1 SAMUEL 3:19 - KA BAIBL

¹⁹ Bad u Samuel u la nang roi, bad U Trai u la don lem bad u, bad um shym shah ïa kawei na ki ktien jong u ban hap duh noh.

Khasi CL Bible (BSI)

¹⁹ Katba u Samuel u nang san, U Trai u la don ryngkat bad u, bad u pynurlong ïa baroh kaba u Samuel u ong.

1 SAMUEL 3:19 ပူးပေါင်းရင်းမြစ်များ

JENESIS 21:22

Ka la jia ruh mynkata, ba u Abimelekh bad u Phikhol u nongïalam barangbah, u paidïapom jong u, ki la ïakren ha u Abraham, ki da ong, “U Blei u long bad me ha kiei kiei baroh ïa kiba me leh:

JENESIS 28:15

Bad ha khmih, ma nga, nga don lem bad me, bad ngan ri bha ïa me hangno hangno ruh kat shaba me leit, bad ngan ïalam biang ïa me sha kane ka ri; naba ngan ym iehnoh ïa me, tad ynda nga la lah pyndep ïa kaba nga la ong ha me.”

JENESIS 39:2

Bad U Trai u la don ryngkat bad u Joseph, bad u la long u briew ba man bha eh; bad u la shong ha ïing uta u kynja Ijipt u kynrad jong u.

JENESIS 39:3

Bad u kynrad jong u, u la ïohi ba U Trai u la don ryngkat bad u, bad U Trai u la pynman bha ïa kiei kiei baroh ha ki kti jong u ïa kiba u la leh.

1 SYIEM 8:56

“To long ba la kyrkhu ïa U Trai, uba la ai ka jingshongthait ha la ki briew ki Israel, katba kum kaba u la kular baroh: ym shym la duh ei kawei ka ktien na ka jingkular babha jong u baroh, kaba u la kular da ka kti u Moses u shakri jong u.

2 SYIEM 10:10

To tip mynta ba ym don ei ei ka ban hap ha ka khyndew na ka ktien U Trai, kaba U Trai u la kren shaphang ka ïing u Ahab: naba U Trai u la leh ïa kata kaba u la kren da la u shakri u Elijah.”

2 SYIEM 15:12

Kane ka la long ka ktien U Trai kaba u la kren ha u Jehu, u da ong, “Ki khun jong me haduh ka basaw pateng kin shong halor ka khet ki Israel.” Te ka la long kumta.

2 SYIEM 22:16

Kumne ong U Trai, ‘Ha khmih, ngan wallam ïa ka basniew halor kane ka jaka, bad halor ki nongshong jong ka, baroh ki ktien jong Ka Kitab keiñ kaba u syiem ka Judah u la pule:

ISAÏAH 43:2

Haba me leit lyngba ïa ki um, nga ngan long lem bad me; bad lyngba ki wah, kin ym tyllep ïa me: haba me ïaid lyngba ka ding, men ym ing; lymne ka thylliej ding kan ym jliah ïa me.

ISAÏAH 44:26

uba pynskhem ïa ka ktien u shakri jong u, bad uba pyndep ïa ka jingsylla jong u nonglam-ktien jong u; uba ong shaphang ka Jerusalem, ‘Kan long kaba shong briew’; bad shaphang ki shnong Judah, ‘Yn tei ïa ki, bad ngan pynïeng ïa ki jaka ba la jot jong ka’:

ISAÏAH 55:11

kumta kan long kata ka ktien kaba mih noh na ka shyntur jong nga: kan ym phai suda ha nga, hynrei, kan pyndep ïa kata kaba nga sngewbha, kan roi ruh ha kaba nga la phah ïa ka.

MATHAÏOS 1:23

“Ha khmih, kata ka theisotti kan punkhun, kan kha ruh ïa u khun, bad kin ïakhot ïa ka kyrteng jong u, ‘U Emmanuel,’ ” kaba long, haba la batai, “U Blei lem bad ngi”.

LOUKAS 1:28

Uta u angel te haba u la leit hapoh sha ka, u la ong, “Khublei, pha kaba la ïoh ka jingaiei bakhraw! U Trai u don lem bad pha; la kyrkhu ïa pha hapdeng ki kynthei.”

LOUKAS 1:80

Uta u khynnah te u la nang san, u la nang khraw bor ruh ha ka mynsiem, bad u la don ha ki ri khlaw haduh kata ka sngi ba u la pynpaw ïa lade ha u Israel.

LOUKAS 2:40

Te uta u khynnah u la nang san, u la nang khraw bor ruh ha ka mynsiem, ba la pyndap ïa u da ka jingstad: bad ka jingaiei U Blei ka la don ha u.

LOUKAS 2:52

U Jisu ruh u la nang khraw ha ka jingstad bad ha ka rynïeng, bad ha ka jingsngewbha ha khmat U Blei bad ki briew.

2 KORINTH 13:11

Ha kaba wai noh, ko parabangeit, khublei ïa phi. To phin long ïa kiba la pynjanai noh, to phin long ïa kiba la pyntngen, to phin ïamut ïa kajuh, to phin ïashong suk noh; te U Blei ka jingieit bad ka jingsuk un long ryngkat bad phi.

2 KORINTH 13:14

Ka jingaiei U Jisu Khrist uba U Trai, bad ka jingieit U Blei, bad ka jingïasyllok U Mynsiem Bakhuid, to kin long lem bad phi baroh.

DEUTERONOMI 18:22

Haba u nongïathuhlypa u kren ha ka kyrteng jong U Trai, lada kata ka ktien kam urlong kumta, lymne kam wan jia, ïa kata ka ktien keiñ, U Trai um shym la kren: hynrei, uta u nongïathuhlypa u la kren ïa ka da kaba kob sob, men ym sheptieng ïa u.

2 TIMOTHI 4:22

U Trai un long lem bad ka mynsiem jong me. To long ka jingaiei lem bad phi: Amen.

JOSHUA 21:45

Kam shym duh ei ei na kiei kiei ki babha ïa kiba U Trai u la kren ha ka ïing Israel; ka la wan long baroh.

NONGBISHAR 13:24

Kata ka kynthei te ka la kha khun shynrang, bad la kyrteng ïa u, “u Samson”: bad uta u khynnah u la nang san, bad U Trai u la kyrkhu ïa u.

1 SAMUEL 10:7

Te ynda kin jia kine ki dak ïa me, to leh katba me shem lad; namar U Blei u don ryngkat bad me.

1 SAMUEL 12:2

Te mynta, ha khmih, u syiem u ïaid ha khmat jong phi: nga te nga la tymmen bad nga la phuh 'ñiuhlieh; bad ha khmih, ki khun jong nga ki don bad phi: bad nga la ïaid ha khmat jong phi naduh ba nga dang samla haduh kane ka sngi.

1 SAMUEL 16:18

Te uwei na kita ki shakri u la ïathuh, bad u la ong, “Ha khmih, nga la ïohi ïa uwei u khun u Jesse u nong Bethlehem, uba nang ha kaba tem bad uba khlaiñ bor, bad u long u nongïaleh thma, bad uba stad ktien, bad uba bhabriew lymphuin, bad U Trai ruh u don ryngkat bad u.”

1 SAMUEL 18:12

Te u Saul u la sheptieng ïa u Dabid, namar ba U Trai u la don lem bad u, bad u la kiar noh na u Saul.

1 SAMUEL 18:14

Te u Dabid u la ïaid leh sian ïa lade ha ki lynti jong u baroh; bad U Trai u la don lem bad u.

1 SAMUEL 18:5

Te u Dabid u la leit shano shano kat sha kaba u Saul u la phah ïa u, bad u la ïaid leh sian ïa lade: bad u Saul u la buh ïa u halor ki paidïapom, bad u la long uba la sngewbha ïa u ha khmat kita ki paidbah baroh, bad ha khmat ki shakri u Saul ruh de.

1 SAMUEL 2:21

Bad U Trai u la wan khmih ïa ka Hannah, bad ka la punkhun, ka la kha ruh lai ngut ki shynrang bad ar ngut ki kynthei. Bad uta u khynnah, u Samuel u la nang san ha khmat U Trai.

1 SAMUEL 2:26

Te uta u khynnah u Samuel u la nang san, bad u la long uba sngewbha ïa u da U Trai, bad da ki briew de.

1 SAMUEL 9:6

U te u la ong ha u, “Ha khmih, ha kane ka shnong don u briew u jong U Blei, bad u long u briew uba donburom; baroh kat kaba u ong ka jia long shisha: ïa ngin ïaleit shata; lehse un ïathuh ïa ngi ïa ka lynti kaba ngi dei ban leit.”