JINGPYNPAW 2:25 - Khasi CL Bible (BSI)

²⁵ Hynrei tad ynda ngan wan, pha dei ban batskhem ïa kaei kaba pha don.

KA BAIBL

²⁵ Hynrei, ïa kata kaba phi don, to ïabat skhem tad ynda nga wan.

JINGPYNPAW 2:25 ပူးပေါင်းရင်းမြစ်များ

ÏOANNIS 14:3

Bad hadien ba nga la leit bad pynkhreh ka jaka ïa phi, ngan wan pat bad ngan shim ïa phi ha lade hi, ba phi ruh phin don ha ka jaka kaba nga don.

KI KAM 11:28

Uwei na ki, uba kyrteng u Agabos, u la ïeng joit bad da ka bor jong U Mynsiem u la ïathuh lypa ba ka 'nemsniew bajur kan sa wan ha ka pyrthei baroh kawei. (Ka la wan jia mynba u Klaudius u la long u Patsha.)

Ka Shithi U Paul Sha Ki Nong Rom 12:9

Ka jingieit ka dei ban long kaba sngur. To isih ïa kaei kaba sniew, to batskhem ïa kaei kaba bha.

1 KORINTH 11:26

Kane ka mut ba man ba phi bam ïa une u kpu bad phi dih na kane ka khuri phi pynbna ïa ka jingïap U Trai tad ynda un wan.

1 KORINTH 4:5

Kumta phim dei ban bishar ïano ïano shuwa ba ka por kaba dei kan poi. Ka jingbishar bakhatduh ka dei ban ap tad ynda U Trai un wan; un wallam ha ka jingshai ïa ki jingbuhrieh ba-dum bad pynpaw ïa ki jingthmu barieh jong ki jingmut ki briew. Bad nangta uwei pa uwei un ïohpdiang na U Blei ïa ka jingïaroh kaba u dei hok ban ïoh.

1 THESSALONI 5:21

Da tynjuh ïa kiei kiei baroh: Bat ïa kaei kaba bha

HEBRU 10:23

To ngin batskhem da ka jingkyrmen ïa kaba ngi ïaphla, namar ngi lah ban shaniah ba U Blei u bat ïa la ka kular.

HEBRU 3:6

Hynrei, U Khrist u long uba lah ban shaniah kum U Khun uba dei peit ïa ka ïing U Blei. Ngi long ka ïing jong u lada ngi ïaineh ha ka jingshlur bad ngi long skhem ha kaei kaba ngi kyrmen.

HEBRU 4:14

Te, to ngin batskhem ïa ka jingngeit ïa kaba ngi phla. Naba ngi don U Rangbah Lyngdoh uba khraw uba la leit haduh ka jingdon ryngkat U Blei — U Jisu, U Khun U Blei.

2 PETROS 3:10

Hynrei ka Sngi jong U Trai kan wan kum u nongtuh. Ha kata ka Sngi, ki bneng kin jah noh lem bad ka jingsawa kaba jam, ki metbneng kin ing duh bad yn pynjot, bad ka pyrthei lem bad kiei kiei baroh kiba don ha ka kin jah rngai.

JINGPYNPAW 1:7

Ha khmih, u wan ha ki lyoh! Baroh kin ïohi ïa u, kynthup ïa kito kiba la sum ïa u. Ki jaitbynriew baroh ha ka pyrthei kin ïamkthang namar jong u. Kumta kan long!

JINGPYNPAW 22:20

Uta uba ai ïa ka jingphla jong u ha kane baroh, u ong, “Ho-oid da shisha! Nga wan kloi!” Ai kan long kumta. To wan, Trai Jisu!

JINGPYNPAW 22:7

“Shahshkor!” ong U Jisu. “Nga wan kloi! Suk kito kiba kohnguh ïa ki ktien ïathuhlypa kiba hapoh kane ka kitab!”

JINGPYNPAW 3:11

Ngan wan kloi. Sumar kyndong ïa kaei kaba pha don, khnang ba yn ym don uno uno u ban lute na pha ïa ka bainong jong ka jingjop.

JINGPYNPAW 3:3

Kynmaw te, ïa kaei kaba la hikai ïa pha bad ïa kaei kaba pha la ïohsngew; kohnguh ïa kata bad phai noh na ki pop jong pha. Lada pham kyndit bynriew noh, ngan wan ha pha kum u nongtuh, bad phan ym lah wat ban tip ïa ka por lano ngan wan.