JOEL 2:13 - Khasi CL Bible (BSI)

¹³ Ai ba ka dohnud ba la pait jong phi kan pyn-i ïa ka jingsngewsih jong phi; kaba kad ïa ki jaiñphong jong phi kam biang.” To wan phai pat sha U Trai U Blei jong phi. U long uba sbun bad uba dap da ka jingisynei; u long uba ïaishah slem bad uba bat ïa la ka kular; u long borabor uba kloi ban map bad ym ban pynshitom.

KA BAIBL

¹³ bad to kad ïa la ka dohnud, te ym ïa la ki jaiñkup,” bad to phai sha U Trai U Blei jong phi: naba u long uba aiei bad uba isynei lem, uba suki ban bitar, bad uba kynrei ha ka jingisynei, bad uba kylla-ka-bamut na ka jingpynsniew.

JOEL 2:13 ပူးပေါင်းရင်းမြစ်များ

JENESIS 37:29

Haba u Reuben u leit phai pat sha kata ka pukri bad shem ba u Joseph um don shuh hangta, u la kad ïa la ki jaiñ ha ka jingsngewsih.

JENESIS 37:34

U Jakob u kad ïa la ki jaiñ ha ka jingsngewsih bad u kup da ka jaiñ khain. U la ïam sngewsih bun sngi na ka bynta u khun jong u.

2 SAMUEL 1:11

U Dabid u kad ïa la ki jaiñkup ha ka jingsngewsih, bad ki briew jong u baroh ki leh kumjuh.

1 SYIEM 21:27

Haba u Elijah u la dep kren, u Ahab u la kad ïa la ki jaiñ, u la law ïa ki bad u phong da ki jaiñ khain. Um treh bam, u thiah ha ka jaiñ khain, bad u leit phai da kaba khuslai bad rit mynsiem.

2 SYIEM 22:11

Haba u syiem u ïohsngew ba la pule ïa ka Kitab, u kad ïa la ki jaiñ ha ka jingsheptieng,

2 SYIEM 22:19

bad kylla-kaba-mut bad pynrit ïa lade ha khmat jong nga, kad ïa ki jaiñ jong phi bad ïam, haba phi ïohsngew kumno nga byrngem ban pynshitom ïa ka Jerusalem bad ki briew jong ka. Ngan pynlong ïa ka kaba ishyrkhei ban peit, ka jaka ha kaba ïa ka kyrteng jong ka, ki briew kin pyndonkam kum ka jingtim. Hynrei nga la ïohsngew ïa ka jingduwai jong phi,

2 SYIEM 5:7

Haba u syiem Israel u pule ïa ka shithi, u la kad ïa la ki jaiñ ha ka jingkhuslai bad u kyang jam, “Kumno u syiem Syria u khmih lynti ïa nga ban pynkhiah ïa une u briew? Hato u pyrkhat ba nga dei U Blei, lem bad ka bor jong ka jingim bad ka jingïap? Ka shai kdar ba u pyrshang ban sdang ïakajia bad nga!”

2 SYIEM 6:30

Haba ïohsngew ïa kane, u syiem u kad ïa la ki jaiñ ha ka jingkhuslai, bad ki briew kiba sah hajan ka kynroh ki lah ban ïohi ba u phong da ka jaiñ khain hapoh ki jaiñ jong u.

2 KHRONIKL 6:27

A Trai, to shahshkor ïa ki na bneng, bad map ïa ka pop jong ki shakri jong me, ki briew jong ka Israel, bad to hikai ïa ki ban leh ïa kaba dei. Te, A Trai to phah ïa u slap ha kane ka ri jong me, ïa kaba me la ai ha la ki jong ki briew kum ka jingïohkynti junom.

NEHEMAÏAH 9:17

Ki la kyntait ban kohnguh; ki la klet ïa baroh kaba me la leh; ki la klet noh ïa ki kambah kiba me la leh. Ha ka jingsarong jong ki, ki la jied u nongïalam ban ïalam biang ïa ki sha ka jinglongmraw ha Ijipt. Hynrei me long U Blei uba map; me long uba dap da ka jingaiei bad ka jingieit, uba suki ban bitar. Ka jingisynei jong me ka long kaba khraw; mem shym iehnoh ïa ki.

Ka Kitab U Job 1:20

Te u Job u ïeng joit bad u kad ïa la ki jaiñ ha ka jingsngewsih. U khi ïa la ka khlieh bad u bret ïa lade da pyllup ha ka khyndew.

SALM 103:8

U Trai u long uba isynei bad uba dap da ka jingieit, uba suki ban bitar bad uba dap da ka jingieit baneh.

SALM 106:45

Na ka bynta jong ki u kynmaw ïa ka jutang jong u, bad namar ka jingieit bakhraw jong u, u la kylla jingmut.

SALM 34:18

U Trai u don hajan jong kito kiba tlot mynsiem; u pyllait im ïa kito kiba duh lut ïa ka jingkyrmen.

SALM 51:17

Ka jingkñia jong nga ka long ka mynsiem kaba sngewrit, A Blei; men ym kyntait ïa ka dohnud kaba sngewrit bad ba la kylla-kaba-mut.

SALM 86:15

Hynrei ma me, ko Trai, me long U Blei uba isynei bad uba ieit, uba ïaishah borabor, uba ïai lehsbun bad uba ïaineh.

SALM 86:5

Me long uba bha ïa ngi bad uba map ei, uba shlei da ka jingieit baneh ïa kito baroh kiba duwai sha me.

ISAÏAH 57:15

“Nga long U Blei uba khraw bad uba khuid, uba im shi junom. Nga shong ha ki jaka kiba jrong bad kiba khuid, bad nga im ruh bad ki briew kiba sngewrit bad kylla-kaba-mut, kumta ba ngan pynïoh biang ïa ka jingsngewskhem bad ka jingkyrmen jong ki.

ISAÏAH 58:5

Haba phi shahjingit, phi pynshitom ei ïa lade; phi pyndem ngon ïa la ka khlieh kum u phlang, bad phriang ïa ki jaiñ khain bad u dpei ban thiah hangta. Hato ka dei kata kaba phi khot ka jingshah jingit? Phi tharai ba ngan sngewbha ïa kata?

ISAÏAH 66:2

Ma nga hi nga la thaw ïa ka pyrthei baroh kawei! Nga shem sngewbha bad kito kiba sngewrit bad kiba kylla-kaba-mut, kiba sheptieng ïa nga bad kiba kohnguh ïa nga.

JEREMAÏAH 36:7

Lehse kin duwai ha U Trai bad phai pat na ki lynti bymman jong ki, namar U Trai u la byrngem ïa kane ka jaitbynriew da ka jingbitar bad ka jingbitar shla bashyrkhei.”

JEREMAÏAH 42:10

‘Lada phi mon ban ïaisah ha kane ka ri, te ngan kyntiew ïa phi bad ym ban pynjot ïa phi; ngan pynskhem ïa phi bad ym ban rat ïa phi. Ka jingpynjot kaba nga la wanrah ha phi ka la pynlong ka jingsngewsih bakhraw ïa nga.

ESEKIEL 9:4

“Khie ïaid lyngba ïa ka nongbah Jerusalem bad buh dak ha ka shyllangmat jong uwei pa uwei uba shem jynjar bad khuslai namar ki kiei kiei baroh kiba ijli kiba la leh ha ka nongbah.”

HOSIA 14:1

To wan phai noh sha U Trai U Blei jong phi, ko paid Israel. Ka pop jong phi ka la pynlong ïa phi ban jynthut bad kyllon.

JONAH 3:9

Lehse U Blei un kylla ka jingmut jong u; lehse un sangeh noh na kaba bitar, bad ngin ym ïap!”

JONAH 4:2

Kumta u la duwai, “A Trai, hato ngam la ong shuwa ba ngan mih na ïing ba kane ka dei kaei kaba men leh? Dei na kata ka daw ba nga la pyrshang tyngeh ban phet noh sha Spain! Nga la tip ba me long U Blei ka jingieit bad ka jingisynei, uba ïaishah slem, uba sbun borabor, bad uba kloi borabor ban kylla ïa la ka jingmut ban ym pynshitom.

MIKAH 7:18

Ym don uwei pat u blei kum ma me, A Trai; me map ïa ki pop jong ki briew jong me kiba la lait im. Mem neh junom ha ka jingbitar, hynrei me sngewbha haba me pynpaw ïa ka jingieit baïaineh jong me.

NAHUM 1:3

U Trai um ju bitar shen, hynrei u long uba khrawbor bad um ju shah ba kiba shah rai pynrem kin lait khlem shah pynshitom. Hangno ha kaba U Trai u ïaid, ki 'erïong ki khie; ki lyoh ki long ki pui pui ba la pynmih da ki kjat jong u!

JINGKHEIÑ 14:18

‘Nga, U Trai nga long uba suki ban bitar, bad nga pyn-i ïa ka jingieit bakhraw bad ka jingïaineh bad map ïa ka pop bad ïa ka jingïaleh pyrshah. Nalorkata, ngam pep ban pynshitom ïa ki khun bad ki ksiew haduh kaba lai bad kaba saw pateng namar ki pop jong ki kmie ki kpa jong ki.’

Ka Shithi U Paul Sha Ki Nong Rom 2:4

Lane lehse phi ibeiñ ïa ka jingsbun bakhraw jong u, ka jingshah laitluid, bad ka jingïaishah. Da shisha phi tip ba U Blei u long uba sbun, namar u pyrshang ban ïalam ïa phi ban kylla-kaba-mut.

EPHESOS 2:4

Hynrei ka jingisynei U Blei ka shlei katta katta, bad ka jingieit jong u ïa ngi ka long kaba khraw katta katta,

1 TIMOTHI 4:8

Ka jingpynmlien ïa ka met ka ai katto katne ka jingbha, hynrei ka jingpynmlien ba kynja mynsiem ka pynmyntoi ha ki liang baroh, namar ka kular ïa ka jingim ha ka mynta bad ha ka lawei.