1 SAMUEL 6:2 - KA BAIBL

² Bad ki Philistia ki la phah khot ïa ki lyngdoh bad ïa ki nongkhan, ki da ong, “Ngin leh kumno ïa kane ka synduk U Trai? to ïathuh ha ngi da kumno ngin phah noh ïa ka sha ka jaka jong ka.”

Khasi CL Bible (BSI)

² ki briew ki khot ïa ki lyngdoh bad ki nongleh myntor bad ki kylli, “Ngin leh kumno ïa kane ka Synduk ka Jutang U Trai? Lada ngi phah biang ïa ka sha ka jaka jong ka da-ei ngin phah ryngkat bad ka?”

1 SAMUEL 6:2 ပူးပေါင်းရင်းမြစ်များ

JENESIS 41:8

Te mynstep ka la jia ba ka mynsiem jong u ka la khih khuslai; bad u la phah khot ïa ki kynja nongkren byrtong baroh ka ri Ijipt, bad ïa ki riewstad baroh jong ka: bad u Pharaoh u la ïathuh ha ki la ki jingphohsniew; hynrei, ym don ba lah ban batai ïa ki ha u Pharaoh.

EKSODOS 7:11

Ynda kumta, u Pharaoh ruh u la khot ïa ki riewstad, bad ïa ki nongleh byrtong: te ki nongleh byrtong ka ri Ijipt, ki hi ruh ki la leh kumjuh da ki jingleh myntor jong ki.

ISAÏAH 2:6

Naba me la iehnoh ïa u paidlang jong me, ka ïing u Jakob, namar ki la dap da ki rukom na mihngi, bad ki long ki nongkren byrtong kum ki Philistia, bad ki ïathab kti bad ki khun ki nongwei.

DANIEL 2:2

Ynda kumta, u syiem u la hukum ban khot ïa ki riewstad, bad ki nongleh byrtong, bad ki nongkheiñ ksuid, bad ki Khaldi, ban ïathuh ha u syiem ïa ki jingphohsniew jong u. Kumta, ki la wan hapoh bad ki la ïeng ha khmat u syiem.

DANIEL 5:7

U syiem u la pyrta jam ban wallam hapoh ïa ki nongkren byrtong, ki Khaldi, bad ïa ki nongkren shwar, u syiem u la kren bad u la ong ïa ki riewstad jong ka Babilon, “Uno uno u ban pule ïa kane ka jingthoh, bad u ban pyni ha nga ïa ka jingbatai jong ka ruh, yn pynkup ïa u da ki jaiñ basaw bthuh, bad un ïoh u kynjri ksiar ha ka ryndang jong u, bad un ïoh long u nongsynshar u balai ha ka hima.”

MATHAÏOS 2:4

Te haba u la ïalum lang ïa ki rangbah lyngdoh baroh bad ïa ki nongthoh u paidbah, u la kylli ïa ki, “Hangno ba yn kha ïa U Khrist?”

1 SAMUEL 5:8

Namar kata, ki la phah ïalum lang sha ki, ïa ki doloi ki Philistia baroh, bad ki la ïa-ong, “Ngin leh kumno ïa kane ka synduk U Blei ki Israel?” Ki te ki la ong, “Ai ba yn bah noh ïa kata ka synduk U Blei ki Israel sha Gath.” Te ki la ïabah noh ïa ka synduk U Blei ki Israel shata.

1 SAMUEL 6:1

Te ka synduk U Trai ka la sah ha ka ri ki Philistia hynñiew bnai.