JEREMAÏAH 9:1 - Khasi CL Bible (BSI)

¹ Nga kyrmen ba ka khlieh jong nga ka long ka pukri um, bad ba ki khmat jong nga ka umpohliew ki ummat, khnang ba nga lah ban ïam mynsngi bad mynmiet na ka bynta ki briew jong nga kiba la shah pynïap.

KA BAIBL

¹ A ba ka khlieh jong nga kan da la long ki um, bad ki khmat jong nga ka pukri ki ummat, ba ngan da ïoh ïam synñia sngi na ka bynta kiba la shah pynïap jong ka khun ki briew jong nga!

JEREMAÏAH 9:1 ပူးပေါင်းရင်းမြစ်များ

SALM 119:136

Ki ummat jong nga ki tuid kum ka wah, namar ki briew kim kohnguh ïa ka aiñ jong me.

SALM 42:3

Nga ïam mynsngi bad mynmiet, bad ki ummat ki long tang ma ki ka jingbam jong nga; man ka por ki nongshun jong nga ki kylli ïa nga, “Hangno u don U Blei jong phi?”

SALM 55:7

Ngan her sha jngai bah bad shong ha ka ri khlaw.

ISAÏAH 16:9

Mynta nga ïam ïa ki sohwaiñ jong ka Sibmah kumba nga ïam namar ka Jaser. Ki ummat jong nga ki hap na ka bynta ka Heshbon bad ka Elealeh, namar ym don kano kano ka jingkheit soh kaba pynkmen ïa ki briew.

ISAÏAH 22:4

Mynta to iehnoh ïa nga marwei ban ïamkthang halor kito na ki briew jong nga kiba la ïap. Wat pyrshang ban pyntngen ïa nga.

JEREMAÏAH 13:17

Lada phin ym shahshkor, ngan ïam ha kaba jar jar namar ka jingsarong jong phi; ngan ïamkthang eh, bad ki ummat jong nga kin tuid namar ki briew jong U Trai ki la shah ring noh kum ki mraw.

JEREMAÏAH 14:17

U Trai u la hukum ïa nga ban ïathuh ïa ki briew shaphang ka jingsngewsih jong nga bad ban ong: “Ai ba ki khmat jong nga kin tuid da ki ummat mynsngi bad mynmiet, ai ba da lei lei ngan ym sangeh ban ïam, namar ki briew jong nga ki la mynsaw jur bad ki la mong tyngeh.

JEREMAÏAH 3:10

Bad hadien kane baroh, ka Judah, ka para bymïaineh jong ka Israel, ka la shu leh mynleh ban wan phai sha nga, kam shym da mut shisha. Ma nga U Trai, nga la kren.”

JEREMAÏAH 4:19

Ka jingpang! Ngam lah shah ïa ka jingpang! Ka dohnud jong nga! Ka dohnud jong nga ka kyndeh jur! Ngam lah ban sngap jar; nga ïohsngew ïa ki turoi bad ki jingpyrta jong ka thma.

JEREMAÏAH 5:7

U Trai u kylli, “Balei ngan map ïa ki pop jong ki briew jong nga? Ki la iehnoh ïa nga, bad ki la mane ïa ki blei ki bymshisha. Nga la bsa ïa ki briew jong nga haduh ba kin da kdang, hynrei ki la leh awria, bad ki la pynlut ïa ka por jong ki bad ki nuti.

JEREMAÏAH 6:26

U Trai u ong ha ki briew jong u, “To kup jaiñ khain bad to tyllun ha u dpei. To ïam sngewsih lem bad ki ummat kthang kumba phin ïam ïa u khun marwei, namar uta uba wan ban pynjot ïa phi un tur ïaleh kynsan.

JEREMAÏAH 8:18

Ïa ka jingsngewsih jong nga ym lah ban pynkhiah; nga pang ha ka dohnud.

JEREMAÏAH 9:18

Ki briew ki la ong, “Ïathuh ïa ki ban pynkloi bad rwai ka jingrwai ïapbriew na ka bynta jong ngi, tad haduh ba ki khmat jong ngi kin dap da ki ummat, bad ba ki irmat jong ngi ki jhieh na kaba ïam.”

SNGEWSYNEI 2:11

Ki khmat jong nga ki la tlot da ka jingïam; ka mynsiem jong nga ka don ha ka jinglyng-a. Nga la thait da ka jingsngewsih ha ka jingshah pynjot jong ki briew jong nga. Ki khynnah bad ki khunlung ki ïapler ha ki lynti bah jong ka nongbah.

ESEKIEL 22:12

Don na ki briew jong pha, kiba pynïap ïa ki briew da kaba ïoh jingsiew. Don kiba shim sut halor ki ram ba ki ai ïa ki para jait Israel bad ki riewspah da kaba shim kabu ïa ki. Ki la klet ïa nga.” U Trai Nongsynshar u la kren.

HOSIA 7:4

Baroh ki long kiba shetkylla bad ki bym lah shaniah. Ka jingisih jong ki, ka ing suki kum ka ding ha ka tyndur, ka bym shym la pynkhih da u nongshet kpu haduh ba u 'purew u lah long ban shet.