NEHEMAÏAH 9:8 - Khasi CL Bible (BSI)

⁸ Me shem ba u ïaineh ha me, bad me pynlong ka jingïateh kular bad u. Me kular ban ai ha u ïa ka ri ki Kanaan, ka ri jong ki Hit bad ki Amor, ka ri ki Peris, ki Jebus bad ki Girgash, kan long ka ri ha kaba ki khun ki ksiew jong u kin shong kin sah. Me bat ïa la ka kular, namar me long uba ïaineh.

KA BAIBL

⁸ bad me la shem ïa ka dohnud jong u kaba ïaineh ha khmat jong me, bad me la thaw jutang bad u, ban ai ka ri ki Kanaan, ki Hit, ki Amor, ki Peris, ki Jebus, ki Girgash, ban ai keiñ ha u symbai jong u, bad me la pyndep ïa la ki ktien; namar me long u bahok.

NEHEMAÏAH 9:8 ပူးပေါင်းရင်းမြစ်များ

JENESIS 12:7

U Trai u la mihpaw ha u Abram bad u ong ha u, “Kane ka dei ka ri kaba ngan ai ha ki khun ki ksiew ong me.” Nangta u Abram u la tei hangta ïa ka duwan ha U Trai, uba lah mihpaw ha u.

JENESIS 15:6

U Abram u la shaniah ha U Trai; bad namar kane, U Trai u la sngewbha ïa u bad u la pdiang ïa u.

JENESIS 22:12

“Wat pynmynsaw ïa u khynnah lane leh ei ei ïa u,” u ong. “Mynta, nga tip ba me sheptieng bad kohnguh ïa U Blei, namar mem shym la tyngkai ïa la u khun marwei na u.”

2 SAMUEL 22:31

Une U Blei — ki kam jong u ki long kiba janai; ki ktien jong u kiba lah ban shaniah! U long kum ka stieh ïa baroh kiba wad jingïada jong u.

1 KHRONIKL 1:14

U Kanaan u dei ruh u kpa tymmen jong ki Jebus, ki Amor, ki Girgash,

1 KHRONIKL 16:16

ka jutang kaba u la pynlong bad u Abraham, ka jingkular kaba u la pynlong bad u Isaak.

ESRA 9:15

A Trai U Blei ki Israel, me long uba hok, hynrei me la shah ïa ngi ban im. Ngi phla ïa ki pop jong ngi ha me; ngim don hok shuh ban wan ha ka jingdon ryngkat jong me.”

NEHEMAÏAH 9:33

Me leh ïa kaba dei ban pynshitom ïa ngi; Me long uba ïaineh, wat la ngi la leh pop.

SALM 116:5

U Trai u long uba dap da ka jingisynei bad uba bha; U Blei jong ngi u long uba sngewlem.

EKSODOS 3:17

Nga la kular ba ngan ïalam noh ïa ki na Ijipt ha kaba ki shah lehbeiñ, sha kata ka ri kaba tuid da ka dud bad ka ngap — ka ri jong ki Kanaan, ki Hit, ki Amor, ki Peris, ki Hib bad ki Jebus.

EKSODOS 3:8

bad kumta nga la wan ban pyllait ïa ki na ki nong Ijipt bad ban ïalam noh ïa ki na ka ri Ijipt sha kata ka ri kaba ïar bad kaba seisoh, kaba tuid da ka dud bad ka ngap, ha kaba ki Kanaan, ki Hit, ki Amor, ki Peris, ki Hib bad ki Jebus ki shong mynta.

ESEKIEL 33:24

“Ko khun u briew,” u la ong “Ki briew kiba shong ha ki nongbah ba la pynjot jong ka ri Israel ki ong: ‘U Abraham u long tang uwei u briew, bad u la ïoh ïa ka ri baroh kawei. Ngi ïadon bun ngut, kumta mynta ka ri ka dei ka jong ngi.’

JINGKHEIÑ 13:29

Ki Amalek ki shong shaphang shathie jong ka ri; ki Hit, ki Jebus, bad ki Amor ki shong ha ri lum; bad ki Kanaan ki shong ha ki rud ka duriaw Mediterranian bad ha ki rud ka wah Jordan.”

JINGKHEIÑ 23:19

U Blei um long kum ki briew, kiba kren lamler; Um long kum u briew uba kylla la ka jingmut. Kat kaba u kular, u pyndep; U kren, bad la pyndep ïa kata.

KI KAM 13:22

Hadien ba la weng noh ïa u, U Blei u la pynlong ïa u Dabid ban long u syiem jong ki. Kane ka long kaei kaba U Blei u la ong shaphang jong u: ‘Nga la shem ba u Dabid u khun jong u Jesse, u long u jait briew uba nga sngewbha, u briew u ban leh ïa baroh kaba nga kwah ïa u ban leh.’

DEUTERONOMI 26:3

Leit sha u lyngdoh uba dei peit kam ha kata ka por, bad ong ha u, ‘Nga pynbna mynta ka sngi ha U Trai U Blei jong nga ba nga la wan rung ha kata ka ri ba u la kular ha ki kpa tymmen jong ngi ban ai ha ngi.’

DEUTERONOMI 32:4

“U Trai u long u nongïada bakhlaiñbor jong phi, ki lynti jong u ki long kiba janai, bad bahok; U Blei jong phi u long uba ïaineh bad uba shisha; u leh ïa kaba hok bad kaba beit.

DEUTERONOMI 7:1

“U Trai U Blei jong phi un wan ïalam ïa phi sha kata ka ri kaba phin ïohkynti, bad un beh noh nangta ïa ki jaitbynriew kiba bun. Katba phi nang ïaid sha khmat, un beh noh ïa ki hynñiew ki jaitbynriew kiba kham bun paid bad kham khrawbor ban ïa phi. Kita ki dei ki Hit, ki Girgash, ki Amor, ki Kanaan, ki Peris, ki Hib, bad ki Jebus.

DEUTERONOMI 9:5

Ym dei namar ka hok jong phi ne ka jinglong beit ha ka dohnud ba phin ïohkynti ïa ka ri jong ki, hynrei ka long namar ka jingbymman jong kita ki jaitbynriew ba U Trai U Blei jong phi u la beh krad ïa ki na khmat jong phi; ba un pynskhem ïa la ka kular ba u la ai ha ki kpa tymmen jong phi, u Abraham, u Isaak, bad u Jakob.

TITOS 1:2

kaba pynshong nongrim ha ka jingkyrmen ïa ka jingim bymjukut. U Blei, u bym ju shukor, u la kular ïa ngi ïa kane ka jingim naduh mynnyngkong,

HEBRU 11:17

Dei ka jingngeit kaba pynlong ïa u Abraham ban ai kum ka jingkñia ïa u Isaak u khun jong u, mynba U Blei u la tynjuh ïa u Abraham. U Abraham u la long uta ïa uba U Blei u la ïateh kular, la katta ruh u long la kloi ban ai ïa la u khun marwei kum ka jingkñia.

HEBRU 6:18

Te, don kine ar tylli kiei kiei ki bym lah ban kylla bad ïa kiba U Blei um lah ban lamler. Kumta ïa ngi kiba la shem ka jingshngain ha u la nang pynshlur shuh shuh ban batskhem ïa kata ka jingkyrmen ïa kaba la buh ha khmat jong ngi.

JOSHUA 11:23

U Joshua u la kurup ïa kata ka ri baroh kawei, kumba U Trai u la hukum ïa u Moses. U Joshua u la ai ïa ka ha ki Israel kum ka jong ki hi bad u la pynbynta ïa ka ha ki lyngkhot, kawei kawei na ka bynta kawei kawei ka jait. Kumta ki paidbah ki la shongthait na ka thma.

JOSHUA 11:3

U la phah ktien ruh sha ki Kanaan kiba don ha baroh arliang jong ka Jordan, sha ki Amor, sha ki Hit, sha ki Peris, bad sha ki Jebus kiba ha ka ri lum, kumjuh ruh sha ki Hib kiba shong ha trai u Lum Hermon ha ka ri Mispah.

JOSHUA 23:14

“Mynta, ka la dei ka por ïa nga ban ïap. Uwei pa uwei na phi u tip ha la ka dohnud bad ha la ka mynsiem ba U Trai U Blei jong phi u la ai ha phi ïa kiei kiei kiba bha baroh kiba u la kular ha phi. Ïa kawei pa kawei ka kular la pyndep, ym don kawei ruh ka ban sep-ei.

JOSHUA 9:1

Ïa ki jingjop jong ki Israel la bna ha baroh ki syiem kiba shaphang sepngi jong ka Jordan — ha ki lumrit, ha trai ki lum, bad ha ka pyntha rud duriaw jong ka Duriaw Mediterranian haduh ka Lebanon ha ka phang bashatei; kine ki dei ki syiem jong ki Hit, ki Amor, ki Kanaan, ki Peris, ki Hib, bad ki Jebus.

1 ÏOANNIS 1:9

Hynrei lada ngi phla ïa ki pop jong ngi ha U Blei, un bat ïa la ka kular bad un leh ïa kaei kaba dei: Un map ïa ngi ïa ki pop jong ngi bad un pynkhuid ïa ngi na ki kam bymman baroh.