1 SAMUEL 18:6 - KA BAIBL

⁶ Te haba u Dabid u wan phai noh na kaba pynïap ïa uta u Philistia, ki kynthei ki la ïawan mih na ki nongbah ki Israel baroh, ki da ïarwai bad ki da ïashad, ban tan ïa u Saul syiem, bad ki kanjari, bad ka jingkmen, bad ki kynja jingtem.

Khasi CL Bible (BSI)

⁶ Katba u Dabid u dang wan phai hadien ba u la pynïap ïa u Goliath bad katba ki shipai ki dang wan phai sha la ïing, ki kynthei na man la ka shnong ha Israel ki ïamih ban leit ïashem ïa u syiem Saul. Ki da ïarwai ïa ki jingrwai sngewkmen, ki da ïashad bad ki tem ïa ki kanjari bad ki jingtem ksai.

1 SAMUEL 18:6 ပူးပေါင်းရင်းမြစ်များ

2 SAMUEL 1:20

To wat ïathuh ïa kane ha Gath, wat pynbna ha ki lynti shnong ka Ashkelon; ïoh kin kmen ki khun kynthei ki Philistia, ïoh kin kyrkoh ki khun kynthei jong kita ïa ki bym shym la otsher.

2 SAMUEL 6:5

Bad u Dabid bad ka ïing Israel baroh ki la tem ha khmat U Trai ïa ki jingtem baroh kiba da u dieng Kseh, ïa ki duitara, ïa ki nebel, ïa ki kanjari, ïa ki manirai, bad ïa ki shakuriaw de.

SALM 149:3

Ai ba kin ïaroh ïa ka kyrteng jong u ha ka jingshad: ai ba kin rwai ki jingïaroh ïa u da ka kanjari bad ka duitara.

SALM 68:11

U Trai u ai ïa kata ka ktien: ki kynthei kiba pynbna ïa ki khubor ki la long u paidbah bakhraw.

SALM 68:25

Ki nongrwai ki la leit sha shuwa, ki nongtem jingtem ki la bud nadien, hapdeng ki samla kynthei kiba tem ïa ki kanjari.

EKSODOS 15:20

Te ka Miriam ka nongïathuhlypa, ka hynmen u Aaron, ka la shim ka kanjari ha la ka kti; ki kynthei baroh ruh ki la ïamih noh hadien jong ka da ki kanjari bad ki jingshad.

EKSODOS 15:21

Ka Miriam ka la ong ruh ha ki, “To rwai phi ïa U Trai, naba U la jop da ka burom; ïa u kulai bad ïa u nongshong kulai U la phyrnep sha ka duriaw.”

ISAÏAH 30:32

Te man ka jingshoh jong u diengduh ba la buh, uba U Trai un pyndei halor jong u, yn long lem bad ki kanjari bad ki duitara: bad ha ki thma ka jingkhyrniat un ïaleh bad ki.

NONGBISHAR 11:34

Te u Jephthah u la wan poi sha Mispeh sha la ïing, te, ha khmih, ka khun jong u ka la wan mih ban tan ïa u, bad ki kanjari bad ki jingshad de: ka la long ruh ka khun marwei jong u, nalor jong ka, um shym la don khun shynrang ne kynthei.

1 SAMUEL 18:5

Te u Dabid u la leit shano shano kat sha kaba u Saul u la phah ïa u, bad u la ïaid leh sian ïa lade: bad u Saul u la buh ïa u halor ki paidïapom, bad u la long uba la sngewbha ïa u ha khmat kita ki paidbah baroh, bad ha khmat ki shakri u Saul ruh de.