛမ︀ႆ︀ႛ ဢ︀ီꩫ︀ူႈမ︀ႆ︀ႛက︀ေႃႇ ꩡ︀ူဝ်က︀ႃးꩫ︀ႆ︀ႇယ︀ႃႇ တ︀ၢမ︀်ဢ︀ꩫ︀်ႈၵ︀ိူင︀်ႈꩫ︀ီႈက︀ူဝ်ႈꩬ︀ႃ တ︀ီꩫ︀ႆ︀ႛၵ︀ၢမ︀်မ︀ဝ်ပ︀ိတ︀်ႉꩫ︀မ︀်။
ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူမ︀ႆ︀ႛပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈဢ︀လ︀ၢင︀်းမ︀ꩫ︀်းꩡ︀ဝ်ႛ မ︀ႆ︀ၢလ︀ိူက︀်ႉဝႆ︀ႇꩬ︀ီ ဢ︀ဝ်ႈၵ︀ွꩫ︀်မ︀ꩫ︀်းꩡ︀ဝ်ႛ ဢ︀ဝ်ႈပ︀ီꩫ︀်ႈၸ︀ꩫ︀်းဢ︀ꩫ︀်ႈမ︀ူတ︀်ꩡ︀ၢင︀်ꩭႂ်ႛမ︀ႃးယ︀ဝ်ႇ။ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇ ꩭႂ်ႛပ︀ူဝ်းꩬ︀ူ ၵ︀ၢမ︀်းꩡ︀ဝ်ႛယ︀ေꩬ︀ုၵ︀ရ︀ီတ︀်ထွမ︀်ꩡ︀ွမ︀်းꩬ︀ီ ဢ︀ပ︀ႅတ︀်ႉꩬ︀ူမ︀ႆ︀ႛ ဢ︀ဝ်ႈꩫ︀ိူတ︀်ႉမ︀ꩫ︀်းꩡ︀ဝ်ႛ ꩬ︀ုက︀်ႉꩬ︀ေၸ︀ေလ︀ွႆ︀းꩭႂ်ႛꩫ︀ႆ︀ႇꩫ︀မ︀်။ ꩬ︀ူမ︀ႆ︀ႛ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛဢ︀ၢꩫ︀်တ︀ၢꩫ︀်ဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ႅမ︀်းꩬ︀ႃတ︀ီမ︀်ႈꩰက︀ႃတ︀ႃႉ။
ꩫ︀မ︀်ႇဢ︀မ︀ႂ်းယ︀ႃႇ ꩫ︀င︀်ꩫ︀မ︀်ႇဢ︀ꩫ︀်ႈင︀ႆ︀ႚꩬ︀ူ ၵ︀ၢမ︀်မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩬ︀ီ ꩬ︀ူမ︀ႆ︀ႛၵ︀ေꩬ︀ေꩭႂ်ႛꩫ︀ႆ︀ႇꩫ︀က︀ꩫ︀်ႈꩫ︀မ︀်။ ၵ︀ၢမ︀်မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩫ︀ꩫ︀ႆ︀ႇယ︀ႃႇ ဢ︀ꩫ︀်ႈꩬ︀ုက︀်ႉၵ︀ႆ︀းတ︀ူဝ်ႈꩭၢင︀်ႈꩵ︀ႈꩡ︀ႂ်ႈ။ ဢ︀ꩫ︀်ႈꩫ︀ႂ်းꩡ︀ႂ်ႈၵ︀ွꩫ︀်ꩬ︀ူမ︀ႆ︀ႛ ꩡ︀ုꩫ︀်ႈꩰလ︀ႅင︀်းꩰက︀ႃꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ူꩭႂ်ႛက︀တ︀ိꩫ︀ႆ︀ႇꩫ︀မ︀်။ ဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀် လ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇမ︀ႆ︀ႛ ꩭီတ︀်င︀ဝ်ႛꩬ︀ီ ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇၵ︀ေꩬ︀ေꩭႂ်ႛꩫ︀မ︀်။
ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ဝ်ႛꩬ︀ၢက︀်ႉꩬ︀ေဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်း၊ ဢ︀ꩫ︀်ႈလ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ ဢ︀ွꩫ︀်ႈတ︀ၢင︀်းလ︀ေႚလ︀ေႚꩫ︀ိပ︀်ပ︀ွက︀်ႉမ︀ႃးꩬ︀ီ ဢ︀ꩫ︀်ႈꩡ︀ဝ်ႛꩭူဝ်ၵ︀မ︀်းမ︀ိူင︀်းက︀ၢင︀်ႈတ︀င︀်းလ︀ုင︀်မ︀ႆ︀ႛ ဢ︀ုပ︀်ႉပ︀ိုင︀်ꩫ︀ႆ︀ႇက︀ေႃႇ ꩬ︀ူꩡ︀ဝ်ႛမ︀ႆ︀ႛ ဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ႅမ︀်းꩬ︀ႃက︀တ︀ႃႉ။ မ︀ꩫ︀်းꩡ︀ဝ်ႛ ꩭဝ်းမ︀ႆ︀ႛꩭၢက︀်ႉꩫ︀ႆ︀ႇꩬ︀ီ ဢ︀ဝ်ႈꩫ︀ိူတ︀်ႉမ︀ꩫ︀်းꩡ︀ဝ်ႛ လ︀ုက︀်ႉဢ︀ပ︀ႅတ︀်ႉꩭဝ်းမ︀ႆ︀ႛ ဢ︀ဝ်ႈလ︀ွတ︀်ႉꩭႂ်ႛယ︀ဝ်ႇက︀ီး
ကြော်ငြာတွေ