JEREMAÏAH 31:13 - Khasi CL Bible (BSI)

¹³ Nangta ki samla kynthei kin shad bad kin kmen, bad ki shynrang, kiba samla bad kiba tymmen, kin shadkmen. Ngan pyntngen ïa ki bad pynkylla ïa ka jingïambriew sha ka jingkmen, ïa ka jingsngewsih jong ki sha ka jingsngewbha.

KA BAIBL

¹³ Ynda kumta, ka theisotti kan sa kmen ha kaba shad, bad ki samla shynrang bad ki tymmen lang: namar ngan pynkylla ïa ka jingïam jong ki sha ka jingkmen bad ngan pyntngen ïa ki, bad ngan pynkmen ïa ki na ka jingsngewsih jong ki.

JEREMAÏAH 31:13 ပူးပေါင်းရင်းမြစ်များ

ESRA 6:22

Hynñiew sngi ki rakhe da ka jingkmen ïa ka Jingkhawai Niam U Kpu Bakhlem Thiat. Ki la dap da ka jingkmen namar U Trai u la pynlong ïa u patsha jong ka Assyria ban lehsbun ïa ki, ba u kyrshan ïa ki ha ka jingtrei jong ki ha ka jingtei pat ïa ka Templ jong U Blei ki Israel.

NEHEMAÏAH 12:27

Haba ïa ka kynroh ka nongbah la pynkyntang, ïa ki Lebi la wallam shapoh na ki jaka ba ki ïashong ïasah, khnang ba ki lah ban ïadon bynta ha ka jinglehkmen jong ka jingpynkyntang ryngkat bad ki jingrwai jong ka jingainguh bad ki jingtem jong ki shakuriaw bad ki duitara.

NEHEMAÏAH 12:43

Ha kata ka sngi, la pynlong bun ki jingkñia, bad u paidbah u la dap da ka jingkmen namar U Blei u la pynlong ïa ki ban kmen haduh katta katta. Ki kynthei bad ki khynnah ki la ïasnohlang ha ka jinglehkmen, bad ïa ka jingsawa kaba ki la pynlong, la ïohsngew shaduh sha jngai bah.

ESTHER 9:22

Kine ki long ki sngi ha kiba ki Jiw ki la pyllait ïa lade na ki nongshun jong ki; une u long u bnai ha uba la pynphai pat na ka por jong ka jingsngewsih bad jingduh jingkyrmen sha ka por jong ka jingsngewbha bad ka jingkmen. La ong ïa ki ban rakhe ïa kine ki sngi da kaba ïabam sngewbha bad lehkmen, da kaba ai jingai sngewbha da ka jingbam iwei ïa iwei pat bad ïa kiba duk.

SALM 126:5

Ai ba kito kiba ïam katba ki bet ïa ki symbai jong ki kin ïohlum ïa ka jingot ha ka jingkmen!

SALM 148:12

ki samla kynthei bad ki samla shynrang, kiba la tymmen bad ki khynnah ruh.

SALM 149:3

To ïaroh ïa ka kyrteng jong u da ka jingshad; to tem ki ksing bad ki duitara ha ka jingïaroh ïa u.

SALM 30:11

Me la pynkylla ïa ka jingsngewsih jong nga sha ka jingshadkmen; me la shim noh ïa ka jingsngewsih jong nga bad kerkut ïa nga da ka jingkmen.

ISAÏAH 12:1

Ka sngi ka wan ha kaba ki briew kin rwai, “Nga ïaroh ïa me A Trai! Me la bitar ïa nga, hynrei mynta me pyntngen ïa nga bad mem bitar shuh ïa nga.

ISAÏAH 35:10

Kin poi sha Jerusalem da ka jingkmen, kin rwai bad kin pyrta da ka jingkmen. Kin long kiba kmen junom, kiba la lait junom na ka jingsngewsih bad ka jingpangnud.

ISAÏAH 51:11

Kito kiba me la pyllait im kin ïoh poi ha Jerusalem da ka jingkmen, da kaba rwai bad risa da ka jingkmen. Kin long kiba kmen junom, junom kiba laitluid na ka jingsngewsih bad jingkthang mynsiem.

ISAÏAH 51:3

“Ngan pyn-i ïa ka jinglehisynei ïa ka Jerusalem, sha kito baroh kiba shong halor ki jingpra jong ka. Wat la ka jaka jong ka, ka long kum ka ri shyiap, ngan pynlong ïa ka, ka kper, kum ka kper kaba nga la thung ha Eden. Ka jingkmen bad ka jinglehkmen kin don hangta, bad ki jingrwai jong ka jingïaroh bad jingainguh ïa nga.

ISAÏAH 60:20

Ki sngi ka jingjynjar jong pha kin kut noh. Ma nga, U Trai, ngan long ka jingshai bymjukut jong pha, kham palat ban ïa ka sngi bad u bnai.

ISAÏAH 61:2

U la phah ïa nga ban pynbna ba ka por ka wan haba U Trai un pynim ïa ki briew jong u bad jop ïa ki nongshun jong ki. U la phah ïa nga ban pyntngen ïa baroh kiba sngewsih,

ISAÏAH 61:3

ban ai ha kito kiba ïam sngewsih ha Seïon ïa ka jingkmen bad jingsngewbha ha ka jaka ka jingsngewsih, ka jingrwai jong ka jingïaroh ha ka jaka ki ummat kthang. Kin long kum ki dieng ba U Trai da lade hi u la thung. Baroh kin leh ïa kaei kaba dei. Bad ïa U Blei yn ai ka jingïaroh ïa kaei ba u la leh.

JEREMAÏAH 31:4

Sa shisien pat ngan tei ïa phi. Sa shisien pat phin shim ïa ki kanjari bad phin shad da ka jingkmen.

JEREMAÏAH 33:11

Hynrei ha kine ki jaka phin ïohsngew biang ïa ki jingpyrta jong ka jingkmen bad ka jinglehkmen bad ki jingsawa bakmen jong ki jingïabam khawai shongkurim. Phin ïohsngew ba ki briew ki ïarwai katba ki wallam ïa ki jingainguh thang sha ka Templ jong nga; kin ïa-ong, “ ‘To ainguh ïa U Trai Badonbor Baroh, namar u long uba bha bad ka jingieit jong u ka neh bymjukut.’ Ngan pynlong ïa kane ka ri kaba roi kyrhai kumba mynshuwa. Ma nga, U Trai, nga la kren.”

SEKHARAÏAH 8:19

“Ki jingshah jingit kiba la long ha u bnai basaw, uba san, uba hynñiew, bad uba shiphew kin kylla long ki Jingkhawai Niam ka jingkmen bad ka jingshadkmen ïa ki paid Judah. Phi dei ban ieit ïa ka jingshisha bad ka jingsuk.”

ÏOANNIS 16:22

Kumta kan long bad phi: Mynta phi ïasngewsih, hynrei ngan sa wan khmih pat ïa phi, bad ki dohnud jong phi kin dap da ka jingkmen; ka jingkmen kaba yn ym don uba lah ban shim noh na phi.

NONGBISHAR 21:21

Haba ki theisamla na Shiloh ki wan shad ha ka por ka Jingkhawai Niam, phi to wan mih na kita ki bri sohwaiñ. Uwei pa uwei na phi un shim da ka bor napdeng kita ki theisamla bad ïalam ban long ka tnga jong phi sha ka jaka ki Benjamin.