ISAÏAH 9:12 - Khasi CL Bible (BSI)

¹² Ka Syria ha ka phang mihngi bad ka Philistia ha ka phang sepngi ki la ang la ka shyntur ban bam ïa ka Israel. Pynban la katta ruh ïa ka jingbitar jong U Trai ym shym pynkut; ka kti jong u ka dang kner ban pynshitom.

KA BAIBL

¹² ki Syria na shuwa, bad ki Philistia na shadien; te kin bam duh ïa ki Israel da ka shyntur ba ang. La kumta ruh ka jingbitar jong u kam shym la phai noh, hynrei, ka kti jong u ka shu dang kner.

ISAÏAH 9:12 ပူးပေါင်းရင်းမြစ်များ

ISAÏAH 5:25

U Trai u la bitar ïa la ki briew bad u la kner ïa la ka kti ban pynshitom ïa ki. Ki lumbah kin khynñiuh bad ïa ki met jong kito kiba la ïap yn ieh ha ki lynti kum ka synrum. Pynban wat la katta ruh ïa ka jingbitar U Trai ym shym la pynkut, hynrei ka kti jong u kan ïai kner ban pynshitom.

2 KHRONIKL 28:18

Ha kane kajuh ka por ki Philistia ruh ki hiarthma ïa ki shnong kiba ha ki kjat lum kiba shaphang sepngi bad ïa ka Judah bashaphang shathie. Ki la ïohknieh ïa ki nongbah jong ka Beth Shemesh, ka Aijalon, bad ïa ka Gederoth, bad ruh ïa ki nongbah jong ka Soko, ka Timnah, bad ka Gimso lem bad ki nongrit jong ki, bad ki shongduh hangta.

SALM 79:7

Naba ki la pynïap ïa ki briew jong me; bad ki la pynjot pynpra ïa ka ri jong me.

2 SYIEM 16:6

(Ha kajuh ka por, u syiem ka Edom u ïoh pat ïa ka nongbah Elath, bad u beh krad ïa ki nong Judia kiba sah hangta. Ki nong Edom ki shongsah ha Elath, bad ki dang sah hi hangta.)

JEREMAÏAH 10:25

Pynphai ïa ka jingbitar jong me halor ki jaitbynriew ki bym mane ïa me bad halor ki briew kiba kyntait ïa me. Ki la pynïap ïa ki briew jong me; ki la pynjot khoit ïa ngi bad iehnoh ïa ka ri jong ngi ha ka jingjot jingpra.

ISAÏAH 10:4

Phin shah pynïap ha ka thma lane phin shah paring kum ki koidi. Pynban wat la katta ruh, ïa ka jingbitar jong U Trai yn ym pynkut; ka kti jong u kan dang ïai kner ban pynshitom.

ISAÏAH 9:21

Ki briew jong ka Manasseh bad ki briew jong ka Ephraim ki tur ïaleh para ma ki, bad ryngkat lang ki tur ïaleh ïa ka Judah. Pynban la katta ruh, ïa ka jingbitar jong U Trai ym shym pynkut, ka kti jong u ka dang ïai kner ban pynshitom.

ISAÏAH 9:17

Bad kumta U Trai un ym shah ba uno uno u samla un lait phet, bad un ym pyn-i ka jingisynei ïano ïano na ki riewkynthei bad ki khunswet, namar baroh ki briew ki long kiba khlem blei bad bymman bad kaei kaei baroh kaba ki ong ka long kaba sniew. Pynban la katta ruh ïa ka jingbitar jong U Trai yn ym pynkut, hynrei ka kti jong u kan dang ïai kner ban pynshitom.

JEREMAÏAH 35:11

Hynrei mynba u syiem Nebukhadnessar u la hiarthma ïa ka ri, ngi la rai ban wan sha Jerusalem ban lait na ki kynhun shipai ka Babilonia bad ka Syria. Dei na kane ka daw balei ba ngi ïashong ïasah ha Jerusalem.”

JEREMAÏAH 4:8

Kumta to kup ka jaiñ khain, bad to ïam bad ud sngewsih namar ka jingbitar shla jong U Trai kam shym la phai noh na ka Judah.

DEUTERONOMI 31:17

Te ngan bitar lep ïa ki; ngan kyntait bad pynjot thiaw ïa ki. Shibun ki jingjynjar kiba sngewshyrkhei kin wan ngat ha ki, ba kumta kin sa sngewthuh ba kita kiei kiei ki wan jia ha ki namar ba nga, U Blei jong ki, ngan ym don ryngkat shuh bad ki.

ISAÏAH 11:14

Ryngkat lang kin tur ïaleh ïa ki Philistia ha ka phang sepngi bad lute ïa ki briew kiba shong ha ka phang mihngi. Kin hiarthma ïa ki briew jong ka Edom, bad ka Moab, bad ki briew jong ka Ammon kin kohnguh ïa ki.

ESEKIEL 6:14

Ho-oid ngan kner ïa ka kti jong nga bad pynjot ïa ka ri jong ki. Ngan sa pynlong ïa ka, ka jaka shrah naduh ka ri shyiap bashathie shaduh ka nongbah Riblah kaba na shatei, khlem da map ïa kano kano ruh ka jaka bashong ki Israel. Te baroh kin sa tip ba nga long U Trai.”

ESEKIEL 16:27

“Mynta nga la rah ïa la ka kti ban pynshitom ïa pha bad ban shim noh ïa ka bhah jong pha na ka jingkyrkhu jong nga. Nga lah aiti ïa pha ha ki Philistia, kiba isih ïa pha bad kiba sngewjli ïa ki jingleh khlem akor jong pha.

ISAÏAH 31:1

Kito kiba leit sha Ijipt ban ïoh jingïarap kin jot! Ki shaniah ha ka bor shipai bakhraw jong ka Ijipt — ki kulai, ki kali ïapom, bad ki shipai. Hynrei kim tip ban shaniah ha U Trai, U Blei Bakhuid ki Israel, lane pan na u ïa ka jingïarap.

JEREMAÏAH 15:7

Ha kawei pa kawei ka shnong ha ka ri nga la kynting ïa phi sha ka lyer kum ïa u phlangïap. Nga la pynjot ïa phi, ki briew jong nga, nga la pynïap ïa ki khun jong phi namar phim shym sangeh ïa ki rukom basniew jong phi.

HOSIA 7:10

Ka jingsngewmeng ki paid Israel ka kyang pyrshah ïa ki hi. Wat haba kane baroh ka la jia, kim shym la wan phai sha nga, U Trai U Blei jong ki.

AMOS 4:6

“Dei ma nga uba la wallam ïa ka jingïapthngan ha ki nongbah jong phi baroh, pynban phim shym la wan phai pat sha nga.

AMOS 4:8

Ha ka jingtlot namar ka jingsliang, ki briew jong kiba bun ki nongbah ki la leit sha ka nongbah kaba ki kyrmen ban ïoh um, hynrei kim ïoh ka umdih ka ban biang. Katta ruh phim shym la wan phai pat sha nga.

AMOS 4:9

“Nga la phah ïa ka lyer khluit ban pyntyrkhong ïa ki jingthung jong phi. Ki puit ki la bam duh ïa baroh ki kper bad bri sohwaiñ jong phi, ki dieng Dumbur bad ki dieng Olib jong phi. Katta ruh phim shym la wan phai pat sha nga.

AMOS 4:10

“Nga la phah ïa ka khlam ha phi kum kata kaba nga la phah ha Ijipt. Nga la pynïap ïa ki samla shynrang jong phi ha ka thma bad nga la knieh noh ïa ki kulai jong phi. Nga la pyndap ïa ki thliew khmut jong phi da ka jingiwtung ki metïap ha ki jaka shong dara jong phi. Katta ruh phim shym la wan phai pat sha nga.

AMOS 4:11

“Nga la pynjot katto katne na phi kumba nga la pynjot ïa ka Sodom bad ka Gomorrah. Kito na phi kiba la lait im ki long kum ka dieng barhem ba la sei na ka ding. Katta ruh phim shym la wan phai pat sha nga,” ong U Trai.

SEPHANAÏAH 1:6

Ngan pynjot ïa kito kiba la phai lyndet bad ki bym bud shuh ïa nga, kito ki bym shym wan sha nga, lane kylli na nga ban kdew lynti ïa ki.”

SEPHANAÏAH 3:2

Kam shym la pynshahshkor ïa U Trai lane pdiang ïa ka jingsneng pynbeit jong u. Kam shym la buh ïa la ka jingshaniah ha U Trai lane kyrpad ïa ka jingïarap jong u.