JAKOB 1:17 - Khasi CL Bible (BSI)

¹⁷ Ka jingai kaba bha baroh bad kaba janai baroh ka wan na bneng; ka wan hiar na U Blei, u Nongpynlong ïa ki jingshai ba kynja bneng, u bym ju kylla lane pynlong jingdum da ka jingpynphai.

KA BAIBL

¹⁷ Ka jingai babha baroh, bad ka jingai bajanai baroh, ka long na jrong, kaba wan hiar na U Kpa ki jingshai, bad uba ym don ka jingkylla shuh, lymne ka syrngiew kaba shat da ka jingkylla.

JAKOB 1:17 ပူးပေါင်းရင်းမြစ်များ

JENESIS 41:16

U Joseph u jubab, “Syiem Kynrad, ngam lah; hynrei U Blei un ai ka jingbatai kaba ai jinghun.”

1 KHRONIKL 22:12

Bad ai ba U Trai U Blei jong me un ai ha me ka jingtip bad ka jingstad ba kumta me lah ban synshar ïa ka Israel kat kum ki Hukum jong u.

1 KHRONIKL 29:19

Ai ha u Solomon u khun jong nga ka jingkwah naduh ka dohnud ban kohnguh ïa kaei kaei baroh kaba me la hukum bad ban tei ïa ka Templ ïa kaba nga la pynlong kine ki jingpynkhreh.”

SALM 102:27

Hynrei ma me men long borabor kumjuh, bad ka jingim jong me kan ym kut lano lano ruh.

SALM 122:6

To duwai na ka bynta ka jingsuk jong ka Jerusalem; “Ai ba kito kiba ieit ïa pha kin manbha.

SALM 136:7

U la thaw ïa ka sngi bad ïa u bnai; ka jingieit jong u ka neh bymjukut;

SALM 84:11

U Trai u long u nongïada jong ngi bad u syiem uba donburom; u kyrkhu ïa ngi da ka jingbhasbun bad ka burom. Um kyntait ïa kaei kaei kaba bha na kito kiba leh ïa kaei kaei kaba dei.

SALM 85:12

U Trai un pynlong pynmanbha ïa ngi, bad ka ri jong ngi kan pynmih kyrhai ki jingot.

PROBERB 2:6

Dei U Trai uba ai ïa ka jingstad; na u ka wan ka jingtip bad ka jingshemphang.

ISAÏAH 28:26

U tip kumno ban trei ïa ka kam jong u namar U Blei u hikai ïa u.

ISAÏAH 45:7

Nga thaw ïa ka jingshai bad ïa ka jingdum; nga wanrah ka jingkyrkhu bad ka jingjot. Ma nga, U Trai, nga leh ïa kine kiei kiei baroh.

ISAÏAH 46:10

Naduh mynnyngkong nga la tip lypa ïa kaei ka ban mih; la slem bah nga la ïathuh lypa ïa kaei ka ban jia. Nga la ong ba ki jingthmu jong nga kin ym duh da lei lei, ngan leh ïa kiei kiei baroh kiba nga thmu ban leh.

ISAÏAH 60:19

“Ka sngi kan ym long shuh ka jingshai jong pha mynsngi, lymne u bnai un long ka jingshai jong pha mynmiet, ma nga, U Trai, ngan long ka jingshai bymjukut jong pha; ka jingshai jong ka burom jong nga kan tyngshaiñ ha pha.

MALAKHI 3:6

“Nga long U Trai, bad ngam ju kylla. Bad kumta ma phi, ki khun ki ksiew u Jakob, phim pat shym la jah noh khoit.

JINGKHEIÑ 11:17

Ngan wan hiar bad ïakren bad me hangta, bad ngan shim khyndiat ka bor mynsiem ïa kaba nga la ai ha me bad ngan ai ïa ka ha ki. Te kin sa lah ban ïakit lem ïa ka jingkitkhlieh na ka bynta kine ki paidbah, bad men ym donkam shuh ban kit tang marwei hi.

JINGKHEIÑ 11:25

Nangta U Trai u wan hiar ha u lyoh bad u la kren ïa u. U la shim khyndiat ka bor mynsiem kaba u la ai ha u Moses bad u ai ïa ka ha kita ki hynñiewphew ngut ki nongïalam. Haba kata ka bor mynsiem ka la wan shong ha ki, ki sdang ban pyrta jam kum ki nongïathuhlypa, hynrei tang shipor.

JINGKHEIÑ 23:19

U Blei um long kum ki briew, kiba kren lamler; Um long kum u briew uba kylla la ka jingmut. Kat kaba u kular, u pyndep; U kren, bad la pyndep ïa kata.

MATHAÏOS 7:11

Phi kiba sniew eh, phi tip kumno ban ai kiei kiei kiba bha ïa ki khun jong phi. Kaba katno tam keiñ, ba U Kpa jong phi uba ha bneng un ai kiei kiei kiba bha ha kito kiba pan na u!

LOUKAS 11:13

Kiba sniew kumba phi long, phi tip kumno ban ai kiei kiei kiba bha ïa ki khun jong phi. Katno tam, te, ba U Kpa ba ha bneng un ai ïa U Mynsiem Bakhuid ha kito kiba pan na u!”

ÏOANNIS 1:9

Kane ka la long ka jingshai kaba shisha — ka jingshai kaba wan sha ka pyrthei bad pynshai ha u bynriew baroh.

ÏOANNIS 3:27

U Ïoannis u la jubab, “Ym don uno uno uba lah ban ïohpdiang ei ei lymda U Blei u ai ïa ka ha u.

ÏOANNIS 3:3

U Jisu u la jubab, “Nga ïathuh ha me ïa ka jingshisha: Ym don uba lah ban ïohi ïa ka Hima U Blei lymda kha pat ïa u.”

ÏOANNIS 8:12

U Jisu u la kren biang ha ki Pharisi. “Nga long ka Jingshai jong ka Pyrthei,” u la ong. “Uno uno uba bud ïa nga un ïoh ïa ka jingshai jong ka jingim bad da lei lei un ym ïaid ha ka jingdum.”

KI KAM 11:18

Haba ki la ïohsngew ïa kane, ki la sangeh ïa ka jingwoh nia jong ki bad ki la ïaroh ïa U Blei, da kaba ong, “Te U Blei u la ai ruh ha ki Jentil ïa la lad ban kylla-kaba-mut bad ban lait im!”

KI KAM 5:31

U Blei u la kyntiew ïa u sha ka liang kamon jong u kum u Nongïalam bad u Nongpynim, ban ai ha ki paid Israel ka kabu ban kylla-kaba-mut bad ban ïoh ka jingmap ïa ki pop jong ki.

Ka Shithi U Paul Sha Ki Nong Rom 6:23

Naba ka pop ka siew ïa la ka bainong — ka jingïap; hynrei ka jingaiei jong U Blei ka long ka jingim bymjukut ha U Khrist Jisu uba U Trai jong ngi.

1 KORINTH 4:7

Uei uba pynlong ïa phi ban sngew kham halor ïa kiwei pat? Hato ym dei U Blei uba la ai ha phi baroh kaba phi don? Kumta, te, kumno phi lah ban sngewsarong, kumba kaei kaba phi don, kam dei ka jingai sngewbha?

2 KORINTH 4:6

U Blei uba la ong, “Na ka jingdum ka jingshai kan tyngshaiñ!” u long ujuh U Blei uba la pynlong ïa ka jingshai jong u ban tyngshaiñ ha ki dohnud jong ngi, ban wanrah ha ngi ïa ka jingtip shaphang ka burom U Blei kaba tyngshaiñ ha U Khrist.

EPHESOS 1:18

Nga duwai ba yn plie ïa ki jingmut jong phi khnang ba phin ïohi ïa ka jingshai jong u, ba phin tip kaei kata ka jingkyrmen ïa kaba u la khot ïa phi, katno ki jingkynrei spah ki long kita ki jingkyrkhu baphylla kiba U Blei u la kular ïa la ki briew,

EPHESOS 2:8

Namar dei da ka jingaiei U Blei ba ïa phi la pynim da ka jingngeit. Kam dei na ka jingmih na ki kam jong phi hi, hynrei ka long ka jingai U Blei, khnang ba uno uno un ym lah ban kren sarong shaphang kata.

DEUTERONOMI 4:19

Sumar ban ym shah pynshoi kat haduh ban da mane bad shakri ïa kaei kaba phi ïohi ha sahit bneng — la ka long ka sngi, u bnai, lane ki khlur, ïa kiba U Trai U Blei jong phi u la ai ha kiwei pat ki briew baroh ha ka pyrthei ba kin ïoh mane.

PHILIPPI 1:29

Naba ïa phi la ai ka lad ban shakri ïa U Khrist, ym tang ban ngeit ha u, hynrei ban shahshitom ruh na ka bynta jong u.

1 TIMOTHI 6:16

Dei tang ma u marwei u bymïap shuh; u shong ha ka jingshai ha kaba ym don uba lah ban leit sha jan jong u. Ym don uno uno uba la ju ïohi ïa u; ym don uno uno uba lah ban ïohi ïa u. Ha u, to long ka burom bad ka borbah bymjukut! Amen.

HEBRU 13:8

U Jisu Khrist u long ujuh mynhynnin, mynta bad sha ki bymjukut.

JAKOB 1:5

Hynrei lada uno uno na phi u duna ïa ka jingstad, u dei ban duwai ha U Blei, u ban ai ïa ka ha u; namar U Blei u ai kylluid bad ai ei ïa baroh.

JAKOB 3:15

Kaba kum kata ka jingstad kam long kaba wan hiar na bneng; ka long jong ka pyrthei, kam long kaba kynja mynsiem bad ka long kaba kynja ksuid.

JAKOB 3:17

Hynrei ka jingstad kaba wan najrong nyngkong eh ka long kaba sngur; ka long kaba pynïashong suk, kaba jemnud bad kaba pynlong paralok; ka dap da ka jinglehisynei bad ka pynmih ïa ka jingseisoh ha ki kam babha; ka lait na ka jingshah shiliang bad ka jingarsap.

1 ÏOANNIS 1:5

Mynta ka khubor ïa kaba ngi la ïohsngew na U Khun jong u bad pynbna ha phi ka long kane: U Blei u long ka jingshai bad ha u ka jingdum kam don satia.

1 ÏOANNIS 4:10

Kane ka long kaei kaba ka jingieit ka long: Kam dei ba ngi la ieit ïa U Blei, hynrei, ba u la ieit ïa ngi bad u la phah ïa la U Khun ban long ka lynti ha kaba map ïa ki pop jong ngi.

JINGPYNPAW 21:23

Ka nongbah kam donkam ïa ka sngi lane ïa u bnai ban tyngshaiñ halor jong ka, namar ba ka burom jong U Trai ka tyngshaiñ halor jong ka, bad U Khunlangbrot u long ka sharak jong ka.

JINGPYNPAW 22:5

Yn ym don shuh kano kano ka miet, bad kin ym donkam ïa ki sharak lane ïa ka jingshai ka sngi, namar U Trai uba U Blei un long ka jingshai jong ki bad kin synshar kum ki syiem junom la junom.

1 SAMUEL 15:29

U Blei bakhraw jong ki Israel um ju lamler lane kylla la ka jingmut. Um dei u briew — um ju kylla la ka jingmut.”