JEREMAÏAH 18:21 - Khasi CL Bible (BSI)

²¹ Hynrei mynta, ko Trai, ai ba ki khun jong ki, kin ym ïoh jingbam haduh ban da ïap; ai ba kin shah pynïap ha ka thma. Ai ba ki kynthei kin duh noh ïa la ki tnga bad ïa ki khun jong ki; ai ba ki rangbah kin ïap na ka jingpang bad ba ki samla shynrang kin shah pynïap ha ka thma.

KA BAIBL

²¹ Namar kata, to ai noh ïa ki khun jong ki ha ka 'nemsniew, bad aiti noh ïa ki ha ka bor ka waitlam; bad to ki tnga jong ki kin long kiba la duh khun, bad ki riewkynthei; bad ki rangbah jong ki ai ban pynïap ïa ki da ka jingïap, bad ban pom da ka waitlam ha ka thma ïa ki samla jong ki.

JEREMAÏAH 18:21 ပူးပေါင်းရင်းမြစ်များ

2 KHRONIKL 36:17

Kumta U Trai u wallam ïa u syiem ka Babilonia bad tur ïaleh ïa ki. U syiem u pynïap ïa ki samla shynrang ka Judah, wat hapoh ka Templ hi. Um don jingsngewsynei ïano ïano, samla ne tymmen, shynrang ne kynthei, uba pang ne uba koit. U Blei u aiti ïa ki baroh ha u.

SALM 63:10

Kin shah pynïap ha ka thma, bad ïa ki met jong ki, ki suri kin bam.

SALM 63:11

Namar U Blei u ai ha u ka jingjop, u syiem un shadkmen. Kito kiba pynlong ki jingkular ha ka kyrteng jong U Blei kin ïaroh ïa u, hynrei ïa ki shyntur jong kiba lamler yn set.

EKSODOS 22:24

bad ngan bitar lep, bad ngan pynïap ïa phi ha ka thma. Ki tnga jong phi kin kylla riewkynthei, bad ki khun jong phi kin kylla khunswet.

ISAÏAH 13:18

Da ki ryntieh bad ki khnam jong ki, kin pynïap ïa samla shynrang. Kin ym pyn-i jingisynei ïa ki khunlung bad kin ym sngewsynei ïa ki khynnah.

ISAÏAH 9:16

Kito kiba ïalam ïa kine ki briew ki la ïalam bakla ïa ki bad pynshaïong jingmut lut ïa ki.

ISAÏAH 9:17

Bad kumta U Trai un ym shah ba uno uno u samla un lait phet, bad un ym pyn-i ka jingisynei ïano ïano na ki riewkynthei bad ki khunswet, namar baroh ki briew ki long kiba khlem blei bad bymman bad kaei kaei baroh kaba ki ong ka long kaba sniew. Pynban la katta ruh ïa ka jingbitar jong U Trai yn ym pynkut, hynrei ka kti jong u kan dang ïai kner ban pynshitom.

JEREMAÏAH 12:3

Hynrei, A Trai, me ithuh ïa nga; me ïohi kaei ba nga leh, bad kumno nga la ieit ïa me. To paring sharud ïa kine ki rangbah basniew kum ïa ki langbrot ki ban shah ot doh; to sumar ïa ki tad haduh ba ka dei ka por ïa ki ban shah pynïap.

JEREMAÏAH 14:16

Ki briew ha kiba ki la kren ïa kine kiei kiei kin ïap ha kajuh ka rukom. Ïa ki met jong ki yn bret shabar ha ki lynti jong ka Jerusalem, bad yn ym don mano mano ban tep ïa ki. Kane kan jia ha ki baroh — kynthup ïa ki tnga jong ki, ki khun shynrang bad ki khun kynthei jong ki. Ngan pynlong ïa ki ban siew na ka bynta ka jingbymman jong ki.”

JEREMAÏAH 15:7

Ha kawei pa kawei ka shnong ha ka ri nga la kynting ïa phi sha ka lyer kum ïa u phlangïap. Nga la pynjot ïa phi, ki briew jong nga, nga la pynïap ïa ki khun jong phi namar phim shym sangeh ïa ki rukom basniew jong phi.

JEREMAÏAH 15:8

La don kham bun ki riewkynthei ha ka ri jong phi ban ïa ki symboh shyiap harud ka duriaw. Nga la pynïap ïa ki rangsamla jong phi ha ka rta kaba dang khie bha bad pynlong ïa ki kmie jong ki ban shahshitom. Nga lynshop kynsan ïa ki da ka jingkhuslai bad ka jingtriem.

JEREMAÏAH 50:30

Te ïa ki samla shynrang jong ka yn pynïap ha ki surok bah jong ka nongbah, bad ki shipai jong ka baroh yn pynjot ha kata ka sngi. Ma nga, U Trai, nga la kren.

JEREMAÏAH 9:21

Ka jingïap ka la wan shapoh lyngba ki jingkhangïit jong ngi bad ka la rung sha ki ïingsyiem jong ngi; ka la ot ïa ki khynnah ha ki surok bad ïa ki samla shynrang ha ki jaka ïew.

SNGEWSYNEI 1:15

“U Trai u rkhiebeiñ ïa baroh ki shipai bakhlaiñ tam jong nga; u la phah ka kynhun shipai ban pynjot ïa ki samla shynrang jong nga. U la pynlwet ïa ki briew jong nga kum ïa ki sohwaiñ ha ka jaka khñiot sohwaiñ.

SNGEWSYNEI 5:3

Ïa ki kpa jong ngi la pynïap da u nongshun, bad mynta ki kmie jong ngi ki long ki riewkynthei.

ESEKIEL 16:38

Ngan pynrem ïa pha namar ka jingawria bad ka jingpynïap briew, bad ha ka jingbitar bad jingbitar shla jong nga ngan pynshitom ïa pha da ka jingïap.

ESEKIEL 22:25

Ki nongïalam ki long kum ki sing kiba kyrhuh halor ki mrad kiba ki la pynïap. Ki pynïap ïa ki briew, ki shim ïa ka pisa baroh bad ki jingdon jingem kat kaba ki lah ban ïoh, bad da kaba pynïap briew ki pynsah riewkynthei ïa kiba bun.

AMOS 4:10

“Nga la phah ïa ka khlam ha phi kum kata kaba nga la phah ha Ijipt. Nga la pynïap ïa ki samla shynrang jong phi ha ka thma bad nga la knieh noh ïa ki kulai jong phi. Nga la pyndap ïa ki thliew khmut jong phi da ka jingiwtung ki metïap ha ki jaka shong dara jong phi. Katta ruh phim shym la wan phai pat sha nga.

DEUTERONOMI 32:25

Ka thma kan wallam ka jingïap ha ki lynti, ka jingshyrkhei kan lynshop ha ki ïing. Ki rangsamla bad ki theisamla kin ïap; yn ym map ïa ki khunlung ne ïa ki tymmen ruh.

2 TIMOTHI 4:14

U Aleksandar, u kamar-tama u la pyndik eh ïa nga; U Trai un sa ainong ïa u kat kum ki kam jong u.

1 SAMUEL 15:33

U Samuel u ong, “Kumba ka waitlam jong me ka la pynlong ïa kiba bun ki kmie ban duh khun, kumta mynta ka kmie jong me kan long khlem khun.” Bad u pom lyngkhot lyngkhai ïa u Agag ha khmat ka duwan ha Gilgal.