JEREMAÏAH 12:4 - Khasi CL Bible (BSI)

⁴ Sa katno ba ka ri jong ngi kan tyrkhong, bad ba u phlang ha kawei pa kawei ka pyntha un ïapstai? Ki mrad bad ki sim ki ïap namar ka jingbymman jong ki briew jong ngi, ki briew kiba ong, ‘U Blei um ïohi ïa kaei kaba ngi leh.’ ”

KA BAIBL

⁴ Slem katno ka ri kan ïam, bad ki jhur ka ri baroh kin ïapstai? Namar ka jingbymman jong kita kiba shong ha ka, ïa ki mrad baroh bad ki sim, ki la duh noh; namar ki la ong, “Un ym ïohi ïa ka bakut jong ngi.”

JEREMAÏAH 12:4 ပူးပေါင်းရင်းမြစ်များ

SALM 107:34

U pynlong ïa ka khyndew basboh ban kylla ri khlaw mluh namar ka jingbymman jong kito kiba shong hangta.

SALM 50:21

Phi la leh ïa kane baroh, bad ngam shym ong ei ei, kumta phi pyrkhat ba nga la long kum ma phi. Hynrei mynta nga sneng ïa phi bad nga pynlong ïa kane ka kam kaba shai ha phi.

ISAÏAH 24:4

Ka pyrthei ka tyrkhong bad ka stai noh; ka pyrthei baroh kawei ka kylla tlot; ka pyrthei bad ka sahit bneng, baroh ar, kin pyut noh.

ISAÏAH 24:6

Kumta U Blei u la pynbna ïa ka jingtim ha ka pyrthei. Ki briew jong ka ki hap ban siew ïa kaei kaba ki la leh. Kiba im ki la nang duna bad nang duna.

JEREMAÏAH 12:11

Ki la pynkylla ri khlaw ïa ka; ka la long thylli ha khmat jong nga. Ka ri baroh kawei ka la kylla long ka ri shyiap, bad ym don mano mano ba salia.

JEREMAÏAH 14:2

“Ka Judah ka don ha ka jingïambriew; ki nongbah jong ka ki la jan ïap, ki briew jong ka ki thiah ha madan ha ka jingsngewsih, bad ka Jerusalem ka kyang jam ban ïoh jingïarap.

JEREMAÏAH 23:10

Ka ri ka jyllei da ki briew ki bymïaineh ha U Trai; ki im ka jingim bymman bad pyndonkam bakla ïa la ka bor. Namar ka jingtim U Trai, ka ri ka ïamkthang, bad ki jaka phlang ki tyrkhong.

JEREMAÏAH 4:25

Nga la ïohi ba ym don briew; wat ki sim ki la lah her noh.

JEREMAÏAH 4:28

Ka pyrthei kan ïam sngewsih; ka sahit bneng kan sdang dum. U Trai u la kren bad un ym kylla ïa ka jingmut jong u. U la pynlong ïa ka jingrai jong u bad un ym kylla dien.

JEREMAÏAH 5:13

Ki la ong ba ki nongïathuhlypa kim long ei ei hynrei ki pla dap lyer bad ba kim don ka khubor na U Trai. U Trai U Blei Badonbor Baroh u la ong ha nga, “Ko Jeremaïah, namar ba kine ki briew ki la kren ïa kum kine kiei kiei, ngan pynlong ïa ki ktien jong nga kum ka ding ha ka shyntur jong me. Ki briew kin long kum ka dieng, bad ka ding kan bam duh ïa ki.”

JEREMAÏAH 5:31

Ki nongïathuhlypa kim kren ei ei hynrei tang ki jinglamler; ki lyngdoh ki synshar tang kumba hukum ki nongïathuhlypa, bad ki briew jong nga kim shym pynpaw jingpyrshah ei ei. Hynrei kin leh aïu haba baroh ka poi sha kaba kut?”

JEREMAÏAH 7:20

Bad kumta ma nga, U Trai Nongsynshar, ngan theh ïa ka jingbitar shla jong nga halor kane ka Templ. Ngan theh ïa ka halor ki briew bad ki mrad kumjuh, bad wat halor ki dieng bad ki jingthung. Ka jingbitar jong nga kan long kum ka ding kaba ym don mano mano ba lah ban pynlip.

JEREMAÏAH 9:10

Nga la ong, “Ngan ïam sngewsih na ka bynta ki lumbah bad jaw ummat na ka bynta ki jaka pynbamphlang, namar ki la tyrkhong, bad ym don mano mano ba leit jingleit lyngba jong ki. Ïa ka jingsawa ki jingri ym shym ïohsngew shuh; ki sim bad ki mradkhlaw ki la phet bad kim don shuh.”

JEREMAÏAH 9:9

Hato ngan ym pynshitom ïa ki na ka bynta kine kiei kiei? Hato ngan ym pynhiarkput halor ka jaitbynriew kaba kum kane? Ma nga, U Trai, nga la kren.”

HOSIA 4:3

Bad kumta ka ri kan sa tyrkhong, kiei kiei baroh kiba im ha ka kin ïap. Baroh ki mrad bad ki sim, bad wat ki dohkha ruh, kin ïap.”

JOEL 1:18

Ki masi ki ïa-pah ha ka jinglanot namar ym don jaka phlang na ka bynta jong ki; ki kynhun langbrot ruh ki shah jynjar.

AMOS 1:2

U Amos u ong, “U Trai u kyrhuh na u lum Seïon; Ka sur jong u ka tied kum u pyrthat na Jerusalem. Ki jaka phlang ki tyrkhong, bad u phlang ha Lum Karmel u ïapstai.”

HABAKKUK 3:17

Wat la ki dieng Dumbur kim don soh bad ym don sohwaiñ ba mih ha ki dieng sohwaiñ, wat la u dieng Olib um sei ei ei bad ki lyngkha kim pynmih kew, wat la ki langbrot baroh ki ïap bad ki sem masi ki thylli,

SEKHARAÏAH 1:12

Nangta u angel u la ong, “A Trai Badonbor Baroh, me la bitar ïa ka Jerusalem bad ïa ki nongbah jong ka Judah haduh hynñiewphew snem mynta. Slem sa katno kan long ha shuwa ba men pyn-i ha ki ka jingisynei?”

Ka Shithi U Paul Sha Ki Nong Rom 8:22

Naba ngi tip ba haduh ka por ba mynta, ki jingthaw baroh ki ud da ka jingpang, kum ka jingpang jong ka jingsuh kha.