LOUKAS 8:47 - KA BAIBL

⁴⁷ Kata ka briew te haba ka la ïohi ba kam lah rieh shuh, da kaba khynñiuh ka la wan, bad haba ka la dem khrup ha khmat jong U, ka la ïathuh ha U ha khmat uta u paidlang baroh, na ka balei ba ka la lah ktah ïa U, bad kumno ba la lah pynkhiah ïa ka kumta kumta hi.

Khasi CL Bible (BSI)

⁴⁷ Kata ka kynthei ka la ïohi ba la lap ïa ka, kumta ka la wan da kaba khynñiuh bad ka dem khrup ha ki kjat jong U Jisu. Hangta ha khmat jong uwei pa uwei baroh, ka la ïathuh ïa u balei ba ka la ktah ïa u bad kumno ba la pynkhiah ïa ka shisyndon.

LOUKAS 8:47 ပူးပေါင်းရင်းမြစ်များ

SALM 2:11

To shakri ïa U Trai ha ka jingsheptieng, bad to ïakmen ha ka jingkhynñiuh.

SALM 38:9

Ko Trai, ka jingkwah jong nga baroh ka don ha khmat jong me; bad ïa ka jingud jong nga ym shym buhrieh na me.

SALM 66:16

Ale, bad to sngew, phi baroh kiba sheptieng ïa U Blei, te ngan pynbna ïa kaba u la leh ïa ka mynsiem jong nga.

ISAÏAH 66:2

Naba ïa kine kiei kiei baroh ka kti jong nga ka la thaw, te kumta kine kiei kiei baroh ki la wan long,” ong U Trai: “hynrei, ha une u briew ngan khmih, wat ha uta uba sngewduk bad uba sngewsih ka mynsiem, bad uba khynñiuh ha ka ktien jong nga.

HOSIA 13:1

Mynba u Ephraim u la kren, la don kaba khynñiuh; u la pynkyntiew ïa lade ha Israel: hynrei, mynba u la palat ha u Baal, u la ïap.

HOSIA 5:3

“Nga ithuh ïa u Ephraim, ïa u Israel ruh ym shym la buhrieh na nga: namar mynta, ko Ephraim, me la leh nuti, u Israel u la bit-tngit.

HABAKKUK 3:16

Nga la ïohsngew, te ka kpoh jong nga ka la kyiuh, ki rmiang shyntur jong nga ki la khynñiuh ha kata ka jingsawa; ka jingpyut ka la bsut sha ki shyieng jong nga, bad nga la kyiuh ha la ka jaka: ba ngan ïoh shongthait ha ka sngi ka jingjynjar, haba ka wan kiew pyrshah ïa uta u paidbah uba wan bun kynhun ban hiar thma ïa u.

MATHAÏOS 28:8

Kumta, haba ki la leit noh kloi na kata ka jingtep, da kaba sheptieng bad da ka jingkmen bakhraw, ki la ïaphet noh ban ïathuh ha ki synran jong u.

MARKOS 5:33

Hynrei, kata ka briew, da kaba sheptieng bad ba khynñiuh, ba ka da sngewthuh ïa kaei ba la leh ha ka, ka la wan bad ka la dem ngon ha khmat jong U, bad ka la ïathuh ha U ïa kaba shisha baroh.

LOUKAS 8:46

U Jisu te U la ong, “Don mano re mano ba la ktah ïa nga; naba nga la sngewthuh ba ka bor ka la mih noh na nga.”

LOUKAS 8:48

Te U la ong ha ka, “To kyrmen, ko khun, ka jingngeit jong pha ka la pynkhiah ïa pha; to khie leit ha kaba suk.”

KI KAM 16:29

U te u la pan ïa ki jingshai, bad u la rynsied kynsan shapoh, bad ba u la khynñiuh namar kaba sheptieng, u la dem khop ha khmat u Paul bad u Silas,

1 KORINTH 2:3

Nga te nga la long lem bad phi ha ka jingtlot bad ka jingsheptieng bad ka jingkhynñiuh shibun eh.

2 KORINTH 7:15

Bad ka jingsngewieit jong u ïa phi ka kham jur shikatdei eh, haba u kynmaw ïa ka jingkohnguh jong phi baroh, kumno ba da ka jingsheptieng bad ka jingkhynñiuh phi la ïa-pdiang ïa u.

PHILIPPI 2:12

Kumta te, ko hep ba-ieit jong nga, kumba ha la ka sngi phi la kohnguh, ym tang ha khmat jong nga, hynrei, mynta, kham tam eh ha kaba ngam don ha khmat keiñ, to trei dep noh ïa ka jingpynim jong phi hi da ka jingtieng bad ka jingkhynñiuh;

HEBRU 12:28

Naba kumta, haba ngi pdiang ïa ka hima ka bym lah pynkhih, to ngin ïoh ka jingsngewnguh, da kaba ngin ai ka jingshakri kaba pynsngewbha ïa U Blei da ka burom bad ka jingtieng burom;

1 SAMUEL 16:4

Bad u Samuel u la leh ïa kata kaba la kren U Trai bad u la wan sha Bethlehem. Te kita ki tymmen basan kata ka shnong ki la sheptieng shikatdei haba ki la ïashem bad u, bad ki la ong, “Me wan ïa kaba suk?”